Kiơ̆ Tơchơ̆t 66/2025 đơ̆ng Jơnŭm pơgơ̆r teh đak, Gia Lai đei asong ăn hloh 1.400 tơ̆n phe ăn hloh 24.000 'nu hŏk tro, bơngai hŏk đei xa tơgŭm đơ̆ng teh đak.

Mă tơm noh hăm đe hŏk tro jăl kơđeh, THCS păng THPT tŏk bŏk oei hŏk pơhrăm tơ̆ tơring kon pơlei kon kông păng groi kông, tơring tơnap tap kơdeh, tơring đak dơsĭ achon teh; hŏk tro đei hnam oei hơtaih đơ̆ng hnam trưng, trong nơnăm tơnap tap, ưh gơh chă vih vơ̆t lơ̆m năr.

Tơchơ̆t ou adoi đei iŏk yua hăm hŏk tro kon kông, hŏk tro unh hnam hin dơnuh, păng minh ƀar bơngai đei xa tơgŭm nhen kon hơ-ioh linh lôch tang, linh jĭ rơka, hŏk tro hơven hơvo.

Hăm hŏk tro tơ̆ dôm Hơnih Pơtho tơdrong jang – Pơtho hŏk thương xuyên, tơchơ̆t tơgŭm ăn dôm bơngai đei xa tơgŭm, unh hnam hin dơnuh, kon pơlei kon kông tơ̆ tơring tơnap tap kơdêh dah mă đei hnam oei hơtaih đơ̆ng hnam trưng đơ̆ng 10 km tŏk tơ̆ kơpal.

Atŭm hăm noh, pơm kiơ̆ Tơchơ̆t 188/2026 đơ̆ng Jơnŭm pơgơ̆r teh đak, Gia Lai đei asong hloh 291 tơ̆n phe tơgŭm ăn hloh 6.800 hŏk tro. Lơ̆m kơsô̆ ou, hloh 4.200 hŏk tro oei ah kơ-'năr đei tơgŭm ăn hloh 136 tơ̆n phe; hloh 2.500 hŏk tro hŏk oei hơdoi đei tơgŭm ăn hloh 155 tơ̆n.

Đe hŏk tro ou tŏk bŏk oei hŏk tơ̆ 7 hnam trưng hŏk oei hơdoi teh đak rong 'me kơ dôm jăl hŏk tơ̆ tơring sơlam, đei dôm hnam trưng tơ̆ xah Ia O, Ia Chia, Ia Mơ, Ia Púch, Ia Nan păng Ia Dom.

Hơnih jang vei lăng kon pơlei dêh char Gia Lai pơjao ăn Hơnih vei răk tơmam drăm kơ teh đak tơring 6 chơ pơtruh pơjao tôm kơsô̆ phe 'lơ̆ng ăn dôm hơnih iŏk tơ̆ dôm xah, phương. Tơdrong pơjao athei keh đang hơdrol kơ năr 30/9.

Hơnih Pơtho Pơhrăm đei pơjao pơm tơm, jang atŭm hăm Hơnih jang vei lăng kon pơlei dôm xah, phương păng dôm hơnih jang đei tơrĕk sơng iŏk, asong tơtom, trŏ hơnih trŏ bơngai.

Tơchơ̆t tơgŭm vă tơgop pơm sơđơ̆ng ăn tơdrong hŏk pơhrăm oei xa ăn đe hŏk tro, bơngai hŏk đei tơdrong hơrih tơnap tap, mă kăl noh tơ̆ dôm tơring hơtaih yaih, tơring sơlam; kiơ̆ đơ̆ng noh tơgŭm ăn đe oh sơđơ̆ng năm hŏk pơhrăm tơ̆ hnam trưng lơ̆m sơnăm hŏk 'nao.