Dôm năr ou ki, 'mi tih đak hơbông pơm lơ tơring gah Hơlĕch (lơ̆m dêh char Phú Yên so) ƀơm tơklah hơdrô̆, pơm lơ unh hnam kon pơlei ưh đei tơmam xa, tơmam drăm kăl, lơ̆m kơplah tơdrong tơgŭm ƀơm lơ tơnap tap ah mă đak tŏk blai tenh. Lăng truh tơring đak hơbông, lơ jơnŭm jang tơpôl, khul jang 'mêm bơnat, oei hăt hot sơng iŏk, klah asong tơmam vă 'nŭng tơmam drăm kăl pơtruh ăn dôm tơring ƀơm tơklah hơdrô̆.

Anih jang MTTQ Việt Nam dêh char Đăk Lăk hlôi pơtruh kơthơ krao hơvơn tơgŭm kon pơlei hơmet 'mi kial đak hơbông pơrăm, ră hơdah rim 'nŭng tơmam mă iĕ ioch mă lei kăp gĭt tih tên lơ̆m tơdrong tơgŭm kon pơlei găn hloh tơdrong hiong răm, dah hrôih sơđơ̆ng tơdrong hơrih.

Vă pơm ‘lơ̆ng ưh đei bu pơngot dăh mă tơƀâp tơdrong krê hơmơt, khul kơdră pơgơ̆r dêh char Gia Lai athei đĭ đăng khul grŭp vang năm bơ̆ jang dŏng tơgŭm. Ƀok Nguyễn Tuấn Thanh, Phŏ Kơdră chĕp kơ̆l Anih vei lăng kon pơlei dêh char Gia Lai, ăn tơbăt, dêh char oei akŏm tôch ai ăn tơdrong jang tơgŭm păng vei lăng sơđơ̆ng ‘lơ̆ng ăn kon pơlei.

Tơ̆ dôm anih chông tơlĕch kon pơlei, khul jang kơpal kơ dêh char Gia Lai oei vei kơjăp tơdrong trư̆k prăt măng prăt năr, vei lăng ‘lơ̆ng tơdrong sơđơ̆ng, jang pơgang, mă loi ‘nŏh jĭ tơgŭm găh tơmam xa, đak nhă ăn rơbâu ‘nu kon pơlei athei lĕch đơ̆ng hnam tŏk oei pơgia tơ̆ nai. Dôm kơthŭng mi tôm, kơthŭng đak, khăn kơmŭng, unh ƀin… đei chơ pơtruh đơ̆ng anih jang dŏng tơgŭm. Ưh lăp hơdrô̆ kon pơlei lơ̆m dêh char đĕch, lơ khul jang dŏng tơgŭm đơ̆ng dôm dêh char jŭm dăr kŭm năm truh tơ̆ Gia Lai, hơnhăk ba bơ̆n pơgang, ao chai, tơmam xa vă tơgŭm ăn kon pơlei.