Đon pơhnŏng đei chih tôch hơdăh ‘nŏh: Truh sơnăm 2030, 100% thây kô lăp hăm tơdrong hơgăt pơtho pơhrăm kiơ̆ Luơ̆t pơtho hŏk pơhrăm; hlŏh 80% hnam trưng lăp hăm tơdrong hơgăt pơtho hŏk rơgei kơ teh đak; kơsô̆ hŏk tro đŏu Tôt nghiêp lăm 12 hlŏh 98%, đŏu đăi hŏk păng cao đẳng găh grŭp dơ̆ng hơdrol lơ̆m tơring.

Kŭm hăm ‘nŏh jĭ tơplih ‘nao hla ar hŏk, trong pơtho, dar dĕh hơnhăk nơ̆r Anh jing nơ̆r pơma mă 2 tơ̆ hnam trưng, pơih xă tơdrong jang hơdoi hăm apŭng plenh teh păng sơng iŏk sinh viên teh đak đe truh hŏk pơhrăm. Tơdrong tơchơ̆t oei chih tơlĕch tơdrong tơgŭm ăn khul thây kô, hơtŏk tơdrong tơgŭm găh tơdrong jang truh 70% ăn thây kô, 100% ăn thây kô pơtho tơ̆ tơring pơmat tat dêh hlŏh, tơring achon kông lơ̆m đak dơsĭ păng tơring kon pơlei kon kông oei xa.