Jơnŭm pơgơ̆r jang 515 dêh char Lâm Đồng hlôi pơjing đei 5 khŭl pơm jang vă iŏk akŏm păng pơjao kơcheh kơting tam mă băt hơdah hơnăn măt tơ̆ dôm pơsat ƀlŏk tơbăt lơ̆m tơring. Dêh char Lâm Đồng dang ei đei 12 pơsat ƀlŏk tơbăt kơ linh lôch tang, lơ̆m noh 11 pơsat kăl iŏk akŏm păng pơjao kơcheh kơting linh lôch tang. Lơ̆m pơsat linh lôch tang tam mă băt hơdah hơnăn măt kăl kơ iŏk kơcheh kơting noh 4.845 hơnih ƀŭ.

Pơsat linh lôch tang ăn teh đak tơ̆ xah Đức Linh đei rơih jĭ hơnih pơtơm jang mă blŭng lơ̆m tơdrong iŏk akŏm păng pơjao kơcheh kơting păng chih tơmơ̆t lơ̆m kơmăi kơsô̆ dôm kơcheh kơting ou vă băt hơdah păng pơih să pơm jang lơ̆m dêh char. Tơ̆ ou, rim hơnih tơlĕch jang iŏk akŏm 55 kơcheh kơting, vei lăng 'lơ̆ng păng pơjao kiơ̆ trŏ tơchơ̆t tơlĕch; atŭm hăm noh chih tơmơ̆t lơ̆m kơmăi kơsô̆ vă 'măn ăn tơdrong jang vei lăng păng hơlen sơkơ̆t hơdah ADN.