Hơdrol kơ noh, lơ̆m kơplah oei choh pơgar, ƀok Ksor Tân, rơneh sơnăm 1980, oei tơ̆ pơlei Sơr, ƀôh minh ƀar hlak che tăng păng kơting nhôm noh kơting linh lôch tang. Ƀok Tân hlôi tơroi hăm Jơnŭm Vei lăng khul linh xah Ia Boong păng Khul K52 vă hơlen sơkơ̆t hơdah. Đơ̆ng rŏng kơ pơih să tơring chơ chă, khul pơm jang hlôi sir kôch đei dơ̆ng 2 kơ̆l kơting linh lôch tang atŭm hăm minh ƀar tơmam yua.

Thoi noh, jô̆ truh năr 13/8, lơ̆m tŏ sĕt khei năr, Khul K52 hlôi sir akŏm đei 8 kơ̆l kơting linh lôch tang tơ̆ tơring teh kơ pơlei Sơr, xah Ia Boòng. Dang ei, dôm kơting linh lôch tang atŭm hăm tơmam drăm yua đei tơrĕk tŏk bŏk đei Khul K52 vei lăng, gô sơkơ̆t hơdah tơdrong kăl, 'măn ăn tơdrong pơkăp hơnăn măt păng pơdong grong ƀŭ kiơ̆ tơdrong tơchơ̆t.

‘Năr (13/8), khul jang sir chă đơ̆ng Anih pơgơ̆r jang “500 măng năr hơtŏk tơdrong sir chă, iŏk akŏm păng chih hơdăh hơnăn linh lôch tang ăn teh đak” tơ̆ phường Nam Nha Trang, dêh char Khánh Hòa, chă ƀôh 1 kơting đei jâu jĭ kơting linh lôch tang ăn teh đak Hnam pơgang lơ̆m hơgơp tơmo, găh Tơring kăn kư̆ kăch mang Đồng Bò.

Adrol kơ ‘nŏh, ‘năr 4/8, ƀok Nguyễn Văn Hưng, 65 sơnăm, oei tơ̆ Kueng kơphô̆ Phước Tân, phường Nam Nha Trang, tơroi ăn anih jang kơpal găh tơdrong adrol sơ̆ sư ƀôh kơting tơ̆ Hnam pơgang lơ̆m hơgơp tơmo ƀât sư năm tơ̆ bri đunh kơ âu hlŏh 20 sơnăm. Đơ̆ng nơ̆r tơroi âu, khul kăn ƀô̆, linh phường Nam Nha Trang pơgơ̆r lơ năr năm chă kiơ̆ nơ̆r tơroi đơ̆ng ƀok Hưng. Truh pơgê ‘năr 13/8, khul jang chă ƀôh 1 kơting bơngai ‘lŏ, đei jâu jĭ linh lôch tang ăn teh đak. Anih chă ƀôh hlôi đei pĕng găn, vei lăng păng tơroi ăn anih jang kơpal vă pơgơ̆r hơlen năng, pơm hơdăh kiơ̆ tơdrong hơgăt.