Hrei ou lơ̆m dêh char đei 424 tong duk rôp ka hơdang găh lơ̆m duk ưh kơ tôm rơvơn vă kĭ tơchơ̆t, ăn asong năm rôp ka hơdang dăh mă iung jang ưh kơ ƀlep hăm tơdrong apĭnh iung jang hơdrol. Đơ̆ng noh, hloh 2.100 ‘nu bơngai tơ-‘ngla duk păng dôm bơngai jang lơ̆m duk đei ƀơm ưh hơ iă. Kiơ̆ tơdrong Tơchơ̆t kơ Jơnŭm vei lăng kon pơlei dêh char Gia Lai, mĭnh tơ-‘ngla duk đei sơng iŏk tơgŭm djru 3 triu hlak jên lơ̆m 1 khei păng 30 kĭ phe lơ̆m 1 ‘nu 1 khei ăn dôm bơngai jang đei ƀơm truh, lơ̆m 4 khei. Akŏp kon jên tơgŭm djru ou dang hloh 8 ti 800 triu hlak jên đơ̆ng kon jên bơ̆ jang dêh char. Trong jang tơgŭm djru ou vă tơgŭm ăn kon pơlei rôp ka hơdang sơđơ̆ng hơrih sa, tơplih tơdrong jang trŏ lăp, adoi tơgop hơmet pơ ‘lơ̆ng nơ̆r pơkăp “kơtheh treng” kơ Hơnih bơ̆ jang Châu Âu (EC) găh rôp ka hơdang glăi khôi luơ̆t (IUU), lăng truh atŏk tơ iung tơdrong jang ka hơdang kơjăp ‘lơ̆ng păng pơm kiơ̆ tơdrong pơkăp apŭng plĕnh teh.