Tơring groi kông Khánh Sơn, dêh char Khánh Hòa đei vă jê̆ 12.000 ‘nu kon pơlei, ‘noh đei hloh 8.500 ‘nu bơngai hơdrung Raglai. Ƀok Cao Minh Khánh, Kơ iĕng Ƀĭ thư Đảng tơring Khánh Sơn, tơbăt, 5 sơnăm ou ki ŭnh hnam dơnuh tơ̆ ou tơjur kơtang, mă lei oei hloh 20%, jang sa iŏk đei jô̆ hơtŏ măt bơngai lơ̆m sơnăm lăp 30 triu hlak jên. Hăm lơ trong jang tơgŭm djru trŏ lăp tŏk bŏk tơlĕch jang, trong jang sa kơ kon pơlei tŏk bŏk đei hơmet pơ ‘lơ̆ng:“Rim tơdrong jang mŭk drăm groi kông ou ki hlôi đei tơlĕch jang lơ tơ̆ tơring, kon pơlei đei iŏk yoa sa hơpăh tôm tong. Mă lei, mưh yak năm hơlen truh hăm kon pơlei jei oei đei ƀôh mĭnh ƀar ŭnh hnam kon pơlei jang kiơ̆ tim mă jơnei. Găh lơ ‘noh iung jang ‘lơ̆ng rim tơdrong jang tơgŭm djru păng hlôi kĕ yak hloh dơnuh hin kơjăp ‘lơ̆ng”.

Jô̆ pơđĭ lơ̆m dêh char Khánh Hòa, ŭnh hnam dơnuh lơ̆m kon kông tơjur jô̆ hơtŏ 5% lơ̆m sơnăm; truh dang ei oei đei hloh 6.400 ŭnh hnam, tơmơ̆t 10,7%. Hloh 3.500 pơbŭng hnam pơgia, hnam hnăt hnot hlôi đei tơplih ăn hnam kơjăp ‘lơ̆ng. Trong nơnăm, hnam trương, hnam pơgang, ŭnh hơyuh păng đak sŏ nhă hlôi truh hăm rim ŭnh hnm. Tơ̆ lơ tơring đơ̆ng rŏng hơgrop, hơgăt teh lang să, măt bơngai tŏk lơ, đei dơ̆ng lơ trong jang sa atŏk tơ iung ‘nao. Nhen tơ̆ Trung Khánh Vĩnh tŏk bŏk lang să pơtăm ‘long sa plei. Khul kơdră tơring tơgŭm ăn dơđăh hơdrĕch ‘long, ăn tŏk iŏk jên, pơtho tơbăt kih thuơ̆t, pơjing hơyak pran vă kon pơlei hơdrin jang sa kiơ̆ trong tơplih ‘nao. Yă Cao Thị Ngọc Thanh, Kơdră chĕp pơgơ̆r Hơnih vei lăng kon pơlei tơring Trung Khánh Vĩnh tơroi tơbăt:“ Tơring pơjing trong atŏk tơ iung lang să pơtăm ‘long pơtăm tơm, chă rơih pơtăm ‘long trŏ lăp hăm groi teh, tŏ ‘mi kial, vă mĭnh păh trŏ lăp ăn tơdrong ‘meh vă atŏk tơ iung mŭk drăm, mĭnh păh vă tơplih choh jang sa kiơ̆ trong iŏk đei jơnei kơjăp. Lơ tơmam drăm hlôi đei tĕch mơdro, măh mai, ‘lơ̆ng, hơnhăk đei iŏk yoa kơjăp ăn kon pơlei”.

Kiơ̆ hla bơar chih tơbăt đơ̆ng dêh char, tơring găh Tu Khánh Hòa hlôi jang keh đang 29/30 trong tơlĕch jang Tơdrong jang tơm teh đak atŏk tơ iung tơring kon kông păng groi kông; jang sa iok đei jô̆ hơtŏ măt bơngai kon kông tŏk hloh 2,14 ‘măng pơtêng hăm sơnăm 2020. Tơ̆ tơring Pơbăh Khánh Hòa, 19/22 trong tơlĕch jang iung jang keh đang păng keh đang hloh trong tơlĕch ăn, lơ̆m ou mă kăl ‘noh 100% ŭnh hnam kon kông đei tơgŭm ăn hnam oei. Mălei, oei đei dôm trong tơlĕch jang iung jang tim mă keh đang nhen tơjur kơsô̆ tơring tơnap tap hloh, pơm hơtŏk lơ măt bơngai hŏk tro kon kông hŏk jăl ƀar, dăh mă găh yơ̆p ‘long hơyơ̆l teh bri.

Kiơ̆ đơ̆ng ƀok Nguyễn Ngọc Sơn, Kơ iĕng Kơdră chĕp pơgơ̆r Hơnih vei lăng Kon kông păng Lui khop dêh char Khánh Hòa, tơring kon kông păng groi kông kơ dêh char oei lơ tơnap tap, mă lei jei đei trong jang kơtang, mă kăl găh tơdrong choh jang sa. Mŭk drăm tơpôl tơ̆ ou gô tơplih găh tơdrong ‘lơ̆ng mưh dêh char krao hơvơn hơnih mơdro sa vang iung jang, tơ iung pơjing rim trong jang tơgoăt jang hơdoi. Ƀok Nguyễn Ngọc Sơn chă pơma pơtil ăn tơ̆ tơring Khánh Sơn:“Tơ̆ tơring groi kông Khánh Sơn, hrei ou ‘long sâu riêng hlôi jing ‘long pơtăm tơm. Pơjing đei hơnăn păng đei trong tơlĕch jang tơmơ̆t jang pơm tơlĕch tơmam drăm, tăh ‘nŭng, ‘noh sâu riêng tơ̆ Khánh Sơn gô kĕ yak hơtăih plăih kơjung. Mă lei vă jang kĕ tơdrong ou, kăl đei trong jang tơgum djru kăl, tơgŭm ăn rim hơnih mơdro sa găh tơdrong ‘nou. Đơ̆ng noh, pơjing hơyak pran ăn rim tơring kon kông atŏk tơ iung”.

 Bơ̆ jang tơjur dơnuh, pơm hơtŏk tơdrong hơrih sa ăn tơring kon kông tơ̆ Khánh Hòa hlôi iŏk đei jơnei gĭt kăl, roi năr roi kơjăp ‘lơ̆ng mưh tơlĕch jang hơgrop rim tơdrong jang trong hnam, pơtho pơhrăm păng jang sa. Hơnih mơdro sa jei tŏk bŏk yak hơdoi vă kĕ atŏk tơ iung kơtang dôm tơdrong đei. Hla bơar chih tơbăt bơ̆ jang chinh trĭ kơ dêh char Khánh Hòa pơma hơdăh trong jang “Ưh kơ lê̆ bơngai bu hơchăng hŭt tơ̆ rŏng”, tơlĕch trong jang tơjur dơnuh lơ pang đơ̆ng 1 truh 1,5% lơ̆m sơnăm, sơkơ̆t hơdăh kơrŭn đĭ ai hơnhăk ăn rơvơn atŏk tơ iung tôm tong, kơjăp ‘lơ̆ng ăn tơring kon kông păng groi kông.