Lơ̆m noh, 251 tŏ hnam hlôi keh đang, tơgop hơtŏk tơdrong hơrih ăn kon pơlei đei tơdrong hơrih tơnap tap. Lơ̆m kơsô̆ 2.092 tŏ hnam hlôi tơlĕch ming hơmet tơ̆ dêh char Gia Lai, đei 122 tŏ hnam 'măn ăn unh hnam teh đak tơchơ̆t tơgŭm, păng ăn bơngai tơgŭm jơhngơ̆m hăm teh đak; păng jê̆ 2000 tŏ hnam ăn unh hnam hin dơnuh. Hăm tơchơ̆t man hloh 8.400 tŏ hnam ăn dôm unh hnam oei lơ̆m tơchơ̆t tơgŭm hơdrol kơ pơyan 'mi sơnăm ou, Gia Lai hlôi hơvơn lơ tơdrong tơgŭm lơ̆m tơpôl.

Lơ̆m noh, minh anih jang mŭk drăm kiơ̆ Jên mong "Kơyuơ bơngai hin dơnuh" dêh char, tơgŭm 10 tih hlj; Anih tơm Kŏng an hlôi tơgŭm hloh 201 tih hlj păng Anih jang vei lăng kon pơlei dêh char Gia Lai hlôi asong 211 tih hlj. Hăm tơdrong hăt hot vang tơgŭm đơ̆ng dôm jăl jang păng anih jang tơpôl, tơdrong jang sut lê̆ hnam hyah hyok, hnam pơgia tơ̆ dêh char Gia Lai tŏkb ŏk đei tơlĕch jang tơnăp, vă hơtŏk pơ-'lơ̆ng tơdrong hơrih ăn kon pơlei, mă kăl noh ăn rim unh hnam hin dơnuh, tơjê̆ hin dơnuh păng unh hnam teh đak tơchơ̆t tơgŭm hơdrol kơ pơyan 'mi sơnăm ou.

Jô̆ truh đĭ giĕng âu ki, dêh char Kon Tum đĭ sŭt đei 1.016 tŏ hnam pơgia, hnam hiah hiok lơ̆m akŏm kơsô̆ 2.752 tŏ hnam kăl kơ man ‘nao păng pơm hơmet ming. Lơ̆m kơsô̆ 1.016 tŏ hnam pơgia, hnam hiah hiok hlôi đei dêh char Kon Tum tơgŭm dôm ŭnh hnam kon pơlei sut hŭt, lơ̆m noh đei 787 tŏ hnam man ‘nao păng pơm hơmet ming 229 tŏ hnam. Kơplah sut hnam pơgia, hnam hiah hiok tơ̆ Kon Tum ăn ƀôh tơdrong vang jang ‘lơ̆ng đơ̆ng rim khŭl, grŭp tơpôl.

Vă hơnơ̆ng tŭn hrĕnh tơdrong sut hnam pơgia, hnam hiah hiok, khŭl kơdră chĕp kơ̆l 10 apŭng, pơlei tơm kơ dêh char Kon Tum dang ei tŏk bŏk tơlĕch jang kiơ̆ lơ trong jang akŏm hơmet pơ ‘lơ̆ng mơmat tat, tơhlăk tơhlĭn găh jên đơ̆ng kơpal klăih song jang hiơ̆; jên hơvơn vă sut hnam pơgia, hnam hiah hiok tŏ sĕt; ŭnh hnam ưh kơ đei jên iŏk hơdrol, ưh kơ đei bơngai jang man, pơm hơmet ming hnam.