Tơtenh hơtăl rim 'nŭng cha ram 'nao lôm đang tah lơ̆m kơtuh hơngeo, pơmai Ngô Thị Thu tơ̆ phương Quy Nhơn ăn tơbăt, kơtuh hơngeo ou jĭ tơmam mă Kơđông linh 'Măng sơlam Quy Nhơn asong ăn pơmai đunh kơ ou 1 sơnăm. Rim kơmăng pơmai tơgenh chă pơm atăm, 'măn cha ram lơ̆m kơtuh hơngeo vă ah pơgê dơning năm tĕch. Pơmai Thu tơroi, tơdrong hơrih unh hnam tơnap tap, klo noh ƀơm sar bar trong gre nơnăm, ƀĭch minh hơnih hloh 20 sơnăm kơ ou. Đei xa yua đơ̆ng tơdrong jang pơm cha ram, hlôi tơgŭm pơmai đei jên pơvih ăn tơdrong hơrih, đei jên răt pơgang ăn kơ klo păng rong 'me kon hŏk pơhrăm: “Hơdrol ki năm lôm cha ram ăn kơ đe xa jên hơpah, inh tơroi hăm đe pơmai jang lơ̆m jơnŭm drăkăn. Đe 'nhŏng jang tơ̆ anih linh vei sơlam teh băt tơdrong noh asong ăn kơ inh kơtuh hơngeo, inh lôm atăm dơ̆ng vă năm tĕch tơ̆ ou. Inh ƀôh sơđơ̆ng ƀiơ̆ mơ̆n, vă rong 2 'nu kon păng klo. Ba vei lăng 'lơ̆ng, vei rơgoh tơmam drăm xa. Đe 'nhŏng jang tơ̆ anih linh vei sơlam teh adoi krao điê̆n thuăi chă apinh jet gia. Inh hơdrin jang vă tŏk ƀiơ̆”

Pơm kiơ̆ trong jang “Rim giĕng tơgŭm minh unh hnam hin dơnuh”, đơ̆ng sơnăm 2023 truh dang ei, Ƀô̆ đô̆i vei sơlam teh dêh char Gia Lai hlôi tơgŭm 750 unh hnam hin dơnuh, unh hnam tơjê̆ hin dơnuh păng unh hnam xa tơgŭm; hơvơn hloh 810 triu hlj, 1,7 tâ̆n phe, 47 trong jang vă hơrih xa atŭm hăm jê̆ 3.000 năr jang tơgŭm kon pơlei hơmet ming hnam oei. Sơnăm 2024, trong jang đei Anih jang Tuyên giáo Trung ương pôk jing minh lơ̆m tơpơh trong jang “Pơrô̆ pơrôp rơgei” ang hơdah lơ̆m teh đak.

Trung tá Nguyễn Tùng Giang, jang Chinh trĭ tơ̆ Kơđông linh vei lăng 'Măng sơlam Quy Nhơn ăn tơbăt: lơ̆m tơdrong tơlĕch jang, anih linh hơnơ̆ng jang kơjăp hăm jơnŭm pơgơ̆r tơring păng rim anih jang tơpôl vă chă hơlen lăng mă hơdah, rơih trong jang tơgŭm mă trŏ ƀlep hăm tơdrong hơrih. Dôm unh hnam oei đei jơhngơ̆m pơm jang đei asong ăn tơmam drăm dah mă trong pơm jang vă hơtŏk mŭk drăm, hơtŏk klaih đơ̆ng hin dơnuh. Hăm dôm unh hnam teh đak tơgŭm, bơngai kră hơdrô̆ hơdrăn, kan ƀô̆, khul linh kơtă tơgŭm hơmet hnam oei, hơmet tơmam drăm yua lơ̆m unh hnam. Trong jang ou ưh hơdrô̆ pơyua kăp gĭt mă oei tơgŭm ƀô đô̆i tơjê̆ hăm kon pơlei hloh, tơguăt hăm tơring: “Đon pơkăp đơ̆ng kơđông noh athei tơpă, kiơ̆ pơkăp băt hơdah đơ̆ng tơring kiơ̆ tơroi tơbăt đơ̆ng măt trâ̆n, jơnŭm jang drăkăn, jơnŭm bơngai jang mir... vă chă đei trong pơm jang trŏ ƀlep vă tơgŭm. 'Nhŏng oh truh rim hnam chă apinh hơdah unh hnam 'noh kăl dôm tơdrong kiơ, mưh hloh kơ tơdrong kĕ đei hăm anih linh noh gô jang hơdoi hăm dôm anih jang nai vă chă trong tơgŭm. Dang ei dôm trong pơm jang hlôi đei tơlĕch jang tơnăp”

