Tơroi ah hop akŏm ăn ƀôh, đơ̆ng rŏng jê̆ 8 khei pơm jang, dêh char hlôi man 'nao păng ming hơmet hloh 8.900 tŏ hnam ăn unh hnam hin dơnuh, hăm kơsô̆ jên huach jê̆ 698 tih hlj. Ƀĭ thư Tĭnh uy Nguyễn Đình Trung sơkơ̆t hơdah, tơdrong đei jơnei ou ưh hơdrô̆ tơgŭm ăn kơ rơbou unh hnam kon pơlei sơđơ̆ng anih oei xa mă oei jing trong jang kăp gĭt vă vei sơđơ̆ng pơyua ăn tơpôl, pơm trong hơtŏk tơ-iung kơjăp.

Ƀĭ thư Tĭnh uy Đăk Lăk pơgơ̆r rim jăl jang, anih jang pơtoi tơrĕk hăm tơdrong jang tơgŭm trong jang xa, hơdrin truh sơnăm 2030 noh pă đei oei unh hnam hin dơnuh. Ƀơ̆t 'măng ou, kơdră dêh char Đồng Nai pơjao 38 tih hlj tơgŭm ăn Tơdrong jang sut lê̆ hnam pơgia, hnam hyah hyok kơ dêh char Đăk Lăk.