Hơnih bơ̆jang chĕp pơgơ̆r Kuô̆k hô̆i lăng hơlen, pơdrơ̆ng kiơ̆ 2 tơdrong Tơchơ̆t đei ƀơm truh tơdrong jên hu, kon jên bơ̆ jang păng trong vă pơjing Trong pơprŏ vă jang dăr lăng “Tơdrong jang kiơ̆ bơ̆ jang, khôi luơ̆t găh vei lăng, iok yoa hơnih bơ̆ jang đơ̆ng rŏng jang kiơ̆ trong jang proh hơmet hơnih jang, khul jang păng tơring tơrang”.  Kơdră chĕp pơgơ̆r Kuô̆k hô̆i Trần Thanh Mẫn pơma hơdăh:“ ‘Nou jĭ tơdrong bơ̆jang dăr lăng ‘măng mă blŭng kơ Kuô̆k hô̆i jăl XVI; kơ yuơ lơ loh, bơ̆jang hơmet ăn kăl đei iung jang kơjăp, trŏ lăp păng khoa hŏk đơ̆ng jơ ‘năr iung jang blŭng a hloi. Mă kăl, bơ̆jang dăr lăng ou kăl tơklep kơjăp hăm rim nơ̆r pơrô̆ iung jang kăl đơ̆ng Trung ương găh tang găn hơlou, iung tơjră phă pơrăm brăh brư păng pơm tơdrong glăi, mă kăl tơdrong Tơchơt kơsô̆ 4 kơ Trung ương. Hrei ou, tơdrong vei lăng, iŏk yoa hơnih bơ̆ jang đơ̆ng rŏng jang kiơ̆ proh hơmet hơnih jang, khul jang păng tơring tơrang tŏk bŏk đei tơpôl kon pơlei pơla lăng tông nông gia tôch kơtang”.

Ăn tơgop nơ̆r găh bơ̆ jang pơvih pơvăn khei 5, Khul kơdră chĕp pơgơ̆r Hơnih bơ̆ jang Pơvih pơvăn păng Dăr lăng athei Khul kơdră chĕp pơgơ̆r Kuô̆k hô̆i athei Khul kơdră chĕp pơgơ̆r Teh đak, Thủ tướng Teh đak pơrô̆ rim Hơnih tơm, hơnih bơ̆ jang păng rim tơring atok kơtang dăr lăng kơjăp dăh găh đak xăng sinh học E10, atŏk kơtang bơ̆jang tơroi tơbăt, pơrô̆ pơrôp vă pơjing đei drơ̆ng mĭnh nơ̆r lơ̆m tơlĕch jang; atŏk kơtang bơ̆ jang dăr lăng, păng jang hơdoi kơjăp hăm Hơnih vei lăng kon pơlei kơ pơlei tơm Hà Nội lơ̆m tơdrong tơlĕch jang, jang kiơ̆ rim Tơdrong vă jang tơm lơ̆m pơlei tơm. Lơ̆m ou kăl đei trong bơ̆jang hơdăh vă tơlĕch jang kiơ̆ rim tơdrong vă jang pơvih pơvăn ăn pơjing hơnih oei ‘nao vă pơm sơđơ̆ng tơdrong hơrih sa păng jang sa ăn kon pơlei lơ̆m tơring đei ƀơm truh đơ̆ng Tơdrong vă jang. Găh tơdrong ou, Kơdră chĕp pơgơ̆r Hơnih bơ̆ jang Khoa hŏk păng Cham char Nguyễn Thanh Hải akhan, hla bơar chih tơbăt tơdrong bơ̆ jang kăl tơmơ̆t dơ̆ng găh tơdrong hơlĕnh pơdăr tŏk bŏk đei ƀôh kơtang lơ̆m khei ‘năr tơjê̆ ou, ‘noh tơdrong pơhlŭ pơdôr, pơgŏ pơđep dôm bơngai kră, bơngai pơdơ̆h bơ̆ jang kĭ rim tơdrong pơkăp dih băl pơdơ̆h pơdei vă tơbăt ăn kon pơlei kơchăng, adoi athei rim tơring đei trong xek tơlang pơ ‘lơ̆ng ăn tơdrong mă ou:“Prăt jơhnơr hơrih đe chă pơđom đăi đei dôm yơ, nhen lĕ pơ ‘nhŏ pơgŏh ăn kŏng ty hơlĕnh pơdăr ou. Kơ yuơ lơ loh, lơ̆m tơbăt kơchăng jei kăl đei dôm tơdrong ou tôch kơ hle păng tôch kơ kăl. Kơ yuơ lơ loh, lơ̆m hla bơar tơbăt bơ̆jang jei kăl đei chih tơmơ̆t hloi tơdrong ou. Jei apĭnh athei rim hơnih bơ̆jang lơ̆m tơring, dêh char ayơ, bơ̆n hăm đei kơtơng nơ̆r chă tơkêng ưh păng bơ̆jang vei lăng, xek tơlang lơ liơ”.

