Phó Thủ tướng Nguyễn Hòa Bình, Kơdră khul jang roi tơƀôh găh hơchăng ăn bơngai yoch brok hrôih đơ̆ng hnam phak sơnăm 2025 ‘nao pơgơ̆r hop akŏm hơlen năng hla ar hô sơ, hơnăn dôm bơngai đei tôm tơdrong kăl vă gơ̆h asong brŏk đơ̆ng hnam phak hrôih lơ̆m đơt 2, ƀlep ƀât tơbăt 80 sơnăm Quốc khánh 2/9.

Bơ̆ jang kiơ̆ tơdrong tơchơ̆t  đơ̆ng Kơdră teh đak, khei ‘năr âu ki, dôm grŭp hơlen năng đơ̆ng dôm anih jang pơgơ̆r hơlen năng hlŏh 10.000 blăh hla ar hô sơ bơngai yoch đơ̆ng dôm hnam phak lơ̆m teh đak. Tơdrong set hơlen đei pơgơ̆r tôch kơjăp, rơđăh rơđong, trŏ khôi luơ̆t, đei tơdrong dăr lăng đơ̆ng dôm khul grŭp lơ̆m tơpôl.

Phó Thủ tướng pơma hơdăh, hơchăng asong brŏk hrôih đơ̆ng hnam phak jĭ trong jang tih, tơƀôh hơdăh tơdrong 'lơ̆ng, băt 'mêm mơnat đơ̆ng Đảng păng teh đak, vă pơlung bơngai pơm yoch adrin hơmet pơ 'lơ̆ng jơhngâm đon, jăh mât oei xa dơ̆ng hăm tơpôl. Đơ̆ng rŏng kơ hơlen năng đang, Khul vă tơroi ăn Kơdră teh đak kĭ tơchơ̆t; kiơ̆ trong jang, 'năr 29/8vă roi tơbăt tơdrong tơchơ̆t păng 'năr 1/9 vă pơgơ̆r hơchăng dôm bơngai đei asong brŏk đơ̆ng hnam phak hrôih âu.