Khul kơdră tang măt Kuô̆k hô̆i dêh char Gia Lai kơ yuơ ƀok Châu Ngọc Tuấn, Kơ iĕng Kơdră chĕp pơgơ̆r Đảng dêh char, Kơdră khul Kơdră tang măt Kuô̆k hô̆i dêh char pơm Kơdră khul ‘nao năm dăr lăng tơdrong vei lăng, iŏk yoa mŭk drăm teh đak ‘noh Hơnih bơ̆ jang lơ̆m phương Quy Nhơn.

Hrei ou Hơnih vei lăng kon pơlei Phương Quy Nhơn vei lăng 5 hơnih bơ̆ jang, hăm akŏp hơgăt teh să hloh 5.757 mét vuông. Tơdrong proh hơmet hơnih bơ̆ jang ăn khul chĕp pơgơ̆r đơ̆ng rŏng hơgrop ‘noh jĭ tôch trŏ lăp hăm tơdrong ‘meh vă yan ou. Đei 4 lơ̆m 5 hơnih tŏk bŏk đei proh hơmet, iŏk yoa pơvih pơvăn ăn bơ̆ jang kơ Hơnih vei lăng kon pơlei phương păng rim hơnih bơ̆ jang, sơđơ̆ng bơ̆ jang hoei kơtĕch toch broch. Hloh đơ̆ng dăr lăng hô sơ groi teh, pơ đĭ 5 hơnih đei phương dăr lăng hơlen hơdăh.

Mă lei, bơ̆ jang vei lăng, iŏk yoa mŭk drăm teh đak oei đei mĭnh ƀar tơdrong tơnap tap. Mĭnh ƀar hô sơ pơkăp, hô sơ groi teh, hô sơ kih thuơ̆t tim mă tôm tong; yưh liu mŭk drăm đei akŏm đơ̆ng lơ trong, ‘moi kiơ̆ rim chăl sơnăm kơna kăl hơnơ̆ng pơm pơkeh tôm tong. Mĭnh ƀar hơnih bơ̆ jang iŏk yoa đĭ đunh hlôi đei ƀôh pă gan ‘lơ̆ng, kăl ming hơmet ming pơ ‘lơ̆ng lơ̆m mă kon jên tơmơ̆t jang oei gơnang lơ̆m proh hơmet kon jên bơ̆ jang.

Pơma pơtôch jơ dăr lăng, Kơdră khul Kơdră tang măt Kuô̆k hôi dêh char Gia Lai Châu Ngọc Tuấn tơbăt, Gia Lai ‘noh mĭnh lơ̆m 12 dêh char, pơlei tơm đei Khul kơdră chĕp pơgơ̆r Kuô̆k hô̆i rơih dăr lăng hơlen kơtang găh jang kiơ̆ trong bơ̆ jang, khôi luơ̆t vei lăng, iŏk yoa mŭk drăm teh đak ‘noh hơnih jang pơm Hơnih bơ̆ jang đơ̆ng rŏng proh hơmet khul jang, tơring.  khul Kơdră tang măt Kuô̆k hôi dêh char athei phương Quy Nhơn hơnơ̆ng dăr lăng, pơm pơkeh hla bơar tơchơ̆t hăm rim hnam, teh; atŏk kơtang dăr lăng, lăng hơlen tơdrong vei lăng, iŏk yoa mŭk drăm teh đak. Mă kăl, kăl dăr lăng mă hơlen rim hnam joh ayŏ, hop akŏm pơlei pơla tơ̆ rim koeng kơphô̆ rơkăh đơ̆ng rŏng proh hơmet, sơđơ̆ng ‘lơ̆ng hơ iă ăn tơdrong ‘meh vă đei hơnih hop akŏm kơ kon pơlei, veh ver hơmet mŭk drăm kiơ̆ trong pơm ưh kơ ‘lơ̆ng truh tơdrong pơgơ̆r hop akŏm ou to.