Lăng kơjăp truh tơdrong pơtho pơhrăm, Kơdră chĕp pơgơ̆r Hơnih bơ̆jang vei lăng oei sa joh ayŏ, Pơtho pơhrăm Nguyễn Đắc Vinh tơbăt, sơ̆ trong bơ̆ jang Teh đak lăp tơ jur, ưh kơ iŏk jên hŏk pơhrăm hăm minh ƀar tơdrong jang nhen khul ƀô̆ đô̆i kŏng ang, sư phạm.“Mĭnh ƀar tơdrong jang gĭt kăl mă kon pơlei tim mă băt truh nhen ŭnh hơyuh hạt nhân tŏk bŏk ‘meh vă tơchă bơngai jang lơ, mă lei trong bơ̆ jang tơgum djru đơ̆ng teh đak tim mă tơgăl kơna đe tim mă ‘meh vă mơ̆t-mă lei ‘nou jing tơdrong jang kăl hloh, kơna trong bơ̆jang tơgŭm djru đơ̆ng teh đak kăl tơgŭm djru păng mă hơdăh ‘noh ăn hŏk đĕch, ‘nou jĭ tơdrong kăl pơrô̆ tơbăt jơ̆p jang lơ̆m kon pơlei vă kon pơlei băt, đei dơ̆ng tơdrong rơih mơ̆t hok pơhrăm tơdrong jang, đei tơdrong rơih trŏ lăp vă tơmơ̆t dơ̆ng khul bơư jang ăn ăn teh đak”.

Iung pơma tơ̆ jơ hop akŏm, Kơdră chĕp pơgơ̆r Kuô̆k hô̆i Trần Thanh Mẫn hôn bơnê kơtang Hơnih bơ̆ jang Pơvih pơvăn păng Dăr lăng hlôi đei lơ tơdrong tơplih ‘nao lơ̆m trong pơm tơlĕch hla bơar chih tơbăt tơdrong bơ̆ jang; adoi athei rim khei, Hơnih ou iung jang hơdoi hăm Mặt trận Tổ quốc, hơnih băt hơdăh jơhngơ̆m đon hơpơi ‘meh vă, nơ̆r athei đơ̆ng kon pơlei vă pơm hơtŏk kơtang ‘lơ̆ng hloh dơ̆ng lơ̆m hla bơar chih tơbăt tơdrong bơ̆jang. Kơdră chĕp pơgơ̆r Kuô̆k hô̆i Trần Thanh Mẫn pơkă:“Bơ̆jang pơvih pơvăn ăn kon pơlei kăl ‘lơ̆ng hơ iă hloh, ưh khan lăp pơdơ̆h ƀơ̆t sơng kon pơlei, xek tơlang đang hla bơar, pơtruh ăn kơdră kơpal dôm nơr apĭnh athei đơ̆ng kon pơlei. Mă ĭnh ‘meh vă bơ̆ jang pơvih pơvăn ăn kon pơlei jĭ hơnih băt hlôh ƀôh hơdăh hrôih jơhngơ̆m đon kon pơlei, jĭ hơnih tơƀôh tơbăt trong bơ̆jang, jĭ ‘long pơtŏ ‘lơ̆ng bơ̆jang chĕp pơgơ̆r teh đak. Ĭnh athei lơ̆m khei năr kơnh lăng kơjăp 05 tơdrong. Mă mĭnh ‘noh, ưh kơ lê̆ bơ̆ jang pơvih pơvăn kon pơlei yak đơ̆ng rŏng dôm tơdrong tơtok đơ̆ng kon pơlei. Bơ̆n kăl chă trĕng lăng năng tông tơdrong păng iung pơma hơdrol. Mă ƀar ‘noh, tơl nơ̆r bơngai tăh hla chă apĭnh mă hơdăh tơpă hloh, ƀlep hloh. Tơblang hơdăh tơdrong ‘noh jĭ ‘lơ̆ng tơpă mơ̆n, mă lei ‘long pơtŏ jang ‘lơ̆ng tuch luch ưh khan hla bơar tơblang hơdăh nơ̆r apĭnh, mă lei tơdrong ou hăm kĕ hơmet pơ ‘lơ̆ng ưh, kon pơlei hăm lăp đon ưh”.

Kơdră chĕp pơgơ̆r Kuô̆k hô̆i jei athei, dăr lăng lăng hơlen hơnih jang pơvih pơvăn kon pơlei kăl ƀlep hăm dôm tơdrong tơhlăk tơhlĭn, kăl hơlen hơdăh kiơ̆ rim tơdrong. Dôm tơdrong oei tơhlăk tơhlin kăl xek tơlang keh đang hloi, ưh kơ gơh veh ver. Tơdrong hlôi xek tơlang keh đang ƀlep khôi luơ̆t, jang keh đang hơnăp jang kơdih, pă đei dôm tơdrong tơhlăk tơhlĭn ‘nao dơ̆ng ‘noh kăl hơdrin chă pơrô̆ pơrôp, adoi vei kơjăp tơdrong tơchơ̆t, ưh kơlê̆ pơdui đunh pơm đei tơdrong ưh sơđơ̆ng dơ̆ng kơjăp; pơm hơtŏk jang ‘lơ̆ng chih tơbăt bơ̆ jang pơvih pơvăn kon pơlei; kăl tơƀôh hơdăh trong jang ƀlep, tơdrong tơm pơm ăn, hơnih ayơ chiu pŭ, tơlĕch nơ̆r athei xek tơlang lơ liơ păng trong bơ̆ jang dăr lăng hơlen đơ̆ng rŏng athei; nơ̆r athei jang khei hơdrol kăl pơrô̆ athei jang mă ‘lơ̆ng, lăng hơlen tơdrong jang ou ‘lơ̆ng kơnê̆ lơ liơ lơ̆m khei đơ̆ng rŏng hloi.