Tơdrong jang ‘nâu tŏk bŏk đei khul jang kơpal pơgơ̆r bơ̆ jang hrĕnh tơ̆ 11 pơsat linh lơ̆m dêh char. Truh dang ei, hlôi jang đang tơdrong iŏk kơmẫu, chih tơmât lơ̆m kơmăy sô̆ tơ̆ 10 pơsat linh, đei Pơsat: Đức Linh, Cư Jút, Tuy Đức, Đắk R’lấp, Krông Nô, Đắk Mil, Đắk Nông, Bảo Lộc, Di Linh păng Đà Lạt. Dang ei khul jang kơpal oei akŏm jơhngâm bơ̆ jang tơ̆ Pơsat linh Bình Thuận, anih oei đei lơ pơsat kăl đei sir iŏk kơting vă pơm mẫu, chih tơmât lơ̆m kơmăy sô̆ tôch lơ, hăm 3.431 tŏ pơsat.

Thiếu tá Lê Hữu Lập, Bơngai vei lăng Grŭp jang kơmăy sô̆ 3, tơroi: “Hăm tơdrong chih tơmât lơ̆m kơmăy sô̆ ‘nŏh đei pơgơ̆r dar deh. Dôm bơngai jang lơ̆m grŭp jang hơdoi hăm Anih jŏh ayŏ kơ dŏ xoang xăh, Anih pơgơ̆r khul linh xăh, phường năm truh tơ̆ rim pơsat vă chih hơdăh rim tơdrong kiơ̆ 8 hơyak mă Anih pơgơ̆r jang 515 kơ dêh char hlôi pơtho tơƀôh. ‘Ngoăih kơ 8 hơyak ‘nŏh, nhôn kŭm pơgơ̆r hơlen năng tơ̆ rim pơsat”. Tơchĕng adrol đĭ đăng tơdrong jang gô jang đang ƀât hơtuch khei 8, hrôih ƀiơ̆ 2 khei pơting hăm năr hơgăt.