Oei tơ tơring groi kông gah Pơmơ̆t dêh char Gia Lai, ah hơtuch khei 10/2025, Khul jang Mŭk drăm – Anih linh 75 (Binh đoan 15) hlôi pơjao 51 tŏ rơmo yŏng chông kon ăn dôm unh hnam hin dơnuh păng tơjê̆ hin dơnuh lơ̆m 10 thôn, pơlei kơ 2 xah Ia Krêl păng Đức Cơ, hăm kơsô̆ jên hloh 1 tih hlj. Atŭm khei năr noh, Binh đoàn oei pơjao tơdrong jang đei  “Hơnglŏng hơdah pơlei pơla”- đei unh tơ̆k hơdah hăm unh hơyuh jơ̆ng 'năr hơtaih 5,2 km, pơlăp tơ̆ ƀar pơlei Nẻh păng Al Gôn, đei kơjă hloh 427 triu hlj. Tơdrong jang đei tơgŭm tơ̆k hơdah tôm jăl trong lơ̆m tơring oei xa, hnam trưng hŏk, hnam hơkŭm tơpôl păng hnam khop. Ƀok Phùng Văn Cường, Phŏ Kơdră Anih jang vei lăng kon pơlei xah Ia Krêl sơkơ̆t hơdah: “Ou jĭ tơdrong jang kăp gĭt hloh, dơnưp 'lơ̆ng hăm kon pơlei lơ̆m dôm pơlei pơla lơ̆m xah Ia Krêl, kon pơlei chă vih vơ̆t ƀônh hiôk hloh, da ƀiơ̆ kơ sar bar trong nơnăm păng đei trong jang tơjur hin dơnuh sơđơ̆ng 'lơ̆ng. Mă Binh đoàn 15 oei lơ tơnap tap mơ̆n mă lei adoi oei akŏm vă tơgŭm ăn jơnŭm pơgơ̆r tơring pơm jang đei jơnei tơdrong jang pơjing tơring tơrang 'nao”

Đại tá Khuất Bá Cao, Ƀĭ thư Đảng uy, Phŏ Kơdră anih linh Binh đoàn 15 ăn tơbăt: hăm trong tơlĕch jang “tơgŭm trong jang xa, tơ̆k hơdah đon lui”, lơ̆m sơnăm 2024, Binh đoan hlôi keh đang 23 tơdrong jang hăm jê̆ 45 km trong tơlei unh, 1.500 jrăng unh, hăm kơsô̆ jên jang 4 tih hlj; sơnăm 2025 tơlĕch jang 13 tơdrong dơ̆ng, đei kơjă hloh 3 tih hlj. Atŭm hăm noh, anih linh hlôi tơgŭm sut lê̆ hloh 350 tŏ hnam pơgia, man hnam “Tơguăt tơguăl”, “Hnam 'mêm kơ-eng”, pơgơ̆r khăm hơmet jĭ, pơm trong nơnăm, pơm rông 'măn akŏm pơlei pơla. Đại tá Khuất Bá Cao ră hơdah: “Khei năr truh, Đảng uy kơ Anih tơm linh Binh đoan 15 gô pơgơ̆r rim anih linh mă po vei lăng hơtŏk jang hơdoi hăm rim jăl jang, jơnŭm pơgơ̆r tơring, tơlĕch lơ tơdrong jang kăp gĭt hloh dơ̆ng, pơm jang đei jơnei dôm tơdrong pơkăp jang kơ teh đak gah hơtŏk mŭk drăm – tơpôl tơring kon pơlei kon kông păng groi kông, atŭm jơhngơ̆m pơjing dôm pơlei pơla hơdah, jơk, rơgoh 'lơ̆ng, gơh hơgei, brư̆ brŭ hơtŏk tơdrong hơrih mŭk drăm”

Dôm tơdrong jang “Pơrô̆ pơrôp rơgei” kơ khul linh tơ̆ Gia Lai, ưh hơdrô̆ 'lơ̆ng gah trong pơm jang, gĭt gah đon bơnôh mă oei chĕp vei tơdrong kăp gĭt gah tơgŭm kon pơlei da ƀiơ̆ kơ tơnap tap, vă hơtŏk lơ̆m tơdrong hơrih. Dôm tơdrong jang ƀônh ƀŏ kăp gĭt noh hlôi tơgŭm kơhret kơjăp tơdrong tơbôl khul linh – kon pơlei, hơtŏk đon lui păng pơjing jơhngơ̆m pran tơguăt tơguăl tơ̆ tơring.