Đơ̆ng ‘năr 1/7 truh ‘năr 15/9 Anih pơm hla ar teh kơ dêh char Lâm Đồng iŏk pơm hlŏh 77.100 blăh hla ar teh păng ‘nao pơm đei hlŏh 58.500 blăh hô sơ đĕch. 124 xăh, phường, tơring gĭt kăl kơ dêh char iŏk pơm hlŏh 24.200 blăh hô sơ, pơm đang 13.300 blăh. Tơdrong ‘nâu ăn ƀôh, hlŏh 32.000 blăh hla ar teh tam đei pơm đang.

Ƀok Bùi Thanh Hà, Phŏ Kơdră Anih vei lăng choh jang xa păng cham char Lâm Đồng, ăn tơbăt, oei đei lơ tơdrong tơhlăk mưh iŏk pơm hla ar teh. Vă hơmet pơ ‘lơ̆ng pơmat tat, tơhlăk tăk hơtŏk hrĕnh tơdrong iŏk pơm hla ar teh, Anih vei lăng choh jang xa păng cham char Lâm Đồng oei tơlĕch jang lơ trong, lơ̆m noh đei hơmet pơ ‘lơ̆ng trong pơm hla ar, vang jang hơdoi đơ̆ng lơ anih; hơtŏk tơdrong roi tơbăt, pơtho tơƀôh ăn kon pơlei iŏk yoa kơmăy pơm hla ar trư̆k tuyê̆n.