Tơdrong tơchơ̆t man hnam oei tơpôl kơ dêh char Gia Lai đei tơlĕch đơ̆ng sơnăm 2021. Lơ̆m kơsô̆ 20 tơdrong jang đei kĭ pơkăp, đei 6 tơdrong jang hlôi keh đang, 3 tơdrong jang keh đang minh pah, asong jê̆ 4.500 tŏ hnam oei. 10 tơdrong jang nai tŏk bŏk păng jê̆ iŏk ming man, gô asong pơhlom 7.600 tŏ hnam. Lơ̆m noh đei pơhlom 2.000 tŏ hnam gô man đang gah anih kăl dah mă gô keh đang lơ̆m sơnăm ou. Kơchĕng, truh đĭ sơnăm 2025, Gia Lai gô keh đang hloh 31% tơdrong pơkăp man hnam oei tơpôl jăl sơnăm 2021 - 2030.

Ƀok Nguyễn Hữu Quế, Phŏ Kơdră Anih jang vei lăng kon pơlei dêh char Gia Lai ăn tơbăt, dêh char tŏk bŏk oei akŏm tơlĕch dôm tơdrong jang, hơdrin keh đang 16.600 tŏ hnam kiơ̆ trŏ tơchơ̆t tơlĕch, tơgop pơm jang kiơ̆ tơchơ̆t đơ̆ng Jơnŭm pơgơ̆r teh đak gah "Asong ming man tŏ sĕt jat noh 1 triu tŏ hnam oei tơpôl ăn rim bơngai jang xa jên khei tŏ sĕt, bơngai jang tơ̆ anih jang kŏng ngĭp lơ̆m jăl sơnăm 2021 - 2030".