Kơsơ̆ 28/5, tơ̆ Hnam Quốc hội, Anih vei lăng hơdrĕch kon kông kơ Quốc hội pơm lêh tơbăt 65 sơnăm pơjing păng sơng iŏk Mê đai bơ̆ jang dơ̆ng mă mônh. Kơdră Quốc hội Trần Thanh Mẫn truh akŏm păng iung pơma nơ̆r pơtho. Hlŏh 65 sơnăm bơ̆ jang, Anih vei lăng hơdrĕch kon kông đei lơ tơdrong tơgop gĭt kăl lơ̆m tơdrong chih pơjing luơ̆t, dăr lăng păng tơchơ̆t dôm tơdrong tih kơ teh đak; vang hơlen năng, tơgop nơ̆r ăn kơhrĕng khôi luơ̆t, vang hơmet pơ ‘lơ̆ng dôm tơdrong tơgŭm hăm kon pơlei kon kông, tơring groi kông, tơring hơtăih yăih. Kơdră Quốc hội Trần Thanh Mẫn chih răk, pôk pơ ư dôm tơdrong adrin, plang pơyơ̆r đơ̆ng rim jơhnơr kăn ƀô̆ Anih vei lăng hơdrĕch kon kông.

Tơ̆ hơnăp, Kơdră Quốc hội athei Anih vei lăng hơdrĕch kon kông hơmet pơ ‘lơ̆ng tơdrong tơchĕng hơlen, tơdrong tơgŭm; pơm ‘lơ̆ng ăn tơdrong jang tŏk tơklep hăm hơtŏ băl, vei kơjăp dôm tơdrong juăt, jŏh ayŏ kơ dŏ xoang păng hơmet kơjăp tơdrong pơvei, tơguăt đĭ đăng hơdrĕch hơdrung. Atŭm hăm ‘nŏh, dôm tơdrong tơgŭm ‘măn ăn kon pơlei athei chih mă rơđăh, lăp hăm yăn âu, lăp hăm tơdrong ‘mĕh vă tôch tơgăl đơ̆ng kon pơlei.