Mưh khoa hŏk kmăi kmŏk păng tơplih kơsô̆ pă khan tơdrong hơtăih yăih bơih, mă lei hlôi jing tơdrong gĭt kăl hloh, lơ drŏ kăn kon kông hlôi tơgĕch tơdrong rơvơn ou. Hăm trong tơchăr hơgei, đe sư ưh khan lăp pơm pơdrŏng ăn ŭnh hnam kơdih mă oei lang să tơdrong oei sa joăt joe ‘lơ̆ng rŏ sơ̆ ki  kơ hơdrĕch hơdrung kơ dih, tơgop jang kiơ̆ hơ iă rim trong tơlĕch jang kơ Tơdrong vă jang 8 "Pơm kiơ̆ hơtŏ hơnơ̆ng drŏ nglo drŏ kăn păng hơmet pơ ‘lơ̆ng dôm tơdrong kăl ăn drŏ kăn păng đe hơ ioh" găh lơ̆m Tơdrong jang tơm teh đak atŏk tơ iung mŭk drăm-tơpôl tơring kon kông păng groi kông.

Mĭnh tơdrong pơm ăn hưch hanh ‘noh jĭ tơdrong jang đơ̆ng Khà Thị Hạnh, bơngai hơdruh hơdrung Thái đơ̆ng Lai Châu. Tih vơ̆ djơ̆ ‘lơ̆ng oei tơ̆ tơring groi kông, Hạnh băt hơdăh tơdrong kăp gĭt kơ rim kơ loăi ‘long pơgang tăp dăr kơdih. Ƀôh hơdăh y hŏk kô truyên tŏk bŏk roi năr roi hui bơngai băt truh, hăp kơrŭn đĭ ai hŏk pơhrăm tơ̆ Hnam trương Y Dược Lê Hữu Trác. Hăm hlôh vao tôm tơdrong, Hạnh ưh khan lăp băt hơdăh rim kơ loăi pơgang hla ‘long đơ̆ng kră sơ̆ mă oei băt pơm kiơ̆ khoa hŏk vă pơjing đei dôm pơgang đơ̆ng hla ‘long jing ‘lơ̆ng hơ iă păng chă iŏk yoa hiôk hloh.

Tơgĕch tơdrong hơ iă kơ TikTok, Khà Hạnh hlôi pơjing đei kênh "Tây Bắc TV". Dôm Video koay năm tơchă, phĕ koh, pơm tơlĕch hla ‘long pơgang atŭm hăm chă tơroi tơbăt ƀônh hlôh vao găh iŏk yoa pơgang hla ‘long ou hlôi pơm ăn lơ bơngai chă mơ̆t lăng, tơgŭm ăn pơgang hla ‘long Tây Bắc yak tơjê̆ hăm rim răih bơngai hloh dơ̆ng. “Mưh pơjing online Tây Bắc TV ‘noh nhôn pơjing mĭnh kênh hơdrol, nhôn hlôi sơkơ̆t hơdăh hơnih dơ̆ng kơ nhôn păng chă tĕch hlot tôch kơ lơ tơmam drăm choh jang sa, pơgang hla ‘long. Ba tơchĕng hơ lou, tơdăh lăp hơdrô̆ nhôn jang gơ̆h ‘noh kon pơlei anai ‘noh lơ liơ?. Đơ̆ng noh bơih nhôn pơjing dơ̆ng lơ kênh păng chă pơtho ăn tôch kơ lơ pơmai oh oei tơ̆ tơring hơtăih yăih adoi nhen găh tơmam drăm Ocop vă kơ băt pơm lơ liơ vă hơnhăk tơmam drăm bơ̆n tĕch mơdro lơ̆m online”.

