Tơbăt tơ̆ hop akom, Kơdră Hơnih bơ̆ jang vei lăng kơdră tang măt Nguyễn Hữu Đông tơbăt, lơ̆m jăl jang ou ki, Jơnum vei lăng kon pơlei kâp dêh char lơ̆m teh đak hlôi pơgơ̆r 1.950 ‘măng hop akŏm. Lơ̆m ou đei 1.281 ‘măng hop akom vă tơtom xek tơlang rim tơdrong đei ƀôh ‘nao nhen jĭ jăn, tơmơ̆t jên jang, teh đak tơmơ̆t jên jang pang hơmet pơ ‘lơ̆ng khul kơdră chĕp pơgơ̆r đơ̆ng rŏng proh hơmet tơring. Jơnŭm vei lăng kon pơlei rim tơring hlôi pơjing đei hloh 30.800 tơdrong tơchơ̆t, pơjing đei trong tơchơ̆t khôi luơ̆t gĭt kăl ăn atok tơ iung muk dram-tơpôl, sơđơ̆ng tơdrong hơrih sa păng tơgŭm djru ăn kon pơlei tơ̆ tơring. Lơ̆m teh đak hlôi pơgơ̆r hloh 4.000 khul bơ̆ jang năm dăr lăng, tơgoăt iŏk hloh 36.000 nơ̆r tơgop đơ̆ng bơngai tăh hla hăm xek tơlang keh đang jơnei hloh 86%. Tơdrong jang apinh hơlen, tơl hơdăh roi năr roi tơpăt, akom pơm hơdăh hơnăp jang kơ rim hơnih bơ̆ jang păng rim bơngai đei ƀơm truh. Kơdră Hơnih bơ̆ jang vei lăng kơdră tang măt Nguyễn Hữu Đông sơkơt hơdăh:“Tơdrong jang kơ Jơnum vei lăng kon pơlei rim kâp roi năr roi tơpăt, tơpă, ‘lơ̆ng hơ iă pang jơnei, đei lơ tơdrong tơplih ‘nao lơ̆m đon tơchĕng pang bơ̆ jang. Đơ̆ng noh, hơnơ̆ng sơkơ̆t hơdăh hơnih dơưng, hơnăp jang kơ hơnih bơ̆ jang teh đak tơ̆ tơring lơ̆m khul bơư jang chinh trĭ”.

Sơkơ̆t hơdăh hơnăp jang vei lăng tơdrong bơ̆ jang gĭt kăl kơ Jơnum vei lăng kon pơlei, ƀok Đồng Văn Thanh, Kơ iĕng kơdră chĕp pơgơ̆r Đảng pơlei tơm, Kơdră chĕp pơgơ̆r Jơnum vei lăng kon pơlei kơ pơlei tơm Cần Thơ akhan, tơdăh tơdrong bơ̆ jang ưh kơ đei vei lăng kơjăp gô pơm ăn pơjĭp, veh ver chiu pŭ dăh mă pơm ăn ưh kơ đei jơnei tơdrong bơ̆ jang. Kơ yư lơ loh, Jơnŭm vei lăng kon pơlei kơ pơlei tơm hlôi tơlĕch lơ trong jang ‘moi kiơ̆ tơdrong bơ̆ jang pơjing tơdrong tơchơ̆t, dăr lăng, pơjao gơh jang păng tơƀơ̆p pơma  dơnuh hăm bơngai tăh hka.“Kiơ̆ đơ̆ng tơdrong bơ̆ jang đei ƀôh, minh ƀar Khul kơdră tang măt pang bơngai tang măt năm dăr lăng yan ou minh ƀar nơ̆r tơgop đơ̆ng bơngai tah hla đơ̆ng rŏng ‘măng tơƀơ̆p pang tơroi tơbăt ăn hơnih bơ̆ jang kơpal ‘noh tơdrong xek tơlang gô tĕnh koăng, keh đang hrôih, bơngai tăh hla jei tôch lăp đon pang tơdrong lăng ba đơ̆ng khul kơdră chĕp pơgơ̆r rim kâp. Kơ yuơ lơ loh, dôm nơ̆r tơgop trŏ lăp đơ̆ng kon pơlei jei jing minh trong vei kơjăp tơdrong bơ̆ jang, kăl đei dăr lăng, pơrô̆ athei xek tơlang tơtom, tơgop pơm hơtŏk bơ̆ jang jơnei lơ̆m vei lăng the đak pang hơmet pơ ‘lơ̆ng jơhngơ̆m đon lui yom đơ̆ng Kon pơlei hăm khul kơdră tơring”.

