Tơ̆ jơ pơm lêh, Quân ủy Trung ương, Hơnih tơm Ƀô̆ đô̆i hlôi pôk hơpăh ăn 35 khul păng 80 ‘nu bơngai jang “Pơrô̆ pơrôp hơgei” kơ Khul ƀô̆ đô̆i tơ̆ tơring kon kông păng groi kông jăl jang 2019-2024. 5 năm qua, Quân ủy Trung ương, Hơnih tơm Ƀô đô̆i, Hơnih tơm Chinh trĭ hlôi lăng ba chĕp pơgơ̆r, pơrô̆ tơlĕch jang kiơ̆ tơdrong jang pơting dih băl “Pơrô̆ pơrôp hơgei”, tơ iung pơjing “hơnih jang pơrô̆ pơrôp ‘lơ̆ng” hrơ̆p mĭnh ‘măng, tôm tong, ‘lơ̆ng, kơjăp, kơtang, trŏ lăp hăm tơdrong yan ou, tơklep kơjăp hăm jang kiơ̆ rim tơdrong jang, rim tơdrong pơrô̆ hơvơn kơ lơ̆m teh đak, iŏk đei jơnei hơ iă păng gĭt kăl ..., tơgop hơmet pơ ‘lơ̆ng vei lăng sơđơ̆ng Teh đak, sơđơ̆ng tơring, tơ iung pơjing kon pơlei vang vei lăng teh đak, pơjing đei jơhngơ̆m đon kon pơlei lui yom kơtang, vei kơjăp jơhngơ̆m đon kiơ̆ yok rok jơ̆ng, lui yom kơtang đơ̆ng rim hơdrung kon kông hăm Đảng, Teh đak, Khul ƀô̆ đô̆i; jang kiơ̆ ‘lơ̆ng hơnăp jang khul bơ̆ jang, khul choh jang sa, pơm hơdăh ang rang ‘lơ̆ng um rup “Ƀô̆ đô̆i Ƀok Hô” lơ̆m chăl hle.

Đơ̆ng sơnăm 2019-2024, rim hơnih bơ̆ jang lơ̆m khul ƀô̆ đô̆i vang iung jang pơgơ̆r pơrô̆ pơrôp hloh 250.000 jơ ‘năr hăm 20 triu ‘nu bơngai vang mơ̆ng; chă pơrô̆ pơrôp hloh 11.000 ŭnh hnam hăm vă jê̆ 56.000 ‘nu bơngai ưh kơ mơ̆t oei glăi păng hloh 20.000 ‘nu hŏk tro vih năm hŏk hơlơ̆k dơ̆ng. Hlôi jang hơdoi pơgơ̆r pơtho tơbăt găh tơdrong vei lăng sơđơ̆ng teh đak, sơđơ̆ng tơring ăn hloh 18.300 ‘ju kră pơlei, thôn trơng, bơngai đei kon pơlei lui yom lơ̆m kon kông; vang mơ̆t jang lơ̆m Yân kuân tư̆ vê̆, khul jang hmŏ kơ tơring groi kông kơjăp ‘lơ̆ng; xek tơlang keh đang rim tơdrong mơmat tat tơ̆ tơring, ưh kơ lê̆ đei” jing tơdrong tŏ đon” lang să, pơdui đunh...

Thiếu tá Nguyễn Thị Thúy, Công ty 723, Binh đoàn 15 (bơ̆ jang lơ̆m groi teh apŭng Đức Cơ Gia Lai) hlôi pơrô̆ pơrôp jơnei mĭnh ƀar ‘nu kon pơlei hŭt hloi tơdrong lui chrih chrĕng brŏk vih hăm ŭnh hnam tơroi:“Lơ̆m mĭnh ‘măng ĭnh năm tơ̆ pơlei vă pơrô̆ kon pơlei ‘noh mĭnh ‘nu hơ ioh năm koăr jơ̆ng ĭnh, bơngai hơ ioh pơma, duch ăi, duch tơchă mĕ tơgŭm mon bĕ, mon hơdơ̆r kơ mĕ dêh duch ăi. Jơhngơ̆m đon bơngai pơm mĕ ƀă jei băt hơdăh, mưh bơngai hơ ioh pơma lơ loh ‘noh, sư ƀlŏk hơdơ̆r kơ mĕ pă băt dang yơ bơih. Ĭnh hăm bôl boăl lơ̆m khul bơ̆n hlôi tơchơ̆t chĕp ba mon mơ̆t lơ̆m bri vă atŭm hăm nhôn chă pơtho khan ăn mĕ mon păng mĭnh ƀar ‘nu kon pơlei brŏk vih hăm pơlei pơla dơ̆ng.”

