Mưh băt truh kơsơ̆p hla ar chih kăp gĭt kơ klo kăn y sĩ Đào Ngọc Thạnh păng dược sĩ Mai Thị Kim Ngân tơ̆ phường Cẩm Thành, plt Quảng Ngãi, unh hnam yă Trần Thị Sô tơ̆ xăh Tịnh Khê, plt Quảng Ngãi năm truh tơ̆ hnam vă pơih hơlen năng. Tơ̆ kơsô̆ tơrih mă 46 lơ̆m hla ar chih, hơnăn "Trần Thị Lê" đei ƀôh, trŏ hăm hla ar chih tơroi bơngai lôch mă unh hnam yă Sô oei vei răk. Dôm tơdrong chih tơroi đơ̆ng hla ar đĭ so sŏch âu nhen tưk tơiung dơ̆ng đon hơmĕng tih đơ̆ng rŏng lơ sơnăm gô chang, tơchă mŏ oh.

Yă Trần Thị Sô, oh drŏ kăn linh lôch tang ăn teh đak Trần Thị Lê phơk jơhngâm tơroi: “Inh tôch hơiă mưh kơtơ̆ng đe ma chih hơtŏk lơ̆m mang tơpôl. Chă ƀôh hloi hơnăn Trần Thị Lê ‘noh hơiă tơpă mơ̆n. Inh hơnơ̆ng gô chang gơnơm đe ‘nhŏng oh oei bơ̆ jang sir chă đei kơting mŏ inh vă iŏk ƀŭ hơmet tơ̆ pơsat linh lôch tang ăn teh đak tơ̆ xăh.”

Sơnăm ‘nâu đĭ 96 sơnăm bơih, mă lei y sĩ Đào Ngọc Thạnh oei ƀlŏk hơnơ̆ng anih pơm Hnam pơgang B23 păng anih ƀŭ lơ bôl boăl sơ̆. Ƀok tơroi, hla ar chih đei chih hơlen tôm tĕch bơ̆n pơlei pơla, khul linh kiơ, năr lôch tang păng tơdrong hơmet jĭ đơ̆ng 181 ‘nu linh lôch tang ăn teh đak. Năr lôch tang lơ̆m hla ar chih kiơ̆ jơnăr đe linh kơtĕch jơhngâm tơ̆ hnam pơgang, yoa thoi ƀât lăp kŭm đei glăi tŏ sĕt ƀiơ̆ pơting hăm hla ar chih tơroi bơngai lôch đơ̆ng Khul linh tơroi.

Pơđou dơ̆ng truh linh lôch tang ăn teh đak Trần Thị Lê, ƀok Đào Ngọc Thạnh oei ƀlŏk tôch hơdăh: “Trần Thị Lê, tơdăh ưh đei tơdrong kiơ tơplih đơ̆ng Anih pơgơ̆r khul linh apŭng Trà Bồng ‘nŏh oei ƀŭ tơ̆ Cà Đam. Tơdrong ‘nâu jĭ tơpă, ưh đei pha kiơ yoa kơdih kâu inh bơ̆ jang, chih tơroi ăn unh hnam thoi noh.”

Dôm chư đei chih lơ̆m hla ar hơdai hăm đon oei ƀlŏk đơ̆ng ƀok Thạnh oei jing tơdrong tôch gĭt kăl vă pơyoa ăn tơdrong jang 500 măng năr kơ dêh char Quảng Ngãi. Năm tơ̆ hnam păng pơih lăng hla ar chih, Đại tá Trịnh Công Sơn, Phó Chính ủy Anih chĕp kơ̆l pơgơ̆r khul linh dêh char Quảng Ngãi čhưu jơhngâm mưh ƀôh rim trong chư chih oei ‘lơ̆ng, tôch kăp gĭt: “Kiơ̆ đơ̆ng dôm nơ̆r tơroi âu, Anih pơgơ̆r jang kơ dêh char Quảng Ngãi vă hơnơ̆ng hơlen năng hăm dôm tơdrong kơtơ̆ng ang hlôi iŏk đei păng pơih lăng lơ̆m hla kak tơ̆ yăn âu. Mă loi lăng kiơ̆ dôm tơdrong chih răk tơ̆ tơring păng chăl arih kơ dêh char Quảng Ngãi lơ̆m khei ‘năr tơblăh sơ̆ vă chă rơih, hơnơ̆ng hơlen năng tơ̆ ‘ngoăih dơ̆ng.”

Hla ar chih đơ̆ng y sĩ tơ̆ hnam pơgang B23 sơnăm sơ̆ ưh lăp tơmam tôch kăp gĭt đơ̆ng tơblăh sơ̆ đĕch, mă oei jing “tơhnit” tơƀôh trong năm chă bôl boăl. Dôm tơdrong tơroi kăp gĭt âu gô hơnơ̆ng đei anih jang kơpal hơlen năng, pơm rơđăh; vang tơgop pơm hơdăh dôm tơdrong kăl vă jăh chơ iŏk đe linh lôch tang ăn teh đak vih dơ̆ng hăm unh hnam păng pơlei pơla kơdih./.