Tơdrong jang đei man xă hlŏh 220m², anih gơ̆h iŏk yoa loi 440m², đei man kơjăp ‘lơ̆ng, kơmŏng tuh ƀê tông jrăng pơsei, không pơsei păng hơnă kơjung vă veh ver kơ đak lơ̆p, pơm lăp ăn tơdrong truh tŏk oei pơgia ăn kon pơlei mưh đei ‘mi tih đak lơ̆p. Akŏm đĭ đăng jên tơmât jang vă jê̆ 1,5 ti đơ̆ng jên tơpôl vang tơgop, tơchĕng adrol gô man đang lơ̆m khei 9/2026.

Tơdrong jang âu vang tơgop pơm hơtŏk kơsư̆k tơjră, tang găn sar bar tơ̆ tơring, hơnơ̆ng tơguăt hơdai ‘lơ̆ng tơdrong jang Quang Trung vang man tơgŭm, hơmet ming hnam oei ăn kon pơlei đơ̆ng rŏng kơ ‘mi tih đak lip. Hơdrô̆ tơ̆ xăh Hòa Thịnh, hlŏh 100 tŏ hnam man kơjăp ‘lơ̆ng hlôi đei man đang ăn dôm unh hnam đei hnam păk dăh mă đak hoch pơđĭ đơ̆ng ‘mi tih đak lip âu ki.