Sơnăm hŏk ‘nao ou, Y Hiển Nhi, kon drŏ kăn kơ ‘nhŏng A Trang, oei lơ̆m pơlei Kram, tơring Rờ Kơi, dêh char Quảng Ngãi mơ̆t hŏk lăm 1B Hnam trương teh đak rong ‘me jăl Mĭnh-Jăl ƀar tơring Rờ Kơi. Ƀar giĕng ou ki, năr ayơ mon jei năm tơ̆ hnam trương vă pơm joăt hăm hnam trương hle. Dôm năr bŭng oei hlêng hlang, đei kô pơtho ăn phăl hơlăng, Y Hiển Nhi roi năr roi joăt hăm hnam trương ‘nao. 

Klo hơkăn ‘nhŏng A Trang, jang mir, prăt năr jang tơ̆ mir tơdrong ba chơ brŏk kon hơ ‘lơ̆p năm hŏk jĭ mĭnh tơdrong tôch tơtăm. Sơnăm hok ‘nao ou, ‘nhŏng A Trang sơđơ̆ng jơhngơ̆m bơih mưh Hnam trương Teh đak rong ‘me Jăl Mĭnh-Jăl ƀar tơring Rờ Kơi ăn oei sa kơ ‘năr dơ̆ng, oei sa hloi kơna tơdrong hok pơhrăm, oei sa păng chơ kon hơ ‘lơ̆p jei rơvơn hloh: “Tơ̆ ou kon pơlei jang prăt năr gleh hrat, đei ‘măng kơ ‘năr dơ̆ng ưh kơ đei jơ vă chơ kon hơ ‘lơ̆p năm hŏk. Tơdăh đei oei sa kơ ‘năr dơ̆ng lei tôch rơvơn ăn mĕ ƀă hŏk tro, kơ yuơ kon pơlei jang sa tơ̆ ou jĭ jang sa hăm jơ̆ng ti, prăt năr jang sa hơtăih kơ hnam, ưh kơ đei jơ vă sơng kon hơ ‘lơ̆p. Mĕ ƀă hŏk tro jei tôch chơt hơ iă mưh rim kon hơ ‘lơ̆p năm hŏk sơđơ̆ng, hnam trương đei dur pơgar ‘lơ̆ng. teh đak tơgŭm tơring hơtăih yăih sơlam teh đak lơ loh, mĕ ƀă hŏk tro hơ iă dêh. Jei hơpơi ‘meh vă đơ̆ng rŏng ou kơnh kôn mon kon sou hoei pơm lao đon, hơdrin hŏk pơhrăm mă hơgei”.

Sơnăm hŏk 2026-2027, Hnam trương Teh đak rong ‘me Jăl Mĭnh-Jăl ƀar tơring Rờ Kơi đei 1.156 ‘nu hok tro, đei hŏk lơ̆m 34 lăm ‘noh đei 20 lăm jăl kơđeh păng 14 lăm jăl ƀar. Găh tơdrong oei sa, sơđơ̆ng, tang găn ŭnh sa, pĭt ŭnh sa păng sơđơ̆ng rơgoh tơmam drăm sa đei hơmet ăn đơ̆ng hrôih. Hnam trương jei pơgơ̆r pơtho pơhrăm ming ăn kang ƀô̆, ƀok thây kô, bơngai jang găh bơ̆ jang vei lăng năng tông hŏk tro oei sa kơtă, oei sa kơ ‘năr dơ̆ng. 

Hnam trương Teh đak rong ‘me Jăl Mĭnh-Jăl ƀar tơring Mô Rai tŏk bok lơ̆m khei ‘năr vă ming man keh đang, tim mă gơh vă tơmơ̆t iŏk yoa tom lơ̆m jơ ‘năr pơm lêh mơ̆t hŏk sơnăm hŏk ‘nao. Tơring pơrô̆ hơvơn pơđĭ khul chinh trĭ păng khul yân kuân, Ƀô̆ đô̆i vei lăng sơlam teh đak păng Kong ty 78, Binh đoàn 15, tơgŭm djru jang keh đang dôm hơnih jang tim mă đang. Mĭnh năr đei dang 30 ‘nu kŏng nhân vang chă hơpuih hơmet, iung jang dôm tơdrong ou to vă keh đang ƀlep jơ ‘năr pơkă.

