Kơdră chĕp pơgơ̆r Kuô̆k hô̆i Trần Thanh Mẫn tơbăt, ‘Măng hop akom hăt hot mă Blŭng kơ Kuô̆k hô̆i jăl XVI ‘nao pơtôch ‘lơ̆ng liĕm, pơdrơ̆ng kiơ̆ 15 khôi luơ̆t, tơdrong tơchơ̆t kiơ̆ ƀlep khôi luơ̆t păng 7 Tơdrong tơchơ̆t găh atok tơ iung mŭk drăm-tơpôl. Kơdră chĕp pơgơ̆r Kuô̆k hô̆i hôn bơnê kơtang tơdrong jang tơnăp, kơrŭn đĭ ai đơ̆ng rim hơnih bơ̆ jang. Truh jơ ‘năr dang ei, Kơdră chĕppơgơ̆r Kuô̆k hô̆i hlôi kĭ tôm rim khôi luơ̆t, tơdrong tơchơ̆t kơ ‘măng hop akŏm hăt hot mă Blŭng.

‘Măng hop akom mă 6 kơ Hơnih bơ̆ jang Khul kơdră chĕp pơgơ̆r Kuô̆k hô̆i đei pơgơ̆r 2 ‘măng, đunh vă jê̆ 6 năr, lăng hơlen 40 tơdrong jang. Kiơ̆ đơ̆ng Kơdră chĕp pơgơ̆r Kuô̆k hô̆i, ‘nou jĭ ‘măng hop akom gĭt kăl hloh găh pơjing khôi luơ̆t, adoi jing ‘măng hơmet ăn kơtă, tôch gĭt kăl ăn ‘Măng hop akom mă 2 kơ Kuô̆k hô̆i jăl XVI. ‘Moi kiơ̆ trong ou, Kơdră chĕp pơgơ̆r Kuô̆k hô̆i athei akŏm lơ̆m 3 tơdrong tơm găh pơjing khôi luơ̆t: kăl lăng truh ‘lơ̆ng, trŏ lăp păng tơdrong vă atŏk tơ iung ‘noh kăl hloh. ‘Măng hop akom mă ou, Hơnih bơ̆ jang Khul kơdră chĕp pơgơ̆r Kuô̆k hô̆i ăn tơgop nơ̆r hăm 31/41 tơdrong vă pơjing khôi luơ̆t, tơdrong tơchơ̆t gô vă pơtruh ăn Kuô̆k hô̆i tơ̆ ‘Măng hop akom mă 2; lơ tơdrong vă jang đei hơmet lơ, đei ƀơm truh tơdrong bơ̆ jang kơ Khul kơdră chĕp pơgơ̆r teh đak, kon pơlei, hơnih mơdro sa păng tơdrong jang muk drăm.

Kơdră chĕp pơgơ̆r Kuô̆k hô̆i athei, tơdrong jang tôch kơ lơ, jơ ‘năr jang hăt hot, mă lei ưh khan kơ yuơ vă jang keh đang mă lei ưh kơ lăng truh bơ̆ jang ‘lơ̆ng. Rim hơnih bơ̆ jang pơtruh ăn kăl hơmet hô sơ mă ‘lơ̆ng, sơđơ̆ng ‘lơ̆ng hơ iă găh chinh trĭ, khôi luơ̆t, khoa hŏk păng tơdrong yan ou; trong jang kăl hơdăh, trŏ lăp, xek tơlang ƀlep tơdrong yan ou. Hơnih bơ̆ jang Khul kơdră chĕp pơgơ̆r Kuô̆k hô̆i akŏm pơma dơnuh dôm tơdrong tih, dôm tơdrong oei đei nơ̆r tơgop phara dih băl, dôm tơdrong gơh pơjing đei tơplih hơ iă hloh."Trong jang ‘noh: khôi luơ̆t kăl hơdăh hloh, tôm tong hloh, jang kiơ̆ ƀônh hloh; kăl hơmet pơ ‘lơ̆ng dôm tơdrong tơhlăk tơhlĭn, hơmet pơ ‘lơ̆ng khul jang păng pơih trong ăn atŏk tơ iung. Mă ƀar, kăl pơm kiơ̆ kơjăp khôi luơ̆t păng tơƀrar hơmet ăn ‘Măng hop akŏm. Mưh lăng hơlen Tơdrong jang pơjing khôi luơ̆t sơnăm 2027, bơ̆n kăl rơih dôm tơdrong tơm hloh; tơlĕch jang hơdrol dôm tơdrong kăl hloh, dôm tơdrong tơhlăk tơhlĭn lơ̆m tơchơ̆t păng dôm tơdrong ‘nao kăl pơm pơkeh vă pơtrŭt atŏk tơ iung. Mưh kĭ pơkăp va iung jang Tơdrong jang ‘noh pơkăp găh hơnăp jang. Hơnih bơ̆ jang ayơ apĭnh vă tơlĕch jang tơdrong vă jang, sơkơ̆t hơdăh jơ ‘năr pơtruh ăn lei kăl hơmet mă bre, mă ‘lơ̆ng; hơmet pơ ‘lơ̆ng tơdrong apĭnh jang lơ tơdrong jang, mă lei đơ̆ng rŏng kơnh apĭnh pơdơ̆h jang, pơm kơnê̆ truh dôm tơdrong jang ou to."

Kơdră chĕp pơgơ̆r Kuô̆k hô̆i athei Khul kơdră chĕp pơgơ̆r Teh đak tơƀrar mă kơ hret rim hơnih tơm, hơnih jang hlôi apĭnh iung jang mă lei đơ̆ng rŏng ‘noh apĭnh pơdơ̆h jang pơm kơnê̆ truh tơdrong jang ou to. Kơ yuơ lơ loh, kăl iung jang mă kơtang, kơrŭn đĭ ai jang kiơ̆ hơmet pơ ‘lơ̆ng tơnap tap, tơhlăk tơhlĭn, vă teh đak atŏk tơ iung lơ̆m chăl hle hăm trong tơlĕch ăn tŏk muk drăm ƀar kơsô̆.

Tơbăt ‘Măng hop akŏm mă 2 Kuô̆k hô̆i gô vă lăng hơlen 40 tơdrong jang hăm lơ tơdrong tôch gĭt kăl, Kơdră chĕp pơgơ̆r Kuô̆k hô̆i athei kăl hơmet ăn đơ̆ng rôih, đơ̆ng hơtăih, iung jang hơdoi đơ̆ng blŭng hloi; lăp tơmơ̆t lơ̆m dôm tơdrong jang dôm tơdrong kăl hloh. Kơdră chĕp pơgơ̆r Kuô̆k hô̆i pơkă, tơdrong pơgơ̆r pơtôch ‘Măng hop akŏm hăt hot ‘măng mă Blŭng kăl tơpă, vă hơlen mă hơdăh dôm tơdrong hlôi jang ‘lơ̆ng ‘noh jang kiơ̆ hơnơ̆ng; adoi tơƀôh hơdăh dôm tơdrong jang tim mă ‘lơ̆ng, tơdrong tơm pơm ăn păng dôm trong hơmet pơ ‘lơ̆ng, kăl pơma tơpăt, pơma tơpă. Hop akom pơtôch ‘noh jĭ vă jang ‘lơ̆ng hloh dơ̆ng, ưh khan lăp vă pơtôch mĭnh ‘măng hop akŏm.