Tơ̆ Hop akŏm, yă Phạm Thị Thanh Trà, Kơ iĕng Thủ tướng Teh đak tơlĕch ăn 5 tơdrong jang kăl vă pơm hơtŏk iŏk đei jơnei hloh dơ̆ng lơ̆m tơdrong bơ̆ jang kơ Jơnum vei lăng kon pơlei jăl jang 2026 - 2031. Lơ̆m ou sơkơ̆t hơdăh tơplih ‘nao jơhngơ̆m đon chĕp pơgơ̆r kiơ̆ trong iŏk kon pơlei păng hơnih mơdro sa jĭ tơdrong kăl hloh; atŏk kơtang pơjao jang tơklep hăm vei lăng gơh jang; pơtruh kơtang tơplih kơsô̆, vei lăng hăm yưh lĭu păng AI; hơmet pơ ‘lơ̆ng tơdrong bơ̆ jang; pơm hơtok kĕ jang dăr lăng tơdrong jang kăl pang tơbăt hrôih rim tơdrong hơmơt pơm kơnê̆ truh atŏk tơ iung:“Bơ̆ jang dăr lăng kơ Jơnum vei lăng kon pơlei kăl tơplih kơtang đơ̆ng tơdrong dăr lăng hơlen trong jang atok tơ iung kăl; tơplih đơ̆ng dăr lăng kiơ̆ joăt jang jing dăr lăng dôm tơdrong jang keh đang lơ liơ, lăng kơjăp lơ̆m dôm tơdrong đei jou gô đei tơdrong nhen tơmơ̆t jên jang đơ̆ng teh đak, groi the, pơprŏ jang, tơplih bơ̆ jang. Tơdrong kăl hloh ‘noh pơm hơtŏk kĕ jang tơdra băt hrôih, ƀôh hrôih, xek tơlang hrôih rim tơdrong hơmet đei tơdrong đơ̆ng tơring hloi”.

Pơma pơtôch tơ̆ Hop akŏm, Kơdră chĕp pơgơ̆r Kuôk hô̆i Trần Thanh Mẫn pơma hơdăh, lơ̆m khei ‘năr tơplih ‘nao, Jơnum vei lăng kon pơlei rim kâp kăl hơnơ̆ng tơplih ‘nao kơtang hloh dơ̆ng vă trŏ lăp hăm tơdrong ‘meh vă atŏk tơ iung kơ teh đak. Tơdrong bơ̆ jang kơ Jơnum vei lăng kon pơlei kăl lăng kơjăp jang kiơ̆ ‘lơ̆ng trong tơlĕch jang đơ̆ng Đảng, jang kiơ̆ ‘lơ̆ng tơpăt, atŏk kơtang tang găn hơlou, iung tơjră tang găn sa pơgơ̆m pơjĭp, pơhoach brăh brư, pơm tơdrong glăi păng iŏk tơdrong tơdrong lăp đon đơ̆ng kon pơlei, hơnih mơdro pơm ‘long pơtŏ jang ‘lơ̆ng.“Jơnŭm vei lăng kon pơlei rim kâp atŏk kơtang tơdrong chĕp pơgơ̆r đơ̆ng Đảng hăm tơdrong pơgơ̆r păng bơ̆ jang kơ Jơnum vei lăng kon pơlei, ‘nou jing tơdrong kăl hloh. Bơ̆ jang kơ Jơnum vei lăng kon pơlei iŏk đei jơnei mưh jang kiơ̆ ‘lơ̆ng, kiơ̆ ƀlep rim trong tơlĕch jang, tơdrong tơchơ̆t đơ̆ng Đảng, pơjing tơdrong tơlĕch jang chinh trĭ đơ̆ng Đảng jing trong jang tơm kơ khul kơdră chĕp pơgơ̆r tơring. Hơnơ̆ng tơlĕch jang kiơ̆ kơtang jơnei trong bơ̆jang đơ̆ng Đảng găh tơ iung pơjing Teh đak pháp quyền xã hội chủ nghĩa, tơplih ‘nao trong bơ̆jang khul kơdră chĕp pơgơ̆r tơring păng jang kiơ̆ ‘lơ̆ng trong jang hơtŏ hơnơ̆ng Xã hội chủ nghiã. Tang găn sa pơgơ̆m pơjĭp, pơhoach brăh brư. Tơdrong lăp đon đơ̆ng kon pơlei, hơnih mơdro sa jĭ ‘long pơtŏ jang ‘lơ̆ng hăm tơdrong bơ̆jang kơ Jơnum vei lăng kon pơlei”.