Tơ̆ hơnih ming man Hơnih jang kmăi kmŏk Hòa Tâm păng Dơnŏk Bãi Gốc, dêh char Đắk Lắk, kơ mơjĭt gre tih, gre kôch atŭm hăm lơ gre kmăi kmŏk tŏk bŏk tĕnh koăng chưk tơnă, pơih trong iung jang ming man. Đơ̆ng rŏng ‘măng iung jang kơtang hơmet pơ ‘lơ̆ng hơnih teh ming man, Hơnih jang Kmăi kmŏk Hòa Tâm hlôi keh đang ăn mơng hloh 215ha teh. Ƀok Đỗ Văn Khánh, Kơ iĕng Kơdră chĕp pơgơ̆r Kŏng ty tơmơ̆t jên jang păng Atŏk tơ iung trong hnam Hơnih jang kmăi kmŏk Hòa Tâm tơbăt, hơdrô̆ Dơnŏk Bãi Gốc, đĭ đăng 64ha 9 sao teh hlôi đei pơjao, pơjing rơvơn vă tơdrong vă jang tơlĕch jang dôm tơdrong jang tơm lơ̆m khei 9 kơnh.

“Kơdră chĕp pơgơ̆r adoi nhen rim kơdră Hơnih bơ̆ jang dêh char jei hlôi pơjing khul bơ̆ jang ‘măn ăn bơ̆ jang iŏk tơvih teh ou ki ‘noh jĭ hlôi jang đĭ ai. Pơkăp lơ̆m dôm năr blŭng khei 9 gô tơlĕch jang, sơđơ̆ng ‘lơ̆ng tơdrong tơchơ̆t păng hơnih jang đei bơngai iŏk jang vă tơlĕch jang kiơ̆."

Mĭnh hơnih jang đei ăn kmăi kơdou jei jing jơ ‘năr kon jên tơmơ̆t jang pơtruh ăn lơ̆m tơdrong jang mŭk drăm. ‘Nou jĭ ‘long pơtŏ gĭt kăl hloh mưh rim tơring tơlĕch tơdrong vă jang iŏk đei tŏk mŭk drăm ƀar kơsô̆. Tơ̆ Hop akom Pơtrŭt tơmơ̆t jên jang sơnăm 2026, Gia Lai đei kon jên apĭnh tơmơ̆t jang păng tơchĕng lăng dang 850.000 ti hlak jên lơ̆m 273 tơdrong vă jang. Găh dêh char Đắk Lắk jei pơjao tơchơ̆t drơ̆ng nơ̆r ăn tơmơ̆t jên jang lơ̆m 25 tơdrong vă jang, akŏp kon jên tơmơ̆t jang hloh 40.000 ti hlak jên. Dôm kơsô̆ ou tơƀôh hơdăh tơdrong hơ iă kơ tơdrong atok tơ iung ‘nao. Mă lei kon jên apĭnh tơmơ̆t jang păng nơ̆r pơkăp ‘nao lăp hơyak blŭng a; tơdrong kăl hloh ‘noh pơm ăn dôm nơr pơkăp ou đei jing tơdrong jang tơpă hloi. Kơdră chĕp pơgơ̆r Hơnih vei lăng kon pơlei dêh char Đắk Lắk Đỗ Hữu Huy tơbăt, dêh char pơjing Khul dăr lăng, tơgum djru iung jang rim tơdrong vă jang đơ̆ng rŏng pơtrŭt tơmơ̆t jên jang.“Kăl pơm keh đang tĕnh koăng rim trong pơprŏ jang tơlech jang kiơ̆ rim tơdrong tơchơ̆t tơmơ̆t jên jang, hla bơar drơ̆ng nơ̆r tơmơ̆t jên jang păng đĭ đăng hla bơar ƀlŏk hơdơ̆r jang hơdoi hlôi đei pơjao ăn lơ̆m jơ ‘năr hop akŏm. Khul jang dăr lăng kăl hơnơ̆ng tơlĕch jang kiơ̆ hloi trong pơprŏ jang vă iung jang dôm tơdrong pơjao jang lơ̆m tơdrong tơchơ̆t pơjing Khul. Pơjao hơdăh bơngai, hơdăh tơdrong jang, jang keh đang lơ liơ, hơnăp jang lơ liơ păng hơdăh rim tơdrong vă jang dĭng truh năr tơdrong vă jang đei iung jang tơpă. ‘Nĕ kơ lê̆ bơngai tơmơ̆t jên jang iung jang hơdrô̆ hơdrăn lơ̆m jơ ‘năr jang ‘noh.”

