Tơdrong hiơ̆ hyĭn âu pơm ưh kơ ‘lơ̆ng truh tơdrong hŏk pơhrăm, hơrih sa păng tơdrong sơđơ̆ng kơ 950 ‘nu hŏk tro lơ̆m sơnăm hŏk ‘nao 2026 – 2027, đe oh tă hơrih sa păng hŏk pơhrăm oei kơtă ngăl. Oei 10 năr dơ̆ng truh năr năm akŏm tơ̆ hnam trưng hŏk, mă lei hơnih cham hnam trưng, dôm hơnih lăm hŏk, hơnih ƀich oei pơdơh, hnam sŏng sa oei tŏk bŏk đei bơ̆n gŏch, tơmo, pơsey păng teh tơmo.

Tơ̆ hơnăp tơdrong ‘nâu, Khŭl Kơdră chĕp kơ̆l hnam trưng hlôi klăih song thây kô pơtho dăr hơlen, dăr lăng tơdrong ming man, hơdai hăm athei tơ ‘ngla tơmơ̆t jên jang păng dôm bơngai iŏk jang hơtŏk hơnăp jang tơnăp. Hnam trưng athei bơngai iŏk jang đei trong jang pơgơ̆r hơtŏk jơ jang, tơgŭm hơdrol jang đang dôm grŭp hnam, hơnih pơyua ăn kơtă tơdrong pơtho, hŏk pơhrăm, oei sa kơ hŏk tro.