Dêh char Lâm Đồng đei 5 xăh sơlam tơ̆ kông ‘nŏh Tuy Đức, Quảng Trực, Thuận Hạnh, Thuận An păng Đắk Wil. 5 xăh âu dang ei đei 47 anih pơtho pơhrăm hăm 39 hnam trưng teh đak pơjing, 5 hnam trưng đơ̆ng kon pơlei pơjing.

Kiơ̆ yă Lê Thị Bích Liên – Kơdră Anih vei lăng pơtho pơhrăm dêh char Lâm Đồng, hlôi đei 2 tơring sơlam, ‘nŏh xăh Thuận An păng Quảng Trực oei hơmet tôm tơdrong vă tơlĕch man hnam trưng kơtă lơ̆m sơnăm 2025 âu hloi. 1 Hnam trưng đei 30 lăm, gơ̆h pơtho ăn dang 1.000 ‘nu hŏk tro. Dôm hnam trưng âu đei hơmĕng gô tơgŭm ăn hŏk tro tơ̆ tơring sơlam đei anih oei xa, hŏk pơhrăm sơđơ̆ng ‘lơ̆ng, vang tơgop atŏk tơiung khul bơngai jang păng hơmet kơjăp tơdrong sơđơ̆ng teh đak tơ̆ tơring sơlam.