Prăt giĕng âu ki, hơnơ̆ng đơ̆ng pơgê hrôih, vă jê̆ 400 ‘nu kon pơlei tơ̆ xăh sơlam Ia O, dêh char Gia Lai đei măt tôm tơ̆ xăh vang hŏk, thi iŏk ƀăng hao gre hon đa A1. Jĭ tơring sơlam đei vă jê̆ 70% ‘nŏh jĭ kon pơlei kon kông, tơdrong arih xa oei đei lơ pơmat tat, yoa thoi noh tơdrong pơtho păng thi iŏk ƀăng hao gre ưh đei nôp jên kon pơlei tôch hơiă.

‘Nhŏng Ksor Thí, tơ̆ plei O, xăh Ia O ăn tơbăt: “Inh gơ̆h hao gre hon đa đơ̆ng ki bơih mă lei tam mă đei ƀăng. Đơ̆ng rŏng đei roi tơbăt, inh chih măt năm hŏk vă hlôh vao luơ̆t mưh hao gre kơdâu tơ̆ trong. Ưh jor hŏk đang, thi đei ƀăng kơdih inh hao gre kơdâu tơ̆ trong gô sơđơ̆ng ƀiơ̆.”

Vă tơgŭm ăn kon pơlei hiôk hian ƀiơ̆, dôm anih jang kơpal pơgơ̆r pơih hloi lăm hŏk kơtă tơ̆ xăh. 'Ngoăih kơ pơtho luơ̆t hao gre tơ̆ trong, kon pơlei oei pơtho tơƀôh hăm rup hao gre 'năi nhen: Hao dăr trong kơsô̆ 8, hao 'moi trong tơpăt đei sơng, pơm gơl đơk...

Yă Võ Thị Hà, Phŏ Kơdră Anih pơtho păng thi hao gre, phường Pleiku, dêh char Gia Lai ăn tơbăt, tơdrong pơih lăm hŏk tơ̆ tơring sơlam hlôi đei tơchĕng hơlen tôm tơdrong vă lăp hăm kon pơlei păng pơm 'lơ̆ng ăn rim tơdrong 'năi: “Tơlĕch roi tơƀôh 1,2 tơdrong nhen phĭn rup, pơm hla ar hô sơ ăn kon pơlei. Tơ̆ anih pơtho huơ̆r gre oei đei tơdrong tơgŭm đĕch jên hŏk ‘năi, mă loi hăm kon pơlei tơnuh, vă jê̆ tơnuh”

Kiơ̆ đơ̆ng hơlen năng, tơ̆ dêh char Gia Lai oei đei rơbâu 'nu bơngai tam mă đei ƀăng hao gre A1, akŏm lơ tơ̆ dôm xăh tơring hơtăih yăih, tơring kon kông. Thượng tá Ksor H’Bơ Khắp, Phŏ Kơdră Công an dêh char Gia Lai ăn tơbăt, vă hơmet pơ 'lơ̆ng tơdrong 'nâu, đơ̆ng blŭng sơnăm 2025 truh dang ei, Công an dêh char Gia Lai pơtho ăn khul jang kơpal vang jang hơdoi hăm dôm anoh pơtho thi hao gre, khul kơdră tơring, dôm anih jang pơgang lơ̆m dêh char păng dôm anih jang tơgŭm pơgơ̆r khăm jơhngâm pran, pơtho, thi ưh đei nôp jên, ƀơk ƀăng hao gre A1 ăn kon pơlei tơ̆ đĭ đăng tơring 'mĕh vă:

“Ưh lăp hơdrô̆ tơ̆ tơring hơtăih yăih, tơring sơlam đĕch mă jô̆ hloi dôm xăh phường tŏk bŏk mă lei oei pơmat tat kăl đei teh đak tơgŭm ‘năi. Đơ̆ng rŏng kơ ‘nŏh nhôn jang hơdoi găh dôm tơdrong đei ƀơm truh tơdrong ƀơk ƀăng hao gre. Pơgơ̆r hôp păng bơ̆ jang hăm dôm anih tĕch mơdro, dôm bơngai đei đon ‘lơ̆ng vang chih măt tơgŭm vă bơ̆ jang kiơ̆ dôm tơdrong tơgŭm ăn kon pơlei đei hŏk, thi păng đei iŏk ƀăng hao gre”

Kiơ̆ trong jang, đơ̆ng dang ei truh đĭ sơnăm 2025, Công an dêh char Gia Lai kŭm hăm dôm anih jang đei ƀơm truh tơlĕch đon pơhnŏng pơtho pơhrăm, thi păng ƀơk ăn ƀăng hao gre A1 ăn vă jê̆ 47.000 ‘nu bơngai hŏk, mă lơ ‘nŏh jĭ kon pơlei kon kông. Tơdrong jang ‘nâu oei jing trong jang gĭt kăl vă hơtŏk đon hlôh vao luơ̆t, vang tơgop găn ƀiơ̆ tơdrong pơ̆k gre tơ̆ tơring kon kông lơ̆m dêh char.