Bơ̆ jang tơdrong tơgŭm, băt ‘mêm kơ bơngai đei kŏng, Anih pơgơ̆r sir chă, kôch iŏk kơting linh lôch tang ăn teh đak dêh char Quảng Ngãi jang hơdoi kơjăp hăm khul kơdră tơring păng kon pơlei vă pơgơ̆r dăr lăng. Mă hơtuch, 5 kơ̆l linh lôch tang ăn teh đak đei chă ƀôh, sir iŏk păng chơ ƀŭ tơ̆ pơsat linh Nghĩa Kỳ (plei An Hội Bắc 1, xăh Nghĩa Giang) kiơ̆ trong pơgơ̆r pơdong ƀŭ sĭt, ‘lơ̆ng.

Tơdrong sir chă păng chơ ba đe ‘nhŏng vih dơ̆ng hăm pơlei, hăm bôl boăl ưh lăp tơƀôh jơhngâm đon ‘lơ̆ng “Nhă đak ƀlŏk kơtu” đơ̆ng hơdrĕch hơdrung bơ̆n đĕch mă oei tơgop pơm pơhơi ƀiơ̆ dôm tơdrong ơh sơ ‘ngon đơ̆ng unh hnam, kơtum kơtŏng ‘nhŏng oh đe linh lôch tang ăn teh đak hai.