Mă blŭng, tơroi găh tơmơ̆t jên tơ iung pơjing khul bơ̆ jang ăn atŏk tơ iung pơtho pơhrăm tơ̆ tơring tơnap tap, bơngai tang măt Nguyễn Đại Thắng, khul Hưng Yên athei:“Ĭnh athei tơmơ̆t dơ̆ng mĭnh chăl ‘nao lơ̆m Apăng 19 “Teh đak tơlĕch kon jên jang păng đei trong tơgŭm djru ăn rim hnam trương pơtho pơhrăm tơ̆ tơring tơnap tap, tơring hơtăih yăih, tơring sơlam teh đak, achon dơsĭ păng tơring kon kông lơ̆m jang kiơ̆ tơplih kơsô̆; sơđơ̆ng hơtŏ dih băl lơ̆m tơdrong iŏk yoa yưh liê̆u găh pơtho pơhrăm”. Lơ loh gô iung jang jơnei lơ̆m tơlĕch jang tơdrong tơgŭm djru păng tơdrong pơjing đei hơtŏ dih băl găh tơdrong iŏk yoa kmăi kmŏk lơ̆m rim hnam trương pơtho pơhrăm”.

Găh Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t Pơtho pơhrăm, tơdrong kăl lăng truh ‘noh tơchơ̆t hơmet ming, tơmơ̆t dơ̆ng ‘moi kiơ̆ trong Teh đak pơjing đei kơsơ̆p hla bơar hŏk pơhrăm lei lăi dih băl lơ̆m teh đak. Bơngai tang măt Nguyễn Thị Mai Thoa, khul Hưng Yên pơma tơbăt jơhngơ̆m đon:“Hơnih chih pơjing kăl rơih tơdrong ‘lơ̆ng hơ iă hloh lơ̆m rim kơsơ̆p vă pơjing đei kơsơ̆p hla bơar hŏk pơhrăm ‘nao đei hơmet ming, proh hơmet trŏ lăp ‘noh kơsơ̆p hla bơar hŏk ‘nao mă iŏk yoa ‘lơ̆ng hơ iă hloh, hơmet pơ ‘lơ̆ng dôm tơdrong tim mă hơ iă kơ rim kơsơ̆p hơdrol ou, iŏk yoa ‘lơ̆ng kơsơ̆p hla bơar hŏk vă tơlĕch trong pơtho pơhrăm ‘lơ̆ng hơ iă”.

Lơ̆m mă noh, mĭnh ƀar ‘nu bơntgai tang ăt athei iŏk đơ̆ng blŭng sơnăm 2026 đei 1 kơ loăi kơsơ̆p hla bơar ăn pơtho pơhrăm lơ̆m teh đak ‘noh hăt hot dêh hnang. Tơ̆ hơnăp nơ̆r tơgop đơ̆ng rim kơdră tang măt, Kơdră chĕp pơgơ̆r Hơnih tơm vei lăng Hnam trương pơtho pơhrăm Nguyễn Kim Sơn tơbăt:“Tơdrong mă ou Hơnih tơm hlôi pơjing Tơdrong vă jang. Lơ̆m Tơdrong vă jang hlôi đei rim trong jang păng gô apĭnh nơ̆r tơgop đơ̆ng Tổng Bí thư, pơtruh ăn Thủ tướng kĭ tơchơ̆t. Hơnih tơm gô hơdrin iung jang tĕnh koăng hloh ‘noh lơ̆m khei 11 gô đei trong tơlĕch ăn kăl păng gô tơroi tơbăt ou. Ĭnh apĭnh pơkăp gô jang keh đang tơtom”.

Tơdrong kăl hloh lơ̆m trong vă pơjing khôi luơ̆t pơtho pơhrăm hơmet ming ‘noh tơdrong pơjing tơdrong jang pơtho pơhrăm teh đak kon pơlei pơjing, pơjing dơ̆ng pơtho pơhrăm jăl ƀar hŏk hloi tơdrong jang, ăn asong đe hŏk tro hŏk keh đang hŏk jăl ƀar, adoi pơtho pơjing tơdrong jang, pơm pơ ‘lơ̆ng trong hŏk pơhrăm kiơ̆ trong hŭt hloi ƀăng lĕch ‘măng khoă jăl ƀar păng gơh jang ƀơk ăn ƀăng lĕch ‘măng khoă jăl pêng đơ̆ng kơdră chĕp pơgơ̆r Hơnih vei lăng Hnam trương pơtho pơhrăm ăn kơ Kơdră chĕp pơgơ̆r Hnam trương…

Bơngai tang măt Nguyễn Thị Việt Nga, khul Hải Phòng tơƀôh hơdăh tơdrong yan ou tơdrong pơtho pơhrăm jăl ƀar pêng hrei ou tôch trăp trĭn, pơm ăn truh pơtho dơ̆ng, hŏk dơ̆ng kơ yuơ ƀok thây kô ưh kơ tom pơtho pơhrăm tôm tơdrong tơ̆ lăm hŏk pơhrăm. Lơ̆m mă noh, hŏk tro ưh kơ gan hlôh vao rim tơdrong hŏk pơhrăm păng tơdrong oei sa tơpôl:“ ‘Ngoăih kơsơ̆p hla bơar hŏk pơhrăm ‘noh trong pơtho pơhrăm jei tôch gĭt kăl. Đei ƀok thây kô pơtho toán pơma akhan, hŏk tro gơh pơm ƀai phương trình, ƀơ̆t phương trình, mă lei mưh năm tơ̆ kơchơ chă jô̆ hơlen kon jên răt ‘nhot, răt ka ‘noh vơ̆l dơ̆ng. Hlôh vao găh tơdrong hơrih sa kơ rim đe oh oei tim mă hlôh vao. Kơna mưh pơjing dơ̆ng trong hle, pơjing đei kơsơ̆p hla bơar hŏk pơhrăm mă hơlen kơjăp găh tơdrong ‘nou”. 

          Chă pơma dơnuh tơ̆ khul, rim kơdră tang măt tơ̆ khul, rim kơdră tang măt Kuô̆k hô̆i jei lăp đon hăm hŭt hloi tơdrong tơchơ̆t ƀơk ƀăng lĕch ‘măng khoă jăl ƀar, lăp tơchơ̆t drơ̆ng nơ̆r hŏk ƀă hŏk keh đang jăl ƀar kơ yuơ Kơdră chĕp pơgơ̆r hnam trương pơtho pơhrăm tơchơ̆t. Tơdrong tơchơ̆t ou trŏ lăp hăm trong pơtho pơhrăm truh hŏk pơhrăm jăl ƀar, hơmet pơ ‘lơ̆ng trong bơ̆ jang, pơm dă ƀiơ̆ pơmat tat lơ̆m pơlong hŏk pơhrăm ăn hŏk tro.