Kiơ̆ kơ ‘noh, tơdrong sir tơchă, năm tơchă gô đei iung jang lơ̆m 3 jăl. Jăl mă 1 đơ̆ng năr 6/6 truh năr 20/6, rim khul akom iung jang kôch tơchă tơ̆ rim bro teh lơ̆m cham Pơsat teh đak phương Đắk Cấm păng tơchă hơlen bro trong Trường Chinh đơ̆ng kơsô̆ hnam 206 truh kơsô̆ hnam 282. Jăl mă 2 đơ̆ng năr 21/6 truh năr 25/7, pơih să sir tơchă tơ̆ rim jăl uơ oei kơ trong gre Trường Chinh găh dôm bro đei jou. Jăl mă 3, đơ̆ng năr 26/7 truh đĭ sơnăm 2026, akŏm dăr lăng, tơchă păng kôch akŏm tơ̆ rim hơnih hle kiơ̆ nơ̆r tơbăt đơ̆ng kon pơlei, ƀô̆ đô̆i so dăh mă rim hơnih bơ̆ jang tơbăt ăn. Jơ ‘năr iung jang kăl pơm kiơ̆ ‘lơ̆ng trong jang “Băt hơdăh truh dang yơ jang truh dang noh, bônh iung jang hơdrol, tơnap jang đơ̆ng rŏng, ‘mơ ‘mĕng, hơlen”, sơđơ̆ng ‘lơ̆ng hơ iă găh bơngai, gre kmăi kmŏk, trong nơnăm, sơđơ̆ng dơ̆ng kơjăp păng sơđơ̆ng trong nơnăm. Dôm năr ou ki, Khul K53 hlôi iung jang chor pơnang tơ̆ jih trong, ‘moi kiơ̆ trong gre Trường Chinh, phương Đăk Cấm. Hơdrol kơ ‘noh, Khul K53 hlôi sir pơnang lơ̆m cham Pơsat teh đak phương Đăk Cấm, kôch hloh 1.000m3 teh chă lăng hơlen mĭnh ƀar hơnih rŏ năng đei ƀơm truh bro đei pơsat ƀô̆ đô̆i lôch dŏng teh đak, pơvih pơvăn ăn năm tơchă, kôch akŏm.