Kơ yuơ hnam trương ‘nao tim mă gơh vă tơmơ̆t hŏk pơhrăm hloi, hŏk tro jăl kơđeh păng jăl ƀar oei hŏk tơ̆ hnam trương so, sơđơ̆ng ăn trong tơlĕch ăn hŏk pơhrăm. Rim lăm hŏk đei sơng tơmơ̆t hŏk tro mơ̆t hŏk hrôih kiơ̆ tơdrong tơchơ̆t. Ƀok Trương Công Chính, Bí thư Đảng tơring Mô Rai tơbăt, truh dang ei, khul kang ƀô̆ vei lăng păng ƀok thây kô pơtho hnam trương hlôi đei proh hơmet đang.

Lơ̆m jăl blung, dêh char Quảng Ngãi et hơtŏk 4 hnam trương teh đak rong ‘me tơ̆ rim tơring Dục Nông, Sa Loong, Rờ Kơi hăm Mô Rai lơ̆m năr 5/9/2026. Hơnih vei lăng Hnam trương pơtho pơhrăm dêh char Quảng Ngãi iung jang hơdoi hăm rim tơring dăr lăng, proh hơmet khul kang ƀô̆ vei lăng, ƀok thây kô pơtho, bơngai jang; jang keh đang trong krao mơ̆t hŏk, hơmet hơnih oei sa păng vei lăng năng tông đe hŏk tro. Rim kmăi kmŏk pơyoa ăn hŏk pơhrăm, hnam gŏ, hnam mong răk kơsơ̆p hla bơar hŏk, hơnih jang ... proh hơmet keh đang ăn iung jang sơđơ̆ng đơ̆ng blŭng sơnăm hŏk ‘nao hloi.

Ƀok Nguyễn Ngọc Thái, Kơdră chĕp pơgơ̆r Hơnih vei lăng Hnam trương pơtho pơhrăm dêh char Quảng Ngãi tơbăt, dêh char đei 9 hnam trương đei Trung ương tơmơ̆t jên jang, đei 4 hnam trương lơ̆m jăl blŭng păng 5 hnam trương lơ̆m jăl ƀar, akŏp kon jên tơmơ̆t jang vă jê̆ 2.000 ti hlak jên:“ ‘Nou jĭ trong tơlĕch jang tôch trŏ lăp păng tôch kơ ƀlep, ưh khan lăp pơvih pơvăn ăn hŏk pơhrăm mă oei đei ƀơm truh tơdrong sơđơ̆ng dơ̆ng kơjăp, vei lăng sơđơ̆ng Teh đak, sơđơ̆ng tơring sơlam. Hơnih vei lăng Hnam trương pơtho pơhrăm dêh char Quảng Ngãi hlôi pơchoh trong ăn Hơnih vei lăng kon pơlei dêh char Quảng Ngãi hơvơn rim khul, iung jang kơtang, hơdrin đĭ ai iung jang dăr lăng dơ̆ng rim tơdrong tơchơ̆t păng tơmơ̆t lơ̆m pơgơ̆r pơm lêh blŭng sa sơnăm hŏk ‘nao ƀlep hăm trong tơlĕch jang đơ̆ng dêh char".

Đơ̆ng Rờ Kơi truh tơ̆ Mô Rai, Sa Loong, Dục Nông, dêh char Quảng Ngãi, dôm pơbŭng hnam trương ‘nao roi năr roi đei ƀôh lơ̆m tŏk bŏk tơring sơlam teh đak, hơnhăk ba tơdrong chơt hơ iă păng hơmŏ kơ đe hŏk tro, mĕ ƀă hŏk tro păng ƀok thây kô pơtho. Mưh đe hơ ioh đei hŏk pơhrăm tôm, kon pơlei sơđơ̆ng jơhngơm tơklep kơjăp hăm groi teh, pơlei, atŏk tơ iung mŭk drăm, vei lăng tơring sơlam kơ Teh đak.