Kơdră chĕp pơgơ̆r Kuô̆k hô̆i tơbăt, khei năr ou ki, Kuô̆k hô̆i hlôi tơplih ‘nao jơhngơ̆m đon pơjing khôi luơ̆t, atŏk kơtang jang kiơ̆ tơplih kơsô̆ păng kmăi kmŏk gơh hơgei lơ̆m bơ̆ jang tơ iung pơjing khôi luơ̆t.Mă lei, bơ̆ jang tơbăt khôi luơ̆t oei lăng jrŭ mĭnh pang, tim mă pơjing đei mơ̆t lĕch hăm kon pơlei. Tơdrong đei ƀôh mă ou, Kơdră chĕp pơgơ̆r Kuô̆k hô̆i athei trong vă pơjing khôi luơ̆t kăl pơjing hơyak pran kơtang găh tơplih kơsô̆ lơ̆m tơbăt ăn, pơtho tơbăt khôi luơ̆t.“Bơ̆n kăl tơplih kơsô̆ mă kơtang hloh dơ̆ng lơ̆m bơ̆ jang tơbăt ăn, pơtho tơbăt khôi luơ̆t, veh ver đei trong so mă kăl lăng truh pơma dơnuh dih băl lơ pang. Tơdrong yan ou hrei ‘nou, jang kiơ̆ kơsô̆ lơ̆m pơrô̆ tơbăt khôi luơ̆t ‘nao lăp pơm kiơ̆ lơ̆m tơdrong chih tơmơ̆t kiơ̆ hlak PDF lơ̆m rim cổng thông tin điện tử, tơnap mă hơvơn đei kon pơlei chă lăng. Trong vă pơjing Khôi luơ̆t kăl pơjing đei tơdrong tơchơ̆t găh khôi luơ̆t mă hơdăh tơdrong tơ iung pơjing trong jang kơsô̆ teh đak tơƀôh tơbăt, pơtho tơbăt khôi luơ̆t. Kăl pơjing ‘lơ̆ng hơnăp jang kơ rim hơnih pơm tơlĕch lơ̆m tơdrong pơtruh ăn yưh liu jơ̆p jang (open data) vă tơmơ̆t hloi lơ̆m rim tơmam AI, Chatbot jang kơdih, tơgŭm ăn tơblang hơdăh khôi luơ̆t ăn kon pơlei prăt măng năr lơ̆m 7 năr”.

Găh trong mơ̆t lĕch dih băl, ưh khan lăp tơbăt kiơ̆ mĭnh pang đơ̆ng hơnih bơ̆ jang teh đak pơtruh ăn; trong vă pơjing kăl tơmơ̆t dơ̆ng tơdrong tơchơ̆t găh trong sơng iŏk nơ̆r pơtruh ăn, tơbăt hơdăh tơdrong hlôh vao dang yơ păng pơtŏ băt hơdăh tơdrong hlôh vao khôi luơ̆t kơ kon pơlei ‘moi kiơ̆ kmăi kmŏk kơsô̆ vă tơtom hơmet ming trong pơtho tơbăt.

Pơma truh tơdrong kăl hơlen hơdăh dôm bơngai kăl păng pơtruh tơbăt ăn rim răih bơngai, Kơdră chĕp pơgơ̆r Kuô̆k hô̆i tơbăt, Khôi luơ̆t sơnăm 2012 sơkơ̆t hơdăh khul rim bơngai kăl (nhen kon pơlei kon kông, bơngai jo jăn, bơngai pơnă) mă lei trong hơlen băt oei tim mă hơdăh. Kơ yuơ lơ oh, kăl tơmơ̆t dơ̆ng rim trong hơlen vă sơkơ̆t hơdăh khul gĭt kăl kiơ̆ tơring, sơnăm ‘lŏ, tơdrong oei sa.

Kơdră chĕp pơgơ̆r Kuô̆k hô̆i pơma hơdăh, trong tim mă lăp lơ̆m jang kiơ̆ khôi luơ̆t ‘noh bơ̆ jang tơbăt ăn, pơtho tơbăt khôi luơ̆t ăn kon kông. Tơdrong tơm pơm ăn găh lơ kơ yuơ groi teh hơtăih yăih, kmăi kmŏk tơƀôh tơbăt tim mă jơnei păng tim gan hlôh vao nơ̆r pơma.