Mă lei, hơnhăk jên pơm jang athei đei jơnei truh tôch. Hơtŏk tơ-iung oei gơnơm lơ̆m tơdrong iŏk yua jên asong jang mă trŏ, jang đei jơnei. Minh tơdrong tơlĕch jang, mă đei jên asong jang lơ mă lei ưh đei tôm hla bơ-ar pơkăp jang, ưh đei tôm tơmam drăm pơm jang 'noh kŭm ưh pơm tơlĕch tơdrong kăp gĭt. Kơyuơ noh, atŭm hăm hơvơn asong jang, rim tơring athei pơm kơđeh khei năr đơ̆ng tơchơ̆t truh tơlĕch jang, đơ̆ng hơnih jang truh pơm tơlĕch tơmam drăm. Kiơ̆ Kơ-iĕng kơdră Hơnih jang vei lăng kon pơlei dêh char Lâm Đồng Nguyễn Ngọc Phúc, rim tơdrong akŏm jang kăl đei tơdrong jang hơdoi đơ̆ng tôm tơdrong kăl hơdah: "Lâm Đồng kơtang gah tơdrong choh jang xa, jang kơmăi kơmŏk 'nao, pơm tơlĕch tơmam xa, unh hơyuh rơgoh 'lơ̆ng. Tơdrong kăl hloh noh athei akŏm jơhngơ̆m pran ou jing dôm tơdrong jang hơdah, pơjing đei tơmam drăm 'nao, trong jang 'nao, hơnhăk dôm tơdrong kăp gĭt pơyua ăn kon pơlei, hơnih jang tĕch mơdro păng hơnih jang mŭk drăm kơ dêh char tŏk truh 2 kơsô̆, hơtŏk tơdrong tơgar jang kơ dêh char".

Thoi 'noh, tơdrong pơkăp hơvơn asong jang pă đei oei lơ̆m tơdrong pơlong gah jên jang, mă jing rơih tơdrong asong jang trŏ trong, pơjing đei tơdrong kăp gĭt păng kơtang lơ̆m tơdrong pơlan să. Tơ̆ Khánh Hòa, đơ̆ng rŏng kơ hơgrop hăm Ninh Thuận, dêh char đei cham đak dơsĭ hơtaih jê̆ 500 km, atŭm hăm dơnŏk duk păng dôm hơnih jang logistics đei pơkă. Ƀok Trương Văn Tiến, Kơdră Hơnih Asong jang, Tĕch mơdro păng Tơmang pơhiơ̆ dêh char Khánh Hòa akhan, tơdrong pơtơm jang 'noh iŏk jang tơdrong ou atŭm hăm pơm tơlĕch tơmam drăm đơ̆ng Tây Nguyên păng Pơbah Tŏk bŏk: "Athei pơm thoi yơ pơm jang gơh đei jơnei hăm rim dơnŏk duk kiơ̆ đơ̆ng tơdrong pơtoi jang hăm tơring pơm tơlĕch tơmam drăm tơ̆ Pơbah Tây Nguyên. Pơm thoi yơ vă hơvơn rim hơnih asong jang gah chơ pơdŭ tơmam drăm, logistics, pơm trong jang hiôk hloh ăn rim hơnih jang mŭk drăm. Đơ̆ng 'noh, pơjing đei hơnih jang chơ pơdŭ tơmam drăm kơtang hloh"

Hăm Tây Nguyên – Tơring tơter đak dơsĭ Pơbah Tŏk bŏk, pơih să jên jang 'noh ưh hơdrô̆ jĭ tơdrong hơvơn asong pơm jang. 'Noh jing tơdrong kăl pơjing tơchơ̆t jang jing jơhngơ̆m pran vă hơtŏk tơ-iung, pơjing jơhngơ̆m pran ăn tơdrong jang, tơmam drăm, tơdrong pơyua păng tơdrong tơgar jang mŭk drăm. Păng 'noh kŭm jing tơdrong mă kon pơlei tah hla hơpơi 'meh ƀôh hơdah đơ̆ng rŏng kơ rim tơdrong tơchơ̆t jang: tơchơ̆t jang athei đei tơmơ̆t lơ̆m tơdrong hơrih, jơhngơ̆m pran athei đei tơ-iung, vă tơdrong hơtŏk jang đei jơnei tơpă.