Tơdrong jang tơmơ̆t jên jang ming man hnam hop akom kon pơlei iok yoa hloi tang găn hơlou ‘mi kial đak lip tơ̆ rim pơlei pơla lơ̆m dêh char Đắk Lắk (jăl mă 1) hăm akop kon jên tơmơ̆t jang hloh 170 ti hlak jên. Tơdrong jang vă tơlĕch jang kiơ̆ ‘lơ̆ng trong bơ̆ jang đơ̆ng Đảng păng teh đak găh atŏk kơtang kĕ tang găn hơlou, iung tơjră tang găn hăm tŏ ‘mi kial pơrăm, pơm sơđơ̆ng dơ̆ng kơ jăp ăn kon pơlei tơ̆ hơnăp tŏ ‘mi kial tơplih roi năr roi kơtang, adoi pơm pơkeh trong hnam tơring pơvih pơvăn ăn tơdrong hơrih sa kơ kon pơlei.Kiơ̆ vă jang, jăl 1 gô tơmơ̆t jên ming man 100 pơbŭng hnam hop akom kon pơlei iok yoa hloi tang găn hơlou ‘mi kial đak lip tơ̆ 27 tơring, phương. Mĭnh tŏ hnam ming man să dang 220 m², đei ming man lơ̆m hơgăt teh dă 440 m², đei 2 tăl man jơ̆ng mam pơsei kơjăp ‘lơ̆ng. Rim hnam ou gô ming man keh đang hơdrol năr 15/9/2026, tơtom tơmơ̆t iok yoa hơdrol kơ pơyan ‘mi kial hơbut hơbông pơrăm lơ̆m sơnăm ou.