Lơ̆m dôm năr ou, pơmai H'Ly Bya, tơ̆ phương Thành Nhất, dêh char Đăk Lăk, hăt hot năm tơchă răt hla bơ-ar hŏk ăn kơ 2 'nu kon, minh 'nu hŏk lăm 1 păng minh 'nu hŏk lăm 10. Đe kon oei lơ̆m tơchơ̆t xa tơgŭm, ăn mơng hla bơ-ar hŏk noh hơdrol kơ noh unh hnam oei gô hnam trưng asong ăn, ưh kơ đei chă răt hơdrol ôh. Truh ah sơnăm hŏk 'nao pơtơm, hnam trưng ưh kơ mah hla bơ-ar hŏk ăn đe hŏk tro mơng, oei hơnih tĕch hla bơ-ar hŏk hlôi tĕch đĭ hla bơ-ar hŏk bơih:  “Chă yak năm chơ chă vơ vil vơ vil bơih. Năm tơchă truh 5, 6, 7 hơnih tĕch hla bar hŏk bơih. Lăm 1 noh đei tôm mă lei ƀok hŏk jăl 3 noh kơƀah truh 4, 5 tŏ hla bar hŏk dơ̆ng”.

Ưh hơdrô̆ mĕ ƀă hŏk tro pơvir hăm tơdrong chă hla bơ-ar hŏk, tơ̆ minh ƀar hnam trưng, minh ƀar bơngai pơtho kŭm tơchă trong vă hơmet tơdrong ưh kơ mah hla bơ-ar hŏk ăn đe hŏk tro. Kô pơtho Lê Nguyễn Phương Minh, pơtho tơ̆ Hnam trưng hŏk oei hơdoi teh đak rong 'me Jăl kơđeh  – jăl THCS Buôn Đôn, xah Buôn Đôn, dêh char Đăk Lăk ăn tơbăt: “Dang ei tơ̆ lơ lăm hŏk ayơ adoi ưh kơ mah hla bar hŏk. Đe hơ-ioh hơnơ̆ng chă mơng đơ̆ng đe 'nhŏng pơmai hŏk hơdrol vă chă yua pơgia. Đei kơƀang 2 'nu hŏk tro đei hla bar hŏk noh asong dih băl, phơ phŏ noh 3 'nu hŏk atŭm minh kơsơ̆p hla bar hŏk”.

Ƀok Thái Văn Lộc, Kơdră Hnam trưng hŏk oei hơdoi teh đak rong 'me Jăl kơđeh  – Jăl 2 Buôn Đôn ăn tơbăt, đơ̆ng rŏng kơ pơtơm sơnăm hŏk 'nao, hnam trưng oei kơƀah pơhlom 65% hla bơ-ar hŏk. Tơ̆ hơnăp, rim bơngai pơtho tơ̆ hnam trưng tŏk bŏk oei chă akŏm hla bơ-ar hŏk so đơ̆ng 'măng khuă hŏk kơ dôm sơnăm hơdrol vă hơmet pơgia. Oei dôm yơ tam tôm noh gô 'mơ̆i: “Hnam trưng pơtruh nơ̆r hăm rim hơnih in tơlĕch, dah hrôih in hơmet asong mah hla bơ-ar hŏk, mă kăl noh dôm kơsơ̆p hla bơ-ar hŏk tam mă đei tôm tơ̆ tơring hơtaih yaih, vă đe hŏk tro đei tôm hla bơ-ar hŏk pơhrăm”.

Dêh char Đăk Lăk đei pơhlom 650.000 hŏk tro đơ̆ng jăl mâm non truh jăl 3 tŏk bŏk oei hŏk pơhrăm tơ̆ dôm hnam trưng hŏk. Sơnăm hŏk 2026-2027, hloh 34% hŏk tro oei lơ̆m tơchơ̆t xa tơgŭm gah hla bơ-ar hŏk. Hơnih jang Pơtho Pơhrăm Đăk Lăk tŏk bŏk chă trong vă iŏk yua jên mong kơ teh đak chă răt hla bơ-ar hŏk, tơmơ̆t lơ̆m hơnih wei 'măn hla bar hŏk kơ hnam trưng hŏk vă ăn đe hŏk tro chă mơng. Mă lei, tơdrong pơm ou dang ei oei ƀơm lơ tơnap tap kơlih ưh kơ đei hla bơ-ar hŏk.

Kiơ̆ kơ yă Lê Thị Kim Oanh, Phŏ Kơdră Hơnih jang Pơtho Pơhrăm Đăk Lăk 'noh, Hơnih jang hlôi pơtruh nơ̆r hăm dôm hơnih in tơlĕch, hơlen lăng minh ƀar hơnih tĕch hla bơ-ar hŏk tơ̆ minh ƀar tơring vă chă răt akŏm asong ăn: “Dang ei Hơnih Pơtho Pơhrăm hlôi pơm jang hăm dôm hơnih in tơlĕch, Hơnih pơm hla bar Pơtho pơhrăm Việt Nam păng Hơnih tơm Pơtho Pơhrăm vă tơroi gah tơdrong tơnap tap ou, pơtruh nơ̆r chă trong pơklaih păng hơnih asong hla bar hŏk. Pơkăp tơ̆ hơnăp noh dah hrôih asong hơmŏ hla bar oei kơƀah, vă vei sơđơ̆ng ăn hŏk tro gơh đei hla bar hŏk sơđơ̆ng”.