Trong vă pơjing Khôi luơ̆t kăl atŏk kơtang hơnăp jang đơ̆ng tơring lơ̆m pơtho tơbăt khôi luơ̆t nhen: kră pơlei, bơngai chĕp kơ̆l pơlei, bơngai đei kon pơlei lui yom, kơtum kơtŏng ‘nhŏng oh, rim khul vei lăng tơ̆ pơlei pơla. Adoi, tơplih đơ̆ng tơƀôh tơbăt tôm tong jing tơƀôh tơbăt “ lơ̆ng hơ iă” pơtih gia nhen kon pơlei jang tơdrong jang yă kiơ, hơrih sa tơ̆ tơring ayơ ‘noh đei pơtho tơbăt hloi dôm khôi luơ̆t đei ƀơm kơtă truh hăm tơdrong  oei sa kơ đe sư hloi. ‘Ngoăih kơ ‘noh, kăl hơmet pơ ‘lơ̆ng dôm tơdrong tim mă lăp găh hơnih dơ̆ng kơ Khul jang tơbăt ăn, pơtho tơbăt khôi luơ̆t rim kâp; hơmet pơ ‘lơ̆ng tơnap tap găh kon jên hu, mă kăl tơ̆ tơring păng tơdrong khul jang găh lơ jĭ hơgrop tơdrong jang.

‘Ngoăih tơdrong tơplih ‘nao trong pơrô̆ tơbăt, Kơdră chĕp pơgơ̆r Kuôk hŏi Trần Thanh Mẫn jei athei atok kơtang tơpôl vang iung jang tơbăt ăn, pơtho tơbăt khôi luơ̆t; đei trong tơgŭm pơtrŭt hơnih mơdro sa, khul jang păng khul luơ̆t sư, luơt ya vang iung jang pơtho tơbăt khôi luơ̆t ăn kon pơlei. “Inh tơchĕng: tơdrong chih hơmet Luơ̆t Tơroi tơbăt, pơtho pơhrăm gah khôi luơ̆t 'măng mă ou, ưh đei pơdơh ah tơdrong chih hơmet nơ̆r pơma dah mă chih tơmơ̆t dơ̆ng sơnong jang ăn rim hơnih jang, mă athei jĭ minh tơdrong jang tơplih hơdah gah tơdrong gơh yua; tơplih đơ̆ng đon tơchĕng hơdrô̆ vei lăng “asong ăn” jing trong jang pơvih pơvăn, tơgŭm ăn kon pơlei băt hơdah vă vei lăng kơdih po kiơ̆ khôi luơ̆t teh đak. Tơdrong chih hơmet luơ̆t 'măng mă ou 'noh kăp gĭt hloh, vă vei lăng 'lơ̆ng tơdrong jang tơroi tơbăt, pơtho pơhrăm gah khôi luơ̆t gơh iŏk yua 'lơ̆ng, iŏk yua trŏ ƀlep hăm kon pơlei. 'Nou jĭ tơdrong jang ưh hơdrô̆ hăm hơnih jang gah Khôi luơ̆t mă hăm tôm hơnih jang chĭnh trĭ hloi, đơ̆ng Đảng, jơnŭm pơgơ̆r tơring, Mặt trận truh jơnŭm jang lơ̆m tơpôl”.

Hăm tơdrong tơplih Luơ̆t Tơroi tơbăt, pơtho pơhrăm gah khôi luơ̆t, ưh hơdrô̆ vă keh đang tơdrong chih akŏm khôi luơ̆t, mă oei tơƀôh hơdah tơdrong jang khŏm đei kơ Kuô̆k hô̆i vă pơjing minh khôi luơ̆t tơjê̆ hăm kon pơlei, ƀônh hlôh vao păng pơvih pơvăn ăn kon pơlei gơh 'lơ̆ng hloh. Dôm nơ̆r tơgop ah 'măng pơma đam pơtoi ăn ƀôh: Kuô̆k hô̆i ling lang tơmơ̆ng nơ̆r pơtruh, tơdrong hơpơi 'meh đơ̆ng kon pơlei tah hla, vă keh đang tơchơ̆t jang, hơnhăk khôi luơ̆t gơh iŏk yua lơ̆m tơdrong hơrih.