‘Măng mă blŭng, Khà Hạnh lăp ‘meh vă tơbăt dih băl dôm tơdrong hlôh vao. Mă lei dôm nơ̆r pơma hôn bơnê đơ̆ng bơngai răt yoa găh tơmam drăm pơm tơlĕch hlôi tơgŭm ăn rim bơngai pran jăng grăng hơkou hloh dơ̆ng hlôi pơm ăn kơ sư sa roi hưch hanh hloh dơ̆ng. Hạnh ƀôh lơ lou: “Ĭnh ƀôh kon bơngai tơplih păng tơpôl jei tơplih. Tơdăh hơnih mơdro sa kơ bơ̆n ưh kơ ‘meh druh kiơ̆ lei bơ̆n ưh kơ kĕ druh kiơ̆ ôh. Hloh dơ̆ng Lai Châu ‘noh mĭnh tơring đei lơ tơmam drăm choh jang sa ‘lơ̆ng hơ iă, mă kăl ‘noh dôm pơgang hla ‘long gĭt kăl hui kơ đei. Mă lei lăp gô chang lơ̆m tơmoi tơmang pơhiơ̆ truh tơ̆ hơnih ‘noh tôch mơmat tat, găh tơdrong chă tĕch răt ưh kơ gan lơ. Păng ĭnh ƀôh tơmoi tŏk bŏk mơ̆t lăng lơ̆m online ‘noh tơmoi tơ̆ yơ ‘noh jei pơm ăn kơ ba tơ̆ noh hloi”.

Tơring kon kông păng groi kông ‘noh tơring hơrih sa kơ hloh 14 triu 600.000 ‘nu bơngai, tơmơ̆t vă jê̆ 15% măt bơngai lơ̆m teh đak, hăm ŭnh hnam dơnuh vă jê̆ 22%, lơ hloh lơ ‘măng pơtêng hăm jô̆ hơtŏ lơ̆m teh đak. Bơngai drŏ kăn kon kông jĭ dôm khul bơngai chiu pŭ trăm trĭn hloh đơ̆ng tơdrong pơngot rơvĕt dơnuh hin. Tơmơ̆t dơ̆ng, tơdrong hlôh vao kơsô̆ oei ƀôh hơdăh hloh dơ̆ng: măt bơngai kon kông iŏk yoa Internet păng đei kmăi tĭnh oei tŏ sĕt hloh pơtêng hăm jô̆ hơtŏ lơ̆m teh đak, pơm ăn trong găn ga kơtang hloh tơdrong ‘meh vă băt hlôh lơ̆m tơdrong jang mŭk drăm kơsô̆.

Mă lei, lơ̆m tơdrong long đei lơ ‘lơ̆ng hơ iă. Bơngai drŏ kăn kon kông ‘noh dôm bơngai băt hơdăh dôm tơdrong hlôh vao lơ̆m pơlei pơla, ji dôm bơngai tơ-‘ngla kơ tơmam drăm choh jang sa, dui brai vai tanh khăn ou to. ‘Nou jĭ dôm tơdrong kăl hloh tơdăh ưh kơ đei jang kiơ̆ ƀlep trong jang mŭk drăm ‘nao. Găh tơdrong kơ Khà Hạnh ‘noh tơƀôh hơdăh tơdrong hơrih sa ‘lơ̆ng hơ iă ăn tơdrong mĭnh ‘nu bơngai drŏ kăn kon kông gơ̆h tơgoăt dôm tơdrong so hăm tơdrng hle vă hơnhăk đei tơdrong hơ iă ăn kon pơlei pơla. Đơ̆ng mă kơdih pơm tơ-‘ngla kênh "Tây Bắc TV" păng tĕch mơdro tơmam drăm choh jang sa, pơgang hla ‘long, sư oei iung jang pơjing dơ̆ng lơ kênh anai, pơtho tơbăt ăn pơmai oh tơring hơtaih yăih păng rim tơ-‘ngla tơmam drăm OCOP găh trong tĕch mơdro tơmam drăm lơ̆m online.

Ƀôh hơdăh dôm tơdrong long păng tơdrong rơvơn ou, Khul kơdră hlôi iung jang tơchơ̆t ăn. Tơdrong vă jang 8 lơ̆m Tơdrong jang tơm Teh đak jĭ mĭnh trong jang ƀôh hơdăh. Kơdră chĕp pơgơ̆r Khul drŏ kăn Việt Nam Nguyễn Thị Tuyến sơkơ̆t hơdăh: "Trong jang tơm kơ Tơdrong vă jang 8 ‘noh pơm hơtŏk hlôh vao, tơplih jơhngơm đon lăng, vei lăng năng tông tơdrong hơrih sa, mŭk drăm, jơhngơm đon, vei lăng năng tông drŏ kăn păng hơ ioh, jang kiơ̆ trong tơlĕch jang hơtŏ hơnơ̆ng drŏ nglo drŏ kăn păng iung jang ‘lơ̆ng hơnăp jang kơ drŏ kăn lơ̆m atŏk tơ iung mŭk drăm-tơpôl."