Kiơ̆ kơ ‘noh, Đảng ủy Công an Trung ương, Kơdră chĕp pơgơ̆r Hơnih tơm Kŏng ang hlôi jang kiơ̆ Tơdrong vă jang ming man 1.400 pơbŭng hnam tơgŭm ăn ŭnh hnam đei iŏk yua ăn teh đak, ŭnh hnam kon kông dơnuh, ŭnh hnam tơnap tap lơ̆m dêh char Kon Tum. Mĭnh pơbŭng hnam tơgŭm ăn 60 triu hlak jên đơ̆ng tơpôl vang tơra kơ yuơ Hơnih tơm Kŏng ang chă hơvơn. Vă pơbŭng hnam kơjăp ‘lơ̆ng hloh, tơgŭm ăn kon pơlei hơrih sa sơđơ̆ng đunh đai tai sơnăm, dêh char Kon Tum gô chă hơvơn dơ̆ng kon jên ou to tơ̆ tơring lơ̆m ou đei hloi tơdrong vang tơgop năr jang, tơmam drăm ming man ... Dêh char Kon Tum pơkăp iŏk yua kon jên tơgŭm đơ̆ng Hơnih tơm Kŏng ang jơnei ‘lơ̆ng păng hơdrin pơm keh đang 1.400 pơbŭng hnam hơdrol năr 30/6 sơnăm ou. Truh dang ei, dêh char Kon Tum hlôi ming man ‘nao păng hơmet ming đei hloh 1.000 pơbŭng hnam lơ̆m akŏp 2.752 pơbŭng hnam kăl ming man ‘nao păng ming hơmet.