Hrei ou, đe hơ ioh iŏk yoa Internet păng mạng tơpôl đơ̆ng hrôih. Tơdrong hŏk pơhrăm, chă lăng ngôi dăh mă chă pơma dơnuh trư̆k tuyên pơm ăn rim đe oh ƀônh pơtruh dih băl rup, hơnih oei, hnam trương hŏk dăh mă dôm tơdrong kơdih ou to mă lei tim mă băt hlôh găh tơdrong hơmơt đe pơm tơdrong ou to. Tơdrong tơtăm hloh ‘noh đe hơ ioh bơh ƀơm hlôi jing bơngai răm kơ đe chă hơlĕnh pơdăr, pơm kơnê̆ truh tơdrong oei sa dăh mă mơ̆t iŏk yưh lĭu vă pơm tơdrong kơnê̆. Ưh khan lăp hơdrô̆ đe hơ ioh mălei truh hloi đe mĕ ƀă jei joăt chă tơmơ̆t rup, video păng dôm tơdrong ou to kơ kon hơ ‘lơ̆p lơ̆m mạng mă oei ưh kơchăng truh tơdrong hơmơt đei tơdrong ou to. Lăp đơ̆ng rup hruk hơbĕn ao hŏk pơhrăm, bơngai anai băt hloi hok tro ou hŏk tơ̆ hnam trương ayơ, tơring oei sa tơ̆ yơ dăh mă jơ ‘năr chă yơ yak kơ đe hơ ioh. Kiơ̆ rim khul joăt jang vei lăng sơđơ̆ng mạng, dôm yưh lĭu ngêh ngăi ưh kơ đei tơdrong ou mă lei tơdăh huŏng lơ̆m tơmang ti khul kơnê̆ gô pơm đei tơdrong răm.

Kơ yuơ lơ loh, tơdrong tơchơ̆t găh vei lăng yưh liu kơdih kơ đe hơ ioh lơ̆m Khôi luơ̆t vei lăng yưh lĭu kơdih đei ƀơm tôch kơtang păng rim jang, hơnih mơdro sa kăl kơchăng kơtang lơ̆m jang kiơ̆. Luật sư Nguyễn Đức Long - bơngai iŏk đei Hla bơar tơchơ̆t apŭng plĕnh teh găh vei lăng hrĕp păng dôm tơdrong kơdih yưh lĭu, pơma hơdăh:“Mưh đe hơ ioh đơ̆ng 7 sơnăm năm tơ̆ ‘lŏ kăl đei đe hơ ioh hăm bơngai tang măt drơ̆ng nơ̆r mă gơh chă tơƀôh tơbăt hơdăh dôm tơdrong oei sa ou to kơ bơngai hơ ioh ‘noh. Tơdrong tơbăt ăn dôm oei sa kơ rim bơngai, tơdrong hrep kơ dih kơ bơngai mă ‘noh jĭ tôch lơ. ‘Noh jĭ găh hơnăn, sơnăm rơneh, rup, hơnih oei kơ đe hơ ioh ... adoi jĭ tơdrong kơtơ̆ng ang kơdih kơ bơngai ‘noh. Kĭ pơkăp răt ƀao hiêm ăn đe hơ ioh pơtih ăn, bơ̆n apdôm tơdrong kơtơ̆ng ang lơ̆m oei sa kơ bơngai ‘noh lei rim bơngai dăh lăng mă hơlen vă veh ver đei tơdrong pơm glăi”.

Kiơ̆ Apăng 24 kơ Khôi luơ̆t Vei lăng yưh lĭu kơdih, tơdrong iŏk yoa yưh lĭu kơdih kơ đe hơ ioh kăl pơm kiơ̆ ‘lơ̆ng lơ̆m tơdrong đei vei lăng ‘lơ̆ng hơ iă ăn đe hơ ioh. Hăm đe hơ ioh tôm 7 sơnăm năm tơ̆ ‘lŏ, mưh iŏk yoa yưh lĭu đei ƀơm truh tơdrong oei sa dăh mă tơdrong hrĕp kơdih, kăl đei đe hơ ioh păng mĕ ƀă dăh mă bơngai tang măt drơ̆ng nơ̆r ‘mơ̆i mă gơh. Tơdrong mă ou jĭ lei lăi hăm tơdrong rim hơnih jang, hơnih mơdro sa dăh mă kmăi kmŏk ưh kơ gơh chă iŏk yoa dôm kơtơ̆ng ang đe hơ ioh mơ̆ng ‘meh vă nhen sơ̆ bơih. Tơdrong tơchơ̆t ‘nao đei tơƀôh hơdăh khôi luơ̆t lăng truh tơdrong vei lăng năng tông đe hơ ioh, yom kiơ̆ tơdrong kơdih kơ đe hơ ioh lơ̆m kmăi kmŏk kơsô̆.

‘Ngoăih kơ ‘noh, Khôi luơ̆t Vei lăng yưh lĭu kơdih jei tơlĕch ăn nơ̆r pơkoel tôch kơtang hăm hơnih mơdro sa lơ̆m tơ iung pơjing vei lăng hrĕp, vei lăng, adoi nhen sut hŭt yưh lĭu kơdih. Ƀok Phạm Hoàng Lâm - Bơngai joăt jang apŭng plĕnh teh găh vei lăng sơđơ̆ng kơtơ̆ng ang, tơbăt:“Khôi luơ̆t tơchơ̆t, yưh liu kơdih lăp đơ̆ng rŏng xut hŭt gô pă đei lăng akhan yưh lĭu kơdih păng kơ yuơ lơ loh pă đei găh lơ̆m tơdrong hơmet ming kơ khôi luơ̆t ou. Kiơ̆ khôi luơ̆t, xut hŭt ou jĭ xut hut hloi vă pơjing yưh lĭu ‘nao păng đơ̆ng noh pă đei ƀôh hloi bơih găh yưh lĭu so ou. Lăp đơ̆ng rŏng lăng hơlen rim tơdrong pơkăp kơ Khôi luơ̆t Vei lăng yưh lĭu kơdih sơnăm 2025 păng mă kăl ‘noh Apăng 14 đei ƀơm truh sut hŭt, hŭt hloi hơnih plôih, kiơ̆ kơ nhôn ‘noh Khôi luơ̆t nhen lĕ lăng truh tơdrong tơchơ̆t ôn hơnăn yưh lĭu, tơplih ăn lăp xut hŭt ƀôh kơnăl”.

Hăm yưh lĭu kơ đe hơ ioh - dôm bơngai kăl vă vei lăng năng tông git kăl - tơdrong vei lăng sơđơ̆ng yưh ĭu đei ôn hơnăn sơđơ̆ng sa roi jing tơdrong gĭt kăl hloh, vă pơm dă ƀiơ̆ đe nai gơh mơ̆t lăng iŏk yoa glăi lơ̆m kmăi kmŏk kơsô̆. Dôm tơdrong hle ou đei ƀôh Khôi luơ̆t Vei lăng yưh lĭu kơdih tŏk bŏk roi năr roi tơ iung pơjing vă lei lăi hăm teh đak đe găh vei lăng năng tông dôm tơdrong kơdih kơ rim bơngai, lơ̆m ou ‘măn tơdrong lăng ba gĭt kăl hloh hăm đe hơ ioh.