Tơdrong akŏm jĭ minh tơdrong jang kăp gĭt hloh, tơƀôh tơdrong tơrĕk kăp gĭt đơ̆ng Jơnŭm pơgơ̆r Ƀô đô̆i vei sơlam teh dêh char; jăl pơgơ̆r, jơnŭm pơgơ̆r tơring, rim anih jang, jơnŭm jang tơpôl tơ̆ tơring păng rim bơngai jang 'mêm bơnat hăm tơdrong jang vei lăng, pơtho pơhrăm đe hơ-ioh, mă kăl noh đe hơ-ioh tơ̆ tơring sơlam teh, đơ̆ng noh hơtŏk jơhngơ̆m ăn đe hơ-ioh hŏk pơhrăm, hơdrin jing bơngai jang pơyua ăn tơpôl.

Lơ̆m 'măng akŏm, Jơnŭm pơgơ̆r Ƀô đô̆i vei sơlam teh dêh char Lâm Đồng, jơnŭm pơgơ̆r tơring păng rim bơngai jang 'mêm bơnat hlôi asong 450 tơpu tơmam đei kơjă pơhlom 200 triu hlj.

Khul grŭp tơpôl tơ̆ Đắk Lắk adrin mong akŏm tơmam, jên hu vă pơgơ̆r ngôi pơchơt, hơpăh tơmam ăn rơbâu ‘nu hơioh tơnuh, hơioh jo jăn lơ̆m dêh char, tơgŭm ăn đe oh ƀôh hiôk chơt lơ̆m jơhngâm ƀât pơyan khei pơnil. Hăm hơnăn “Chơt hơiă ƀơ̆r hiĕk – klăih song băl tơdrong ‘mêm kơeng” yoa Lăm hŏk Trung cấp lý luận chính trị A55A, Hnam trưng Chính trị dêh char Đắk Lắk pơgơ̆r, hlôi hơpăh 210 tơpu tơmam ăn đe hŏk tro tơ̆ hnam trưng.

Tơ̆ xăh Ea Mdroh, 300 tơpu tơmam đei hơpăh ăn đe hơioh tơ̆ pơlei kăn kư̆ kiơ̆ đơ̆ng tơdrong jang Unh đeng sơnglŏng tơ̆k hơdăh tơdrong hơpơi ‘mĕh. Oei tơ̆ plei Cư Kŏ Êmông, Khul druh dăm xăh Dang Kang jang hơdoi hăm dôm CLB jang tơgŭm pơgơ̆r hơxoang prao, pai sŭp, yoă sŏk ưh đei iŏk jên păng hơpăh hơbăn ao, tơmam hŏk pơhrăm, tơmam trung thu ăn vă jê̆ 700 ‘nu hơioh tơ̆ 2 pơlei Cư Păm păng Cư Kõ Êmông. Dôm tơmam âu tơgŭm ăn đe hơioh đei tơdrong arih xa mơmat dêh hlŏh tơ̆ Đắk Lắk nhen ƀôh iŏk đei jơhngâm đon ‘mêm kơeng lơ̆m pơyan Trung thu sơnăm ‘nâu.