Vă jê̆ 1.000 ‘nu kon pơlei tơring păih Hơlĕch Gia Lai hlôi vang akŏm tơdrong jang khăm hơlen plei nuih ưh kơ hoach jên yua đơ̆ng Khŭl vei lăng tơgŭm bơngai jĭ dơnuh hin dêh char jang hơdai hăm Hnam pơgang Trung ương Huế păng dôm anih jang pơgơ̆r. Kiơ̆ đơ̆ng khăm hơlen, đe ƀak si chă ƀôh 39 ‘nu kăl kơ răih jĭ plei nuih, lơ̆m noh đei 16 ‘nu hơioh gô đei tơgŭm răih đĕch ưh kơ hoach jên.

‘Ngoăih kơ tơdrong khăm păng athei răih, đe ƀak si kŭm pơtho tơƀôh vei lăng jơhngơ̆m pran, sŏng sa mă ‘lơ̆ng vă tơgŭm hơioh đei jơhngơ̆m pran sơđơ̆ng hơdrol păng đơ̆ng rŏng hơmet. Tơdrong jang khăm hơlen plei nuih ưh kơ hoach jên đei pơvei lơ sơnăm âu ki, hlôi hơnhăk ăn tơdrong hiôk chă ƀôh hrôih păng hơmet tơtom ăn rơbâu ‘nu bơngai jĭ tơ̆ Gia Lai, tơgop pơm tơ jur kơsô̆ lôch yua đơ̆ng jĭ plei nuih păng hơnhăk ăn khei ‘năr tơ̆ hơnăp ‘lơ̆ng hơiă hloh ăn hơioh dơnuh hin.