Kiơ̆ hla ar chih tơdrong găh tơdrong jang “500 măng năr hơtŏk tơdrong sir chă, iŏk akŏm păng chih hơdăh hơnăn linh lôch tang ăn teh đak”, truh dang ei hlôi sir chă, iŏk akŏm đei 1.715 kơting linh lôch tang ăn teh đak, jang đei hlŏh 24%; hlôi pơgơ̆r iŏk kơmẫu tơ̆ 124.762 tŏ pơsat linh, jang đei hlŏh 58%.

Pơma hơdăh, tơdrong sir chă, iŏk akŏm păng chih hơdăh hơnăn linh lôch tang ăn teh đak jĭ nơ̆r athei đơ̆ng plei nuih păng hơnăp jang chinh trĭ, Phó Thủ tướng Phạm Thị Thanh Trà pơjao ăn Anih Pơgơ̆r jang 515 vang jang hơdoi hăm dôm tơring, adrin jang đang 130 blăh hô sơ chih tơroi găh linh lôch tang ăn teh đak lơ̆m sơnăm ‘nâu; chih hơmet ming hla ar hô sơ pơsat linh păng pơsat ƀŭ hơdai kiơ̆ trong rơđăh bơngai, rơđăh tơdrong jang, rơđăh khei ‘năr păng tơmam chă đei.