- Yă ăi, đơ̆ng rŏng 5 sơnăm pơm kiơ̆ Tơdrong jang 8, ih sơkơ̆t thoi yơ gah tơdrong jang đei jơnei păng dôm tơdrong hlôh vao đei ƀôh lơ̆m tơdrong tơlĕch pơm jang?

Yă Nguyễn Thị Minh Hương: Pơm jang đei jơnei kơ Tơdrong jang 8 đei 9 tơchơ̆t noh hlôi đei 4 tơchơ̆t jang đei jơnei tih, phơ phŏ đei dôm tơchơ̆t đei jơnei hloh 200%. Oei 5 tơdrong tơchơ̆t nai, nhôn kơchĕng gô vă đei jơnei ah hơtuch sơnăm 2025, dang ah đĭ jăl 1 gô đei jơnei. Hơdrô̆ minh tơchơ̆t đĕch tơnap kơ đei jơnei. Tơdrong mă ou ăn ƀôh, tơdrong đei jơnei đơ̆ng pơm jang, hăm lơ noh dôm tơchơ̆t adoi hloh kơ tơdrong hơpơi 'meh.

Dôm tơchơ̆t đei jơnei kơjung hơnơ̆ng tơguăt hăm tơdrong jang lơ̆m tơpôl, pơtih nhen tơdrong jang "Anih jang lui ngeh" dah mă dôm Khul chă tơroi tơbăt lơ̆m pơlei pơla. Tơdrong mă ou tơƀôh hơdah tơdrong pơm kiơ̆ kăp gĭt đơ̆ng kon pơlei, tơdrong hlôi tơgŭm ăn dôm tơdrong tơlĕch jang đei jơnei tơnăp hloh. Minh lơ̆m dôm tơdrong hlôh vao jang đei jơnei lơ̆m jăl 1 kơ tơdrong tơlĕch jang noh jing tơdrong vang jang đơ̆ng dôm jăl pơgơ̆r tơring, păng mă kăl noh tơdrong vang jang đơ̆ng kon pơlei. Tơdrong vang jang đơ̆ng kon pơlei hlôi tơgŭm ăn tơdrong tơlĕch jang trŏ ƀlep hăm tơdrong kăl păng hơpơi 'meh đơ̆ng đe sư, kiơ̆ đơ̆ng noh adoi tơgŭm ăn kơ nhôn pơtoi hơmet dôm tơdrong jang mă trŏ ƀlep hloh”.

- Lơ̆m jăl jang 2026-2030 kơ Tơdrong tơchơ̆t jang kơ teh đak, Tơdrong jang 8 gô đei dôm tơdrong hơmet păng asong jang thoi yơ, yă koh?

Yă Nguyễn Thị Minh Hương: “Dang ei, tơdrong jang Tơdrong tơchơ̆t đơ̆ng teh đak adoi gô đei lơ tơplih. Mă lei, mă thoi yơ, Jơnŭm jang Drăkăn Việt Nam adoi sơkơ̆t hơdah, tơdrong jang atŭm drŏnglo drăkăn jing tơdrong jang mă hơdah lơ̆m dôm tơdrong jang kơ Tơchơ̆t jang kơ teh đak gah hơtŏk mŭk drăm tơpôl tơring kon kông păng groi kông. Tơdrong mă noh jing kăp gĭt, mă đei Tơdrong jang 8 dah mă ưh, dôm tơdrong jang adoi oei kăl jang hơdoi hăm đe drŏnglo păng drăkăn.

Pơtih nhen, hăm dôm tơdrong jang hơtŏk mŭk drăm tơpôl, adoi oei đei dôm tơdrong tơgŭm kăp gĭt ăn đe drăkăn, nhen dôm hơp tak xah dah mă anih jang mŭk drăm kơyuơ đe drăkăn pơm tơm. Dah mă hăm dôm tơdrong đei tơrĕk truh vei lăng jơhngơ̆m jăn, athei đei dôm tơdrong kăp gĭt vă tơgŭm đe drăkăn gah jơhngơ̆m jăn rơneh kon hơ-ioh, pơtho bơngai mĕ păng đe hơ-ioh. Lăng atŭm, nhôn gô hơtŏk tơdrong jang hơdoi hăm đe drŏnglo păng drăkăn lơ̆m tôm tơdrong jang đei tơlĕch păng hơtŏk tơdrong hơbĕch ăn đe drăkăn adoi nhen ăn đe kan ƀô̆ pơm jang tơ̆ tơring”.

- Lei ah, bơnê kơ ih hơ!