Jô̆ truh ‘năr 12/8, tơ̆ Hnam trưng teh đak rong Buôn Đôn, xăh Buôn Đôn, anih jang kơpal hlôi hơlen năng dôm anih kăl kiơ̆ tơdrong hơgăt. Tơchĕng adrol, hnam trưng âu gô đei pơjao ăn Anih vei lăng kon pơlei xăh Buôn Đôn lơ̆m ‘năr 20/8. Hăm hnam trưng teh đak rong Ia R’vê, tơdrong jang ming man hlôi man đei dang 99%. Dang ei 1,2 anih iĕ oei hăt man pơkeh, tơchĕng adrol vă pơgơ̆r hơlen năng lơ̆m giĕng truh.

Oei hnam trưng teh đak rong xăh Ia Lốp man hiơ̆ ƀiơ̆ mă lei kŭm man đang hlŏh 96% bơih. Tơchĕng adrol, hnam trưng gô đei man đang adrol kơ ‘năr 20/8, pơgơ̆r hơlen năng păng pơjao đơ̆ng rŏng kơ ‘nŏh 5 năr. Dôm hnam trưng teh đak rong jăl mônh, jăl ƀar tơ̆ tơring sơlam dêh char Đắk Lắk đei man kiơ̆ nơ̆r pơtho đơ̆ng Anih tơm Chinh trĭ. ‘Nâu gô jing anih hŏk pơhrăm, oei xa kơ dang 3.100 ‘nu oh hŏk tro tơ̆ tơring sơlam kơ dêh char Đắk Lắk.