Lăng đơ̆ng tơdrong yan ou, proh hơmet thôn pơlei, koeng kơphô̆ jĭ tôch gĭt kăl. Mưh pơm kơtoei thôn pơlei, koeng kơphô̆, khul chĕp pơgơ̆r jei kơtoei hloh, tơdrong chĕp pơgơ̆r đơ̆ng khul kơdră đảng, kơdră chĕp pơgơ̆r kâp tơring gô iung jang kơtă păng tĕnh koăng hloh. Adoi kon jên bơ̆ jang teh đak ăn kang ƀô̆ tơring pơlei jei tŏ sĕt ƀiơ̆ vă akŏm pơm hơtŏk tơdrong tơgum djru ăn khul kang ƀô̆ bơ̆ jang tơm đơ̆ng rŏng proh hơmet. PGS.TS Ngô Thành Can, Ƀok thây pơtho cao cấp Học viện Hành chính và quản trị công, hơlen:“Proh hơmet koeng kơphô̆, đơ̆ng noh thôn pơlei, mă blŭng trŏ lăp hăm dôm tơdrong kăl lơ̆m trong bơ̆ jang khul kơdră chĕp pơgơ̆r tơring ƀar kâp. Mă ƀar, proh hơmet vă hơnơ̆ng pơm kơtoei khul jang, hơnih jang. Minh tơdrong dơ̆ng mă bơ̆n kăl hơlen hơdăh ‘noh jĭ găh khul bơ̆ jang, tơgŭm ăn kơ bơ̆n kơtoei khul jang trŏ lăp hăm tơdrong tơdrong ‘meh vă atŏk tơ iung atŭm.

Kiơ̆ đơ̆ng yă Nguyễn Thị Tú Thanh, Kơ iĕng Kơdră hơnih vei lăng Khul kơdră tơring găh Hơnih tơm Nội vụ, ‘nou jĭ tơdrong tôch gĭt kăl, đei ƀơm truh hăm hơnih jang, tơdrong jang tơ̆ tơring. Kơ yuơ lơ loh, tơdrong tơ iung pơjing Tơdrong tơchơ̆t găh pơgơ̆r bơ̆ jang kơ pơlei pơla, koeng kơphô̆ păng mĭnh trong tơgum djru hăm dôm bơngai bơ̆ jang ưh kơ joăt jang tơdrong ‘noh hlôi đei hơlen tôch kơ brĕ păng đei pơlăp lơ̆m tơdrong pơm kơtoei khul bơ̆ jang, iŏk yoa ‘lơ̆ng khul jang, trŏ lăp hăm kĕ tơlĕch kon jên bơ̆ jang teh đak kơ tơring.“Jang kiơ̆ trong bơ̆ jang đơ̆ng Đảng găh proh hơmet thôn pơlei, koeng kơphô̆, Hơnih tơm Nô̆i vŭ hlôi đei Khul kơdră chĕp pơgơ̆r Teh đak pơjao pơm tơm chĕp pơgơ̆r tơ iung pơjing Tơdrong tơchơ̆t găh khul jang păng tơdrong jang kơ thôn pơlei, koeng kơphô̆ păng kon jên khei hăm dôm bơngai jang ưh kơ joăt jang tơdrong jang ‘noh pơm trong kơnăl vă rim tơring tơlĕch jang kiơ̆ lơ̆m khei năr kơnh. Trong pơchoh ăn atŭm lơ̆m proh hơmet thôn pơlei, koeng kơphô̆ ‘noh kiơ̆ trong pơm kơtoei hơnih jang, pơm kơtoei thôn pơlei, koeng kơphô̆ păng sơđơ̆ng trŏ lăp hăm trong jang yan ou, hăm kiơ̆ kơ tơring păng đơ̆ng noh pơm hơtŏk bơ̆ jang ‘lơ̆ng tơ̆ tơring, pơjing rơvơn ăn tơdrong pơgơ̆r jang kiơ̆ rim tơdrong jang păng pơm dă ƀiơ̆ bơ̆ jang trăp lơ̆m chĕp pơgơ̆r vei lăng đơ̆ng khul kơdră chĕp pơgơ̆r tơring”.

