Đơ̆ng blŭng jăl jang truh dang ei, Kuô̆k hô̆i hlôi pơjing 99 khôi luơ̆t, 165 tơdrong tơchơ̆t, tơbăt hơdăh tôm tong tơdrong jang mŭk drăm, tơpôl, vei lăng sơđơ̆ng teh đak, sơđơ̆ng tơring, jang tơbôl, tang găn sa pơgơ̆m pơjĭp, pơhoach brăh brư; pơjing hơyak kơjăp iăp kơtang ăn tơdrong tơ iung pơjing tơdrong jang chinh trĭ kơtoei, pran kơtang, kơjăp, jơnei, tơjê̆ hăm kon pơlei, tơklep hăm kon pơlei păng pơvih pơvăn ăn kon pơlei, hơnih mơdro sa ‘lơ̆ng hơ iă hloh. Kơdră chĕp pơgơ̆r Kuô̆k hô̆i Trần Thanh Mẫn pơma hơdăh:“Mă kăl, Kuôk hô̆i hlôi pơdrơ̆ng Tơdrong tơchơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm Teh đak; hơmet ming Khôi luơ̆t Hơnih jang Kuô̆k hô̆i, Khôi luơ̆t bơ̆ jang Khul kơdră chĕp pơgơ̆r tơring; Kuô̆k hô̆i, Hơnih bơ̆ jang Kuô̆k hô̆i hlôi pơjing kiơ̆ gơh jang rim tơdrong tơchơ̆t păng proh hơmet hơnih bơ̆ jang dêh char, tơring. ‘Nou jing tơdrong tơchơ̆t tôch kơ gĭt kăl lơ̆m chăl sơnăm, đei ƀơm truh đĭ đăng khul jang chinh trĭ, truh hăm kon pơlei pơla păng pơđĭ lơ̆m tơpôl”.

Kuô̆k hô̆i jei akŏm hơmet pơ ‘lơ̆ng dôm tơdrong tơhlăk tơhlĭn găh trong tơchơ̆t vă pơjing hơyak pran ăn atŏk tơ iung mŭk drăm-tơpôl  lơ̆m chăl hle, mă kăl ‘noh tơlĕch jang kiơ̆ 4 Tơdrong tơchơ̆t kăl: Tơdrong tơchơ̆t 57 găh Khoa hŏk kmăi kmŏk, tơplih ‘nao tơchăr, tơplih kơsô̆ teh đak; Tơdrong tơchơ̆t 59 găh vang mơ̆t hơdoi apŭng plĕnh teh; Tơdrong tơchơ̆t 66 găh tơ iung pơjing păng jang kiơ̆ Khôi luơ̆t; Tơdrong tơchơ̆t 68 găh atŏk tơ iung mŭk drăm ŭnh hnam.“Kuô̆k hô̆i hlôi tơplih ‘nao trong tơ iung pơjing khôi luơ̆t kiơ̆ trong sơđơ̆ng trŏ lăp lơ̆m tơdrong bơ̆ jang vei lăng Teh đak, minh păh pơtrŭt tơchăr, hơmet pơ ‘lơ̆ng tơdrong jang pơm tơlĕch, hơmet pơ ‘lơ̆ng rim khul vă atŏk tơ iung. Hŭt hloi trong tơchĕng “Vei ưh kơ kĕ ‘noh kơ̆m”; dôm tơdrong yan ou tơplih hơnơ̆ng ‘noh pơjao ăn Khul kơdră chĕp pơgơ̆r Teh đak, tơring tơchơ̆t vă sơđơ̆ng trŏ lăp hăm trong chĕp pơgơ̆r. Atŏk kơtang pơjao jang hăm trong “tơring tơchơ̆t, tơring jang, tơring chiu pŭ”; hơmet pơ ‘lơ̆ng tơdrong bơ̆ jang pơm hla bơar, pơm tơjur kon jên jang, pơjing rơvơn ‘lơ̆ng hơ iă hloh ăn kon pơlei păng hơnih mơdro sa; jang kiơ̆ pơjao jang sơđơ̆ng trŏ lăp hăm kĕ jang”.

Kuô̆k hô̆i hlôi iung jang tôm tong, ‘lơ̆ng hơ iă păng jơnei tơdrong tơchơ̆t rim tơdrong kăl găh mŭk drăm, tơpôl, vei lăng sơđơ̆ng teh đak, jang tơbôl; sơđơ̆ng tôm tong, đei trong tơgoăt kơjăp ƀar păh tơdrong pơkoel kơ tơdrong jang păng khul bơ̆ jang. Lơ tơdrong tơchơ̆t jĭ tôch gĭt kăl, tim lăh đei, sơkơ̆t hơdăh trong bơ̆ jang lăng kon bơngai ‘noh tơm hloh, dôm trong tơlĕch jang, tơdrong iung jang jei kơ yuơ kơ kon pơlei.

