Dêh char Khánh Hòa hrei ou đei 34 hơdrung kon kông hăm hloh 266.000 ‘nu bơngai, tơmơ̆t vă jê̆ 12% măt bơngai. Truh hơtuch sơnăm 2025, tơring oei đei dang 5.100 ŭnh hnam dơnuh, lơ̆m ou hloh 3.000 ŭnh hnam ‘noh bơngai kon kông. Tơ̆ jơ bơ̆ jang, dêh char Khánh Hòa apĭnh athei Hơnih tơm vei lăng Kon kông păng Lui khop hrôih pơm keh đang trong jang tơgŭm djru găh teh, asong tŏk iŏk jên păng tơgŭm djru tơmơ̆t jên jang; tơmơ̆t dơ̆ng kon jên iung jang atŏk tơ iung trong hnam; hrôih pơjing tơchơ̆t găh tơgŭm ăn teh oei, hnam oei vă tơring đei trong iung jang jơnei. Kơdră chĕp pơgơ̆r Hơnih tơm jang vei lăng Kon kông păng Lui khop Nguyễn Đình Khang hôn bơnê dôm dôm tơdrong mă Khánh Hòa iŏk đei jơnei lơ̆m tơjur dơnuh, tơmơ̆t jên jang trong hnam păng pơm hơtok tơdrong hơrih sa ăn kon kông. Ƀok athei dêh char hơnơ̆ng hơmet pơ ‘lơ̆ng rim trong tơlĕch jang; dăr lăng, hơmet pơ ‘lơ̆ng yưh lĭu đơ̆ng rŏng hơgrop; chih hơmet pơ ‘lơ̆ng hô sơ jang; tơlĕch jang kiơ̆ kơjăp trong vă jang kiơ̆ Tơdrong jang tơm teh đak jăl jang 2026-2030, adoi atok kơtang dăr lăng, lăng hơlen vă rim kon jên tơmơ̆t jang đei iŏk yoa trŏ ƀlep, jơnei ‘lơ̆ng.