Jơ̆p dêh char Lâm Đồng dang ei đei 1.581 hơnih pơtho pơhrăm hăm jê̆ 841.000 hŏk tro păng 25.799 lăm hŏk. Mă lei, hnam trưng lăm hŏk oei tơklah rah rai, hăm 770 hơnih hnam trưng le; jơ̆p dêh char adoi oei kơƀah hloh  5.300 bơngai pơtho, bơngai jang pơtêng hăm pơkăp tơlĕch.

Jê̆ truh sơnăm hŏk 'nao, rim hơnih pơtho pơhrăm kơ dêh char Lâm Đồng tŏk bŏk hăt hot hơlen lăng lăm hŏk, unh hơyuh, đak, internet, hnam pơyơ̆ng păng tơmam drăm pơtho pơhrăm; hơmet dôm hơnih hư răm, ưh đei lê̆ hŏk tro hŏk lơ̆m lăm ưh đei sơđơ̆ng. Dôm tơdrong ming man hnam trưng hŏk đei hơtŏk tenh, hơdrin keh đang hơdrol kơ năr 15/8.