Kiơ̆ tơdrong jang tơgŭm ‘nao, dêh char Gia Lai gô tơgŭm kơtă 1 ‘măng hăm bơngai kon kông găh ŭnh hnam dơnuh hin, ŭnh hnam vă jê̆ dơnuh hin đei ‘meh vă găh teh oei păng teh choh jang sa. Hăm teh oei, dôm bơngai tam mă đei teh dăh mă ưh kơ măh teh oei gô đei set hơlen pơjao teh dăh mă ăn phep tơplih iŏk yua teh kiơ̆ tơdrong hơgăt.

Găh teh choh jang sa, dôm ŭnh hnam đei teh choh pơtăm hơla kơ 50% tơdrong pơkăp hơgăt gô đei set hơlen pơjao tơmơ̆t dơ̆ng teh choh jang sa ưh kơ iŏk jên iŏk yua teh. Tơdrong tơchơ̆t ‘măng âu tơgŭm pơm hơtŏ tơdrong jang tơgŭm găh teh, pơm tơdrong hiôk vă kon pơlei sơđơ̆ng oei sa, hơtŏk tơiung mŭk drăm, bơ̆jang đei yua tơdrong hơgăt tơjur dơnuh hin kơjăp.