Tơ̆ jơ tơƀơ̆p, Khul kơdră tang măt Kuô̆k hô̆i dêh char Lâm Đồng tơroi tơbăt ăn bơngai tăh hla kơ dêh char găh jơ ‘năr, dôm tơdrong pơma dơnuh kơ ‘Măng hop akom mă 10, Kuô̆k hôi jăl XV. ‘Măng hop akom gô pơgơ̆r đơ̆ng năr 20/10 truh năr 12/12, Kuô̆k hô̆i gô lăng hơlen, tơchơt 43 tơdrong vă pơjing khôi luơ̆t, tơdrong tơchơ̆t bơ̆ jang pơjing khôi luơ̆t; 12 khul tơdrong jang găh mŭk drăm-tơpôl, kon jên jang teh đak, dăr lăng păng rim tơdrong kăl anai; adoi, đei 13 khul tơdrong jang rim hơnih bơ̆ jang pơtruh ăn hla bơar chih tơbăt tơdrong jang vă kơdră tang măt Kuô̆k hô̆i hơlen.

Bơngai tăh hla dêh char Lâm Đồng pơma tơbăt jơhngơ̆m đon lui kơtang lơ̆m trong chĕp pơgơ̆r đơ̆ng Đảng, tơdrong jang dăr lăng đơ̆ng Kuô̆k hô̆i, tơdrong pơchoh trong kơtang đơ̆ng Khul kơdră chĕp pơgơ̆r teh đak lơ̆m atŏk tơ iung mŭk drăm-tơpôl, sơđơ̆ng dơ̆ng kơjăp kơ teh đak; hôn bơnê dôm tơdrong hơdrin yak hloh tơnap tap kơ dêh char iok đei tŏk muk drăm 9 khei blŭng sơnăm 6,8% păng thuê̆ ăn hơnih mong jên bơ̆ jang teh đak đei vă jê̆ 23.600 ti hlak jên, hơtŏ hăm 84% trong tơlĕch ăn đơ̆ng dêh char, tŏk hloh 19% pơtêng hăm khei năr ou sơnăm sơ̆; hôn bơnê kơtang Tơdrong jang xut xa hnam pơgia, hnam hnăt hnot păng tơdrong ưh kơ ăn kon jên hŏk pơhrăm đơ̆ng Đảng, Teh đak.

Lăng kơjăp truh tơdrong pơtho pơhrăm, bơngai tăh hla dêh char Lâm Đồng akhan, kăl lăng hơlen ưh kơ vei kơjăp ‘măng pơlong lĕch ‘măng khoă jăl pêng kơ yuơ găh lơ rim dêh char rim sơnăm măt bơngai hŏk tro kĕ lĕch ‘măng khoă tôch kơ lơ. Kăl jang kiơ̆ tĕnh koăng nơ̆r pơrô̆ jang đơ̆ng Hơnih tơm Chinh trĭ dăr lăng hơlen tơdrong jang kiơ̆ Tơdrong jang pơtho pơhrăm jăl ƀar pêng, sơđơ̆ng pơjing đei kơsơ̆p hla bơar hŏk pơhrăm lei lăi dih băl lơ̆m teh đak; Kăl lăng hơlen tơdrong ưh kơ ăn hŏk tro iŏk yoa điên thoăi lơ̆m hnam trương; găh tơdrong đei lơ hŏk tro lơ̆m mĭnh lăm tơ̆ tơring Đà Lạt; atŭm hăm trong pơtho pơhrăm rim hnam trương kăl atŏk kơtang pơtho ăn jơhngơ̆m đon oei sa ‘lơ̆ng gơh găt ăn hŏk tro…

Bơngai tăh hla rim tơring hơtăih yăih lơ̆m dêh char athei kăl lăng kơjăp truh tơmơ̆t jên jang trong nơnăm vă sơđơ̆ng ăn chă nơnăm păng pơtrŭt kơtang mơdro sa. Găh tơdrong jang kiơ̆ trong bơ̆ jang tơring 2 kâp, bơngai tăh hla dêh char Lâm Đồng, sơkơ̆t hơdăh, đơ̆ng rŏng vă jê̆ 3 khei iung jang hlôi tơlĕch jang kiơ̆ lơ tơdrong iŏk đei jơnei hơ iă chă pơvih pơvăn ‘lơ̆ng hơ iă ăn kon pơlei. Mă lei, kiơ̆ kơ ƀok Lê Văn Thái, oei tơ̆ phương Lâm Viên- Đà Lạt, oei đei mĭnh ƀar tơdrong tơhlăk tơhlĭn, ưh kơ tam mă lăp kăl hơmet pơ ‘lơ̆ng tơtom vă khul kơdră chĕp pơgơ̆r bơ̆ jang ‘lơ̆ng hơ iă hloh dơ̆ng:“Tơdrong proh hơmet ăn khul kang ƀô̆ bơ̆ jang hrei ou tim mă tơgăl hăm tơdrong đei măt bơngai lơ kơ kon pơlei pơm ăn truh bơ̆ jang trăp trĭn. Kang ƀô̆, bơngai jang măh iung jang lơ tơdrong kơ yuơ lơ loh đei ƀơm ưh kơ ‘lơ̆ng ăn tơdrong jang đei pơjao păng pơm ưh kơ ‘lơ̆ng truh tơdrong pơvih pơvăn ăn kon pơlei. Athei hăm rim kơdră tang măt Kuô̆k hô̆i, athei Kuô̆k hô̆i, Khul kơdră chĕp pơgơ̆r teh đak păng rim hơnih tơm, hơnih jang ƀơm truh hrôih chă tơchĕng hơlen, hơmet ming vă đei trong pơjao dơ̆ng ƀiên chê̆ kang ƀô̆ tơ̆ tơring ‘moi kiơ̆ găh măt bơngai kon pơlei lơ tŏ sĕt liơ, hơgăt teh să iĕ lơ liơ păng tơdrong kăl kiơ̆ rim tơring dơ̆ng”.

Tơ̆ jơ tơƀơ̆p pơma dơnuh hăm bơngai tăh hla, ƀok Y Thanh Hà Niê Kđăm, Kơdră jang lơ̆m Trung ương Đảng, Bí thư Đảng dêh char, Kơdră Khul kơdră tang măt Kuô̆k hô̆i dêh char Lâm Đồng tơgoăt iŏk hôn bơnê 16 ‘măng nơ̆r tơgop tôch tơpăt trŏ lăp đơ̆ng bơngai tăh hla găh tơdrong atok tơ iung kơ dêh char. Mă kăl lơ̆m dôm tơdrong đei tih tên kơ dêh char Lâm Đồng hle đơ̆ng rŏng hơgrop 3 dêh char Dak Nông, Bình Thuận păng Lâm Đồng. Tang măt ăn Khul kơdră tang măt Kuô̆k hô̆i, Hơnih vei lăng kon pơlei dêh char Lâm Đồng atŭm hăm rim hơnih bơ̆ jang kơ dêh char jei tơl tơblang hơdăh mĭnh ƀar tơdrong mă bơngai tăh hla tơgop nơ̆r găh hơnăp jang kơ khul chĕp pơgơ̆r păng hơnih chĕp pơgơ̆r vei lăng.