Găh tơdrong kăl kơ tơdrong proh hơmet dơ̆ng thôn pơlei, koeng kơphô̆ tơƀôh hơdăh tơ̆ pêng tơdrong tơm dơnơm: Mă blŭng, pơm kơtoei khul bơ̆ jang ưh kơ joăt joang tơdrong jang ‘noh; Mă ƀar, akŏm khul jang tơmơ̆t jang lơ̆m pơjing tơdrong oei sa ‘lơ̆ng hơ iă; păng mă pêng, pơm hơtŏk kĕ vei lăng năng tông kơ kon pơlei pơla. Mă lei, rim tơdrong tơplih găh tơdrong bơ̆ jang, dôm tơdrong ou to jĭ lăng truh mĭnh tơdrong kăl hloh: ‘Noh pơvih pơvăn ăn kon pơlei ‘lơ̆ng hơ iă gloh. Mưh hơgrop, măt bơngai kon pơlei tŏk lơ, tơdrong rơih bơngai chĕp kơ̆l thôn pơlei, koeng kơphô̆ gô đei hơlen kơjăp hloh dơ̆ng. ‘Noh jĭ dôm bơngai tơpă oei sa ‘lơ̆ng, jang hơgei, tơnăp, tơjê̆ kon pơlei, kơ yuơ kơ kon pơlei. Ƀok Nguyễn Tiến Dĩnh, sơ̆ jang Kơ iĕng Kơdră chĕp pơgơ̆r Hơnih tơm Nô̆i vŭ akhan:“Kăl tơlĕch jang mă hơdăh păng hơnăp jang kơtang, iung jang mă kơtang, bơ̆n kăl tơ iung pơjing trong tơlĕch jang mă mă ‘lơ̆ng, hơlen mă brĕ. Păng đơ̆ng rŏng hơgrop thôn pơlei păng koeng kơphô̆ gô tih să hloh ‘noh găh tơdrong bơ̆ jang jei gô lơ hloh dơ̆ng. Kơna bơngai chĕp kơ̆l thôn pơlei păng koeng kơphô̆ jei kăl bơ̆ jang tơnăp hloh dơ̆ng. Mă ƀar ‘noh tơklep hăm pơjao tơdrong gơh jang ăn thôn trơng, pơlei păng koeng kơphô̆ trŏ lăp hăm tơdrong tơchơ̆t đơ̆ng kơdră kơpal”.

Tơdrong jang keh đang proh hơmet thôn pơlei, koeng kơphô̆ lơ̆m jăl 2 sơnăm ou ‘noh mĭnh tơdrong jang chinh trĭ tôch gĭt kăl, kăl đei lăp mĭnh ƀơ̆r đon kơtang đơ̆ng Nơ̆r Đảng truh hăm jơhngơ̆m đon kon pơlei. Mă đơ̆ng tơdrong tơplih yă kiơ jei ưh kơ kĕ veh ver đei dôm tơdrong mơnat tat ‘măng blŭng, mă lei, hăm trong chĕp pơgơ̆r pơrô̆ jang kơtang đơ̆ng Trung ương, tơdrong hơmet ăn tôch brĕ, ‘lơ̆ng hơ iă đơ̆ng khul kơdră tơring atŭm hăm jơhngơm đon hlôh vao đơ̆ng kon pơlei, ưh kơ jor đơ̆ng rŏng proh hơmet, thôn pơlei, koeng kơphô̆ gô iung jang ‘lơ̆ng hơ iă, trŏ lăp atŭm hăm khul kơdră chĕp pơgơ̆r tơring ƀar kâp, đơ̆ng ou pơjing đei tơdrong rơvơn ăn atŏk tơ iung trong hnam, vei lăng tơpôl tơ̆ tơring.