Tơ̆ dêh char Đắk Lắk, khul Kơdră tang măt Kuô̆k hôi dêh char jei hlôi iung jang dăr lăng tơdrong jang kiơ̆ trong jang ou tơ̆ phương Buôn Ma Thuột. Đơ̆ng rŏng iung jang trong bơ̆ jang khul kơdră chĕp pơgơ̆r tơring ƀar kâp, Hơnih vei lăng kon pơlei phương Buôn Ma Thuột, dêh char Đắk Lắk iŏk vei lăng 64 hơnih hnam, teh, lơ̆m ou đei 13 hơnih dang ei rơkăh, tim mă proh hơmet iŏk yoa. Tơdrong hơmet pơ ‘lơ̆ng rim mŭk drăm ou tơƀơ̆p tôch kơ lơ tơdrong tơhlăk tơhlĭn. Ƀok Trịnh Vũ Quang, Kơdră chĕp pơgơ̆r Hơnih bơ̆ jang pơvih pơvăn tơdrong jang teh đak vei lăng phương Buôn Ma Thuột tơbăt, phương tŏk bŏk tơƀơ̆p tơhlăk tơhlĭn lơ̆m tơdrong hơlen kơjă ăn mơng mưh ƀar tơdrong tơchơ̆t đơ̆ng Hơnih tơm jang Jên hu păng Hơnih tơm vei lăng Tơ iung pơjing ming man pơtho tơbăt ăn ưh kơ lei lăi, phara dih băl:“Kiơ̆ Tơdrong tơchơ̆t đơ̆ng Hơnih tơm vei lăng Tơ iung pơjing ming man tơchơ̆t sơnăm iŏk yoa glăi pha pơtêng hăm Tơdrong tơchơ̆t 141 đơ̆ng Hơnih tơm jang Jên hu. Pơtih gia mŭk drăm hơnih jang hmă kâp 3 khei năr gơh iŏk yoa ‘noh 50 sơnăm, mă lei hơlen hơdăh tơdrong hư răm ou to kơ mŭk drăm kiơ̆ Tơdrong tơchơ̆t 141 đơ̆ng Hơnih tơm jang Jên hu ‘noh lăp đei 25 sơnăm. Kơ yuơ lơ loh, kơjă mŭk drăm oei gơh iŏk yoa jei tôch kăp gĭt, mă lei hơlen găh hư răm ‘noh uơ oei đei jơ ‘năr jĭ tôch tŏ sĕt. Kơ yuơ lơ loh, tơnap tap lơ̆m tơdrong tơchơ̆t hơdăh kơjă ăn mơng.”

Đơ̆ng tơdrong hlôi đei, khul dăr hơlen lăng chih akŏm đei tơdrong tơm: kăl sơkơ̆t hơdah mŭk drăm kơ teh đak mă rơkah jing tơdrong tơnap hăm tơdrong vei lăng dah mă tơnap vă hơtŏk tơ-iung. Trong jang vă iŏk yua mŭk drăm rơkah kơ teh đak tơ̆ dôm tơring gô tơchơ̆t tơlĕch jang lơ̆m khei năr truh. Yă Lê Đào An Xuân, Phŏ Kơdră khul juăt jang kơ Khul tang măt Kuô̆k hô̆i dêh char Đăk Lăk hmach bơnê kơ dôm tơdrong jang đei 'lơ̆ng kơ phương Buôn Ma Thuột. Hăm dôm tơdrong tơnap tap, tơhlăk tơhlĭn păng nơ̆r pơtruh đơ̆ng phương, Khul tang măt chih akŏm lơ̆m tơdrong chă hơlen tơ̆ rim tơring vă tơroi ăn Kuô̆k hô̆i. Tơdrong vei lăng, iŏk yua mŭk drăm kơ teh đak jĭ hơnih pơm jang đơ̆ng rŏng kơ pơm kiơ̆ pơkăp hơgrop jơnŭm pơgơ̆r păng hơnih jang hanh chĭnh jĭ tơdrong hăt hot, tŏk bŏk đei kon pơlei tah hla, kon pơlei jơ̆p teh đak tơrĕk truh hloh: “Tơdrong chă iŏk yua mŭk drăm, mă kăl noh hơnih pơm jang đơ̆ng rŏng kơ hơgrop athei iŏk jang mă tơnăp, tang găn lê̆ huach hoh. Kuô̆k hô̆i gô tơlĕch chă hơlen lăng lơ̆m sơnăm ou hăm tôm dêh char pơlei tơm gah tơdrong ou”.

Đơ̆ng tơdrong chă hơlen lăng tơ̆ Gia Lai păng Đăk Lăk, dôm tơdrong tơhlăk tơhlĭn lơ̆m vei lăng, iŏk yua hơnih bơ̆ jang păng mŭk drăm kơ teh đak đơ̆ng rŏng kơ hơgrop hlôi đei sơkơ̆t hơdah hloh. 'Nou kŭm jing tơdrong tơm vă rim khul jang tang măt ăn Kuô̆k hô̆i chih akŏm, pơtruh nơ̆r chih akŏm tơchơ̆t tơgŭm, vei sơđơ̆ng 'lơ̆ng mŭk drăm kơ teh đak, iŏk yua trŏ tơdrong, iŏk yua đei jơnei 'lơ̆ng, tang găn lê̆ huach mŭk drăm păng pơvih 'lơ̆ng hloh ăn tơdrong hơrih kon pơlei.