Kiơ̆ tơdrong jang sut pơđĭ hnam hiăh hiok đơ̆ng Khul kơdră teh đak, dêh char Đắk Lắk vă tơgŭm hnam oei ăn 4.285 unh hnam, hăm kơsô̆ jên man vă jê̆ 343 ti. ‘Ngoăih kơ ‘nŏh, dêh char Đắk Lắk oei vă tơgŭm pơm hơmet ming hnam ăn hlŏh 1.120 unh hnam. Tơdrong jang yoa Công an dêh char Đắk Lắk pơgơ̆r, jang hơdoi hăm khul kơdră pơgơ̆r dôm tơring tơlĕch jang đơ̆ng blŭng khei 3 păng gô man đang ƀât tŏk bŏk khei 8/2025.

Đơ̆ng rŏng hlŏh 2 giĕng tơlĕch jang sut pơđĭ hnam hiăh hlok, dêh char Đắk Lắk hlôi man hlŏh 1.000 tŏ hnam, tơchĕng adrol gô man đang lơ̆m khei 4 truh âu kơnh. Dôm tơdrong jang oei đei dơ̆ng vă hơnơ̆ng bơ̆ jang, khŏm man đang adrol kơ ‘năr 15/8/2025. Krông Bông jĭ 1 lơ̆m dôm apŭng hơtăih yăih, tơnuh hin hlŏh kơ dêh char Đắk Lắk. ‘Măng mă âu, apŭng đei 513 unh hnam pơmat tat găh hnam oei đei tơgŭm man hnam ‘nao, hăm kơsô̆ jên hlŏh 41 ti; păng 96 unh hnam nai đei tơgŭm 2,88 ti hlak jên vă pơm hơmet ming hnam oei.