Iung pơma tơ̆ pơm lêh, Thượng tướng Trịnh Văn Quyết, Kơdră chĕp pơgơ̆r Hơnih tơm Chinh trĭ, Khul Ƀô̆ đô̆i kon pơlei Việt Nam sơkơ̆t hơdăh, tơring kon kông păng groi kông ‘noh jing tơring kăl hloh lơ̆m atŏk tơ iung mŭk drăm, joh ayŏ, tơpôl, vei lăng sơđơ̆ng teh đak, sơđơ̆ng tơring, jang tơbôl. Tơdrong jang ƀôh hơdăh kĕch mang Việt Nam hlôi tơƀôh hơdăh, kon pơlei rim hơdrung ling lang tơgoăt tơgoăl pôm nơ̆r ƀơ̆r đon păng tơgop tih tên lơ̆m tơdrong jang kĕch mang kơ Đảng, lơ tơring groi teh hlôi đei jing hơnih tơm iung tơblăh, hơnih rong ‘me păng vei lăng kang ƀô̆, ƀô̆ đô̆i, rơbăn ‘nu kôn mon kon sau rim hơdrung kon kông hưch ang iung năm pơm ƀô̆ đô̆i, tơgop atŭm hăm kon pơlei lơ̆m teh đak iŏk đei jơnei gĭt kăl lơ̆m tơdrong jang vei lăng năng tông Teh đak. Bơ̆ jang pơrô̆ pơrôp hơnơ̆ng sơkơ̆t hơdăh, Khul Ƀô̆ đô̆i đơ̆ng kon pơlei mă đei, kơ yuơ kon pơlei mă iung tơblăh. Tơƀôh hơdăh teh đak bơ̆n tŏk bŏk mơ̆t lơ̆m chăl atŏk tơ iung hơnŭk hơnoa, pơdrŏng, kăl pơjing đei cham char rơvơn vă atŏk kơtang kiơ̆ yok rok jơ̆ng jơhngơ̆m đon ‘mêm kơ eng teh đak, jơhngơ̆m đon hơdrin kơdih, tơdrong đei, pran kơtang đơ̆ng kon pơlei rim hơdrung, tơgŭm ăn kon pơlei hơnơ̆ng tơgop jơhngơ̆m đon lơ̆m tơdrong jang tơ iung pơjing teh đak, Thượng tướng Trịnh Văn Quyết athei:“Khul kơdră chĕp pơgơ̆r păng kang ƀô̆, ƀô̆ đô̆i lơ̆m khul ƀô̆ đô̆i, lơ̆m ou đei rim khul, rim bơngai gơ̆h hơgei pran kơtang đei pôk pơ ư ‘măng mă ou hơnơ̆ng jang kiơ̆ ‘lơ̆ng hloh dơ̆ng hơnăp jang tơm, tơpă jing hơnih gơnang, tơklep kơjăp hăm kon pơlei lơ̆m rim tơdrong jang. Iung jang kơjăp hăm kơdră chep pơgơ̆r Đảng, kơdră chĕp pơgơ̆r tơring chă pơrô̆ pơrôp, pơtho khan ăn kon pơlei mĭnh jơhngơ̆m đon lui yom  kơtang lơ̆m tơdrong chĕp pơgơ̆r đơ̆ng Đảng, hơdrn kơtang choh jang sa, atŏk tơ iung mŭk drăm, oei sa joh ayŏ tơpôl, hơmet pơ ‘lơ̆ng sơđơ̆ng teh đak, sơđơ̆ng tơring, pơm hơtŏk jơhngơ̆m đon kơchăng kĕch mang gơ̆h hơgei pran kơtang iung tơjră phă pơrăm kĕ dôm tơdrong tơchă trong pơhlŭ pơdôr, phă pơrăm đơ̆ng rim ayăt vă pơm chere tơdrong tơgoăt tơgoăl pôm nơ̆r ƀơ̆r đon hơdrĕch hơdrung.”

          Ƀlep lơ̆m jơ ‘năr ou, Hơnih tơm Ƀô̆ đô̆i tơlĕch tơdrong jang “Kôn mon kon sau kơ pơlei” rapor lơ̆m tơdrong rapor Pơdăh tivi Vei lăng teh đak păng đei chih tơmơ̆t lơ̆m rim ƀăo kơ Khul Ƀô̆ đô̆i vă pơrô̆ pơrôp, lang să dôm tơdrong jang 'lơ̆ng hơ iă, dôm tơdrong kơtơ̆ng ang, um rup ‘lơ̆ng găh tơgoăt tơgoăl pôm nơ̆r ƀơ̆r đon tơklep kơjăp dih băl ƀar păh ƀô̆ đô̆i hăm kon pơlei, lơ̆m ou đei kon pơlei kon kông păng groi kông.