Tơchơ̆t đei iŏk yua đơ̆ng năr 5/6/2026, hăm lơ tơchơ̆t tơgŭm 'nao, vă vei răk tơƀăk mong mŭk drăm joh ayŏ gơh tơnăp păng kơjăp sơđơ̆ng hloh. Tơchơ̆t akŏm lơ̆m 5 grŭp jang tơm noh tơgŭm pơtho, hơmet 'lơ̆ng ăn tơdrong jang chĭng chêng, tơgŭm jang ăn kâu lak ƀô̆, hơmet hnam kơjung păng cham char pơlei pơla tơguăt hăm tơmang pơhiơ̆, atŭm hăm noh hơtŏk kơtang tơplih kơmăi kơsô̆ vă vei răk yư lĭu joh ayŏ. Kiơ̆ tơchơ̆t tơlĕch, Đăk Lăk gô tơgŭm lơ hloh noh 80.000 hlj/'nu/1 năr jên xa păng jên vih vơ̆t ăn bơngai năm hŏk lăm pơtho chĭng chêng tơ̆ pơlei pơla; tơgŭm năr jang đei 300.000 hlj/'nu/1 năr ah akŏm ming pơ-'lơ̆ng;  200.000 hlj/1 'măng hăm bơngai vang chă hơlen chih akŏm, răk 'măn, hrip nơ̆r, phĭn rup.

Dêh char tơgŭm 5 triu hlj/kâu lak ƀô̆/1 sơnăm, atŭm hăm noh asong jên chă răt chĭng chêng, hơbăn ao tanh păng kơmăi kơmŏk pơre nơ̆r. Dôm kâu lak ƀô̆ joh ayŏ đei xa tơgŭm tŏ sĕt jat noh ăn 10 'nu akŏm tŏ sĕt jat noh 1 'măng lơ̆m 1 khei. Tơguăt vei răk joh ayŏ chĭng chêng hăm hơtŏk tơmang pơhiơ̆ pơlei pơla, dêh char Đăk Lăk kơchĕng gô rơih iŏk 1 pơlei gơh hơgei tơ̆ dôm xah, phương hlôi đei pơkăp vă pơjing cham char akŏm chĭng chêng, tơgop pơjing trong pơm jang ăn kon pơlei kon kông tơ̆ tơring.