Lơ tơdrong tơchơ̆t gĭt kăl hloh nhen: Tơdrong tơchơ̆t găh trong jang kăl tơ iung pơjing hnam oei tơpôl; Tơdrong tơchơ̆t găh ăn hŏk đĕch, tơgŭm djru kon jên hŏk hăm đe hơ ioh mâm non, hŏk tro jăl ƀar pêng, bơngai hŏk pơhrăm rim hnam trương teh đak; Tơdrong tơchơ̆t găh pơtho pơhrăm mâm non ăn hơ ioh mou yăo đơ̆ng 3-5 sơnăm…

Kuô̆k hô̆i jei hlôi iung jang ‘lơ̆ng hơnăp jang “Jơhngơ̆m pran hơ iă” kơ jang tơbôl nghĭ viê̆n, lơ trong bơ̆ jang tơbôl kơ Kuô̆k hô̆i hlôi tơgop jơnei lơm jang kiơ̆ trong bơ̆ jang tơbôl kơdih ‘lơ̆ng hơ iă, rơngei hiôk hian, tơgoăt tơgoăl, lơ trong jang, lơ pang vang iung jang, pơm hơtŏk bơ̆ jang ‘lơ̆ng, hơnih dơ̆ng kơ Việt Nam lơ̆m apŭng plĕnh teh đơ̆ng Đảng păng Teh đak bơ̆n. Vă hơnơ̆ng kiơ̆ yok rok jơ̆ng joăt joe 80 sơnăm kơ Kuô̆k hô̆i Việt Nam, Kơdră chĕp pơgơ̆r Kuô̆k hô̆i Trần Thanh Mẫn tơbăt:“Kuô̆k hô̆i hơnơ̆ng tơplih ‘nao tôm tong, pơm hơtŏk jang ‘lơ̆ng pơjing khôi luơ̆t, dăr lăng păng tơchơ̆t rim tơdrong kăl kơ teh đak; lăng kiơ̆ trong chĕp pơgơ̆r đơ̆ng Đảng, Kuô̆k hô̆i gô hơnơ̆ng yak hơdoi hăm Khul kơdră chĕp pơgơ̆r teh đak, MTTQ, rim hơnih bơ̆ jang tư pháp păng pơđĭ khul chinh trĭ vă tơlĕch jang kiơ̆ jơnei Khôi luơ̆t tơm Teh đak păng rim khôi luơ̆t, tơdrong tơchơ̆t hlôi pơjing. Kơrŭn đĭ ai pơgơ̆r jang kiơ̆ ‘lơ̆ng Tơdrong tơchơ̆t 66 năr 30/04/2025 đơ̆ng Hơnih tơm Chinh trĭ găh tơplih ‘nao bơ̆ jang tơ iung pơjing păng jang kiơ̆ khôi luơ̆t trŏ lăp hăm tơdrong pơkoel atŏk tơ iung teh đak lơ̆m chăl hle”.

Kơdră chĕp pơgơ̆r Kuô̆k hô̆i tơbăt, Kuô̆k hôi iung jang hơdoi pơgơ̆r jơnei Hop akŏm tih Đảng rim hơnih lăng truh Hop akom tih Đảng lơ̆m teh đak ‘măng mă 14; pơrô̆ pơgơ̆r pôk rơih Kuô̆k hô̆i jăl 16 păng Jơnŭm vei lăng Kon pơlei rim hơnih jăl jang 2026-2031.

Kuô̆k hô̆i gô iung jang keh đang rim tơdrong jang kơ Jăl jang 15, tơdrong jang ‘Măng hop akŏm mă 10 hăm lơ tơdrong kăl, lơ̆m ou, Khul kơdră chĕp pơgơ̆r teh đak gô vă pơtruh ăn 90 tơdrong kăl, đei 47 khôi luơ̆t. Pơgơ̆r Hop akŏm pơtôch tơdrong jang Kuô̆k hô̆i jăl XV. Tơ iung pơjing Pơchoh trong pơjing khôi luơ̆t jăl jang Kuô̆k hô̆i jăl 16.

Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, Kuô̆k hô̆i hơnơ̆ng sơkơ̆t hơdăh hơnih dơ̆ng, hơnăp jang jĭ hơnih tang măt tơm hloh kơ Kon pơlei, hơnih bơ̆ jang chĕp pơgơ̆r teh đak tơm hloh kơ teh đak Cộng hòa XHCN Việt Nam; jang keh đang tơtom rim tơdrong jang kăl kơ teh đak lơ̆m chăl hle.