Hơdai hăm tơdrong vei sơđơ̆ng ăn ‘măng pơlong, tơring bơngơ̆t tơgŭm hŏk tro tơ̆ tơring hơtăih hơtŏ, tơring kon pơlei kon kông păng dôm oh đei tơdrong hơrih sa mơmat tat, ưh kơ lê̆ hŏk tro hơyơ yua kơ tơdrong năm vih vơ̆t, oei sa mă ƀơm ưh kơ ‘lơ̆ng truh tơdrong vang pơlong. ‘Măng pơlong sơnăm ‘nâu, Đắk Lắk pơgơ̆r 64 hơnih pơlong tơpă, 55 hơnih pơlong hơmet hiă hăm dang 1.500 lăm pơlong. Hloh 5.000 ‘nu kang ƀô̆, thây kô pơtho, bơngai jang đei hơvơn vang jang dôm tơdrong pơgơ̆r pơlong. Dêh char hlôi klaih song hơnăp jang hơdai ăn kơ rim anih jang, tơring; hơdai hăm dăr hơlen tôm tong dôm tơdrong hiôk găh anih jang, tơmam drăm, bơngai jang păng dôm trong jang hơmet pơ ‘lơ̆ng tơdrong đei ƀôh.

Hăm dôm tơring hơtăih hơtŏ păng tơring mơmat tat, dôm tơring jang hơdai hăm hnam trưng dăr hơlen, đei trong jang tơgŭm trŏ lăp hăm rim hŏk tro. Tơdrong jang “Tơgŭm pơyan pơlong” đei tơlĕch jang jơ̆p jang hăm tơdrong vang jang đơ̆ng đoàn viên, hơdruh tơdăm păng dôm khŭl tơpôl, tơgŭm hŏk tro găh hơnih oei sa, gre năm vih vơ̆t păng dôm tơdrong kăl lơ̆m prăt jơ năr pơgơ̆r pơlong. Hơdai hăm ‘noh, rim khŭl lĭnh kơpal vei sơđơ̆ng trong nơnăm, pơtruh ŭnh điên, roi tơbăt pơma dơnuh păng dôm tơdrong kăl pơyua ăn ‘măng pơlong lơ̆